《我條命剩返三十日？！》: 《我條命剩返三十日？！》40

《我條命剩返三十日？！》40

日期：2024年8月22日　　時段：晚上
死亡倒數：？ 日

——————

阿暉目送婆婆離開醫院，頭先死雞撐飯蓋嗰隻飯蓋，突然一下子崩塌落嚟，冇力再撐落去。

佢坐喺大堂啲長櫈度，冇聚焦咁望向前面。唔知點解，個心好唔舒服，乸住乸住。佢撳住心口，嗰種痛，形容唔到，咁大個仔都未試過。





眼淚不自覺咁流落嚟，滴濕咗條長褲。佢擦擦眼淚，兩隻腳縮埋上張櫈度，攬住自己對腳。

夜喇，探病時間已經過咗好耐，大堂其實都冇乜人。但佢都唔想喺大堂喊咁瘀，好努力咁平伏自己嘅情緒，沉澱一下自己。

阿暉整理完心情之後，抬一抬頭望上天花板，長嘆咗一口氣。

佢返返去病房，好多病人都拉埋簾瞓覺。佢都好快咁匿入被竇，快啲瞓，可能瞓咗就冇咁傷心。

點知，用張被冚住自己之後，就喊到收唔到聲。連阿暉都俾自己嚇親，一邊喊，一邊鬧自己做乜喺度喊：「我 X ⋯⋯男人老狗喊乜 X 呀⋯⋯停呀⋯⋯我停唔 X 到呀 XXXX ⋯⋯」





阿彤都係一個有血有肉嘅女仔，好堅強。就好似以前嘅自己咁，曾幾何時，佢都好熊心壯志咁創一番事業。可惜事與願遺，佢做唔到，然後就喺呢個世界上行屍走肉咁生存。俾人搶單？俾人蝦？俾人睇少？通通都無所謂啦，只求有兩餐安穩就算。

阿彤嘅死，令佢覺得好慚愧。開始覺得，點解死嗰個唔係自己？

喊到攰喇，終於都瞓著咗，仲發咗好多個夢。夢裡面有阿彤、阿妹、少女、靚仔、隔離床阿叔，仲有後生仔同埋變異婆婆嘅出現。

如果，呢幾個星期所發生嘅事，全部都只係一場夢，你話幾好呢。但係，每一個人物同細節、每一個情景同情緒，佢真係記得好清楚，全部都好真實。

『唉⋯⋯ X ⋯⋯』





第二朝，食完早餐，醫生話佢冇咩事，可以出院。傳咗短訊去「我們這一家」講聲而家出院，今晚喺屋企食飯。

喺返屋企嘅路上，佢都好留意身邊有冇可疑嘅人物，又留意住阿彤有冇再出現。結果，一切如常，冇特別事發生。

返到屋企，阿妹喺屋企畫緊圖，見到阿暉返到嚟，即刻放低畫筆，去到門口迎接佢：「阿哥，做乜唔俾我去接你喎？」

阿暉行到飯枱，放低咗啲餸：「醫院多菌呀，你唔好成日去。」

阿妹即刻揜住個口，再彈開自己：「你喺醫院返嚟，你都有好多菌呀！」

「呀！係喎！」阿暉即刻走返去門口，搵啲酒精消毒噴霧噴自己。

「駛唔駛咁誇張呀？」阿妹笑咗兩下之後，就擔心咁問阿暉：「係呢，近排你成日都暈低，仲要暈幾日咁，醫生有冇話咩事？」





「疲勞過度，工作壓力大啫，冇事。」

「真係㗎？大到暈幾日？」阿妹扁扁嘴：「你係咪有啲咩暗病唔同我講呀？」

「邊有？」

「咁做乜暈低幾日吖？兩次喎，咁密。」

「真係冇呀。」阿暉吹得就吹：「注意返，我係瞓咗幾日覺，唔係暈咗幾日。」

「補眠？」阿妹半信半疑。

「係呀，就係咁。」阿暉用酒精消毒噴霧噴埋對鞋同袋。

「我同你講呀，如果你有啲絕症，記得要第一時間話我知呀。唔好到拖到最後一刻先講呀，我殺咗你。」





『我估⋯⋯應該至少仲有兩年幾啩⋯⋯』阿暉默默咁放低枝噴霧，扮晒冇嘢，仲識講笑：「咁你即係，要喺我病死前殺死我？係咪？」

「哈哈哈！咁又唔係。」阿妹打開膠袋，睇緊入面有咩：「有菜心，同埋⋯⋯咩肉嚟㗎？」

「肉片炒菜心，仲有紅蘿蔔、薯仔同蕃茄。」阿暉捽完搓手液先走返埋去。

「又話兩餸一湯嘅？」

「有煲完湯啲湯渣吖嘛，咪多一個餸。」

「咁流㗎。」阿妹拎啲餸入廚房：「一陣打俾阿爸叫佢加餸先。」

「你唔好攪喇，等我沖完涼我嚟。」阿暉邊講邊走入房拎衫同毛巾，臨去廁所前，停喺廚房門：「今晚同阿爸阿媽講，好唔好？」





「吓⋯⋯？唔好啦，我好驚。」阿妹拎咗啲菜出嚟洗。

「遲早都要講㗎啦。咁早啲講，阿媽可以照顧你多啲吖嘛。」阿暉攤攤手：「我又冇大過肚，點知有咩要注意，一陣食錯嘢就弊。」

「唔⋯⋯」

「你諗諗佢啦，我沖涼先。」阿暉臨走再補多句：「等我切呀，你唔好攞刀。」

「哦～」阿妹浸好啲菜，沖好啲其他材料，就返返入房，諗諗吓阿暉都講得幾啱嘅。

阿暉入到廁所，長歎咗一口氣。佢望望鏡入面嘅自己，好似殘咗好多咁，鬚根都標埋出嚟。

佢用手指喺塊面度，自己篤咗個酒粒出嚟。佢笑咗一吓，可能係笑自己喺度扮阿彤，又可能笑自己掛住佢。鼻酸酸嘅感覺一湧而上，佢索咗兩吓鼻水，忍住咗。

『A0 叔正傻佬。』





阿暉好似聽到阿彤把聲咁，但係周圍望都冇人，亦都冇嘢有奇怪嘅動靜。不過阿暉凝住，阿彤就喺附近咁，同佢講咗一句：

「放心，我會行埋你嗰份。」



～全篇完～