《我條命剩返三十日？！》: 《我條命剩返三十日？！》39

《我條命剩返三十日？！》39

日期：2024年8月22日　　時段：黃昏
死亡倒數：？ 日

——————

婆婆同阿暉喺病房門外等咗好耐。

婆婆一見到醫生走出嚟，就握住醫生隻手講：「多謝醫生，咁多年嚟睇住彤彤。」





「佢捱咗咁耐，真係好叻女。」醫生帶住平靜嘅語氣：「入去睇吓佢。之後會有工作人員嚟帶佢落去。」

「唔該醫生。」婆婆撐住拐杖，行咗兩步。擰轉頭同企喺後面，郁都唔郁嘅阿暉講：「你都入嚟見吓彤彤。」

阿暉忍住泡眼淚，跟喺婆婆嘅後面，一齊再入去病房。

護士已經拆走晒阿彤身上面嘅喉管，婆婆坐喺阿彤隔離，望住阿彤笑笑：「終於靚女返喇，唔駛貼住啲膠布，舒服晒喇，係咪？」

阿暉望住阿彤，想再感應吓佢喺唔喺度：『喺度嘅話⋯⋯應吓我⋯⋯』但係感應咗好耐，都冇反應。





「彤彤一定係等埋你先走⋯⋯」婆婆好堅強，眼淚都未流過一滴。

阿暉唔想呃婆婆：「其實⋯⋯我唔係阿樂。」

婆婆微笑：「原來真係唔係，我頭先都覺得有啲奇怪，阿樂⋯⋯唔會咁擔心彤彤。」

「嗯⋯⋯」阿暉唔知應佢咩好：「對唔住。」

「唔緊要。」婆婆呼咗一口氣：「好在有多個朋友喺度陪佢走，彤彤都冇咁孤單。」





成個黃昏，阿暉都陪住婆婆，協助佢處理文件，記低接落嚟嘅流程。

做完今日可以做嘅事之後，阿暉送婆婆去到大堂，同婆婆交換咗電話：「如果有需要幫手，隨時打俾我。」

「老人院啲工友會幫我手㗎喇，唔該晒你先。」既然阿暉只係普通朋友，婆婆都驚打攪到阿暉。

「遲啲定咗日子，再話我知。」阿暉都不宜插手人哋嘅家事。

「有心喇。」婆婆一邊講，一邊同喺門口入嚟緊嘅老人院工友揮手：「珊姨嚟咗喇。」

「婆婆⋯⋯」阿暉欲言又止。

婆婆放低手，望住阿暉，見佢唔出聲：「咩事？」





「阿彤有叫我同你講，佢話⋯⋯」阿暉忍住一下鼻酸：「多謝婆婆咁愛佢。」

婆婆望住阿暉，一臉驚訝，然後帶淚微笑：「你聽到佢講嘢，係咪？」

「我⋯⋯只係感應少少⋯⋯」阿暉唔想透露太多：「我知道佢好乖，佢來生一定會再嚟報答你。」阿暉雖然冇聽到阿彤講過呢句，但係佢真係感應到阿彤當時講呢句嘢嘅心情，一定係咁。

婆婆終於流咗滴眼淚，輕輕咁用手背抹走，然後握住阿暉雙手：「好多謝你，你要好好保重。」