一覺瞓醒，你竟然同我講香港有喪屍2-雙龍: Zombie 02：異常2.
「啲飛機多到噉，會唔會又係啲咩暴動呀？」
「新聞又無講喎！」
「係咪軍事演習呀？」
「軍事演習點會用客機呀！用吓個腦啦！」
大排檔的客人議論紛紛，你一言，我一語，大家都向天望去。
寒天龍單手端著幾個空杯準備走進廚房時，看到所有的客人都望著同一個方向，好奇地跟著望過去。
乜飛機會一次過一齊飛㗎咩？
寒天龍雖感到奇怪，但又覺得沒有必要大驚小怪成這個樣子，繼續收拾餐桌為下一組客人準備。
時間來到下午二時左右，一個穿著時髦的少女出現在大排檔。
「華叔，阿龍呢？」羅悅佩拿著一杯珍珠奶茶，找了一張二人桌坐下。
「佩佩，龍仔執梗嘢，妳等一陣啦！」
「今日同尋日一樣好多飛機呀！」羅悅佩指著天上的飛機說。
華叔坐到羅悅佩的對座「係呀，妳知唔知發生咩事？日日都轟轟聲嘈住晒！」
「唔知呀，新聞都冇講，上網又Check唔到。」
兩人依舊望著天上一架接一架飛航的客機，閒聊鎖碎事等待寒天龍的出現。
剛從廚房走出來的寒天龍慣例性地詢問著羅悅佩「阿佩？……食咩呀？」
「照舊係咪？妳兩個傾陣，我幫妳落單。」話音剛落，華叔識趣地把位置讓給寒天龍。
對於青梅竹馬的倆人，寒天龍見到羅悅佩並沒有感到興奮或特別高興，就好像一種習慣，一種看到家人般的習慣。
「又珍珠奶茶！」寒天龍望著剛遞到跟前的奶茶抱怨道。
「新出㗎！荔枝烏龍呀！我都未飲過，我飲先！」羅悅佩把奶茶搶回手中並大力吸吮飲管。
對於這種像極情侶的行為，寒天龍只覺得是兩人一直以來的相處模式，正常不過，但在外人看來完全就是在曬恩愛。
羅悅佩放下奶茶「喂，呢排機票平咩？咁多飛機，不如去旅行吖，我想去日本，又想去歐洲……」
「同我講嘢唔好成日擰嚟擰去，我睇唔到妳講咩！」寒天龍雙手按著羅悅佩的臉把它固定住。
「我話我想去……」
未等羅悅佩把話說完，一個光頭大漢手拿著一把兩尺長的開山刀邊倒退邊對空氣胡亂揮刀，一不小心整個人絆倒在一張圓桌上。
「痴線佬食人呀！痴線佬食人呀！」光頭大漢依然對著空氣胡亂揮刀，坐在地上不斷往後退。
「喂！你搞咩呀？擘友就死開啲啦！」華叔這種見慣大場面的人，對這種黑幫互砍的場面根本就見怪不怪。
「唔係呀……真係有痴線佬食人㗎！」被扶起來的光頭大漢依然講著同一句說話。
「你似嗰個痴線佬多啲喎！」阿九手拿水果刀盯著光頭大漢，提防著他突然發瘋。
「九仔，收番把刀先啦！」華叔揚手示意。
寒天龍見情況不妙，便向華叔提出護送羅悅佩回家。得到華叔的允許後，便牽起羅悅佩的手向後門的方向跑去。
「喂！阿龍！唔好走咁快，究竟發生咩事呀？」
寒天龍並沒有回應，只顧著向前跑，一直跑出大街才願意停下腳步「返拳館先！」
「吓？究竟咩事呀？噉華叔佢點呀？」羅悅佩緊張得雙手直冒冷汗。
「一陣再講，呢度好危險！」話音才剛落下，警車的鳴笛聲便從遠方響起。
一走進拳館，寒天龍便大叫「老竇，我老竇呢？」
得知寒一鳴外出辦事，寒天龍表現得更加緊張。
「阿龍咩事呀？」拳館大師兄胡炎陽冷靜地問道。
「又係噉……又有人食人！我去搵老竇，你哋幫我睇住阿佩，記得鎖門！」
正當寒天龍想離開時，被胡炎陽用手按著他的臉「坐低啦，我去打電話叫佢返嚟。」
得知寒一鳴已經在街口轉角處，寒天龍才呼出一大口氣，癱坐到地上。
「阿龍尋日返屋企嗰陣見過一次，拍埋片報埋警㗎喇！」胡炎陽向羅悅佩解釋，順便向二人遞上樽裝水。
又食人？咩事呀？
胡炎陽命拳館的師兄弟全員先留在原地休息，接著把掛在牆角上的電視打開，看有沒有相關的新聞出現。
「一節特別新聞報導，據剛剛警方提供的消息所指，由昨日開始，香港疑似出現一批邪教食人組織，該組織會隨機襲擊途人。
由昨日為止已經有多達數十名受害者，政府呼籲市民喺呢段期間非必要切勿離開家中，等待進一步指示。
如有進一步消息，本台會第一時間為大家作出更詳細嘅報導。」
胡炎陽見各個電視台都重覆播著同一則新聞便把電視關起，坐到擂台邊休息。
「個政府都痴撚線嘅，食人組織……哼！」
「係咪偷渡嗰啲人冇嘢食搞到要食人呀？」
「我就話世界未日就嚟到先真！」
聽到師兄弟聊著一堆有的沒的，胡炎陽有點不耐煩「夠喇！等師父返嚟先算，繼續練拳。」
「咪喇！我都係返去先，聽日見！」
「師兄，我都走喇！」
由於發生這樣的特殊狀況，大家心裡都開始產生出不安的因素，一個接一個離開拳館，惟獨寒天龍、羅悅佩、胡炎陽、一名新進師弟莫子謙和剛回到拳館的寒一鳴五人。
「搞乜呀，冚唪唥走晒嘅？」
「阿爸你搞咩呀？去咗邊呀？」寒天龍抱怨道。
「街口呀朱姐話今日超市早收，問我要唔要買嘢喎！你哋睇！今晚打邊爐，你哋都留低啦，好多餸呀。新抱仔嚟幫吓手，世伯整唔到咁多嘢！」
「Uncle呀……」羅悅佩紅著臉接過裝滿海鮮的塑膠袋走進廚房。