《我條命剩返三十日？！》: 《我條命剩返三十日？！》38

《我條命剩返三十日？！》38

日期：2024年8月22日　　時段：下午
死亡倒數：？ 日

——————

入到病房，阿暉見到阿彤瞓咗喺病房，身上面插住有好多喉管，佢嘅病情睇嚟唔係好樂觀。

婆婆坐喺病床隔離張櫈，好開心咁同阿彤講：「阿樂返咗嚟呀，我都話佢唔會抌低你㗎啦。你而家放心晒啦。」





阿暉聽到佢咁講，終於確定嗰個阿樂，一定係因為阿彤醒唔返，所以抌低佢唔理，一走了之。

佢坐喺另一邊嘅床頭，望住阿彤，心裡面又有一種心痛嘅感覺湧出嚟。不自由主咁握住阿彤隻手，心裡默默咁同佢講：『你見點呀？係咪估唔到我會搵到嚟呢。』

然後阿暉就好似感應到阿彤咁，有把聲冇嚟神氣咁同佢講：『我唔係好想見到你喎⋯⋯』

「喂呀，一場朋友唔係咁對我吓嘩？」阿暉唔覺意講咗出聲。

婆婆聽到阿暉喺度自言自語，好奇企起身望望阿彤：「彤彤醒咗喇？」





阿暉知瀨嘢，即刻兜返：「冇冇⋯⋯」

婆婆有啲失望咁坐返低，拎起旁邊嘅冷球，開始織頸巾。

『哈哈，講笑啫 A0 叔。』阿彤仍然都係目無表情咁瞓喺度，傳出嚟嗰把聲，聽得出係扮到好精神咁：『做乜特登嚟探我，咁有心？』

『我純粹路過㗎咋，見到係你，咁咪入嚟望吓。』

『有冇咁啱呀？』





『就係咁啱囉。』

『扮晒嘢。』阿彤知道阿暉係特登過嚟。

『邊有？』阿暉一直拖住阿彤隻手，凍凍地，唔係好暖：『凍唔凍？』

『慣咗喇。』阿彤好想回握阿暉，但係佢做唔到：『你喺到就好喇⋯⋯』

『又話唔想見到我。』

阿彤停頓咗一吓：『幫我同婆婆講聲⋯⋯多謝婆婆咁愛我⋯⋯』

『原來係點我做嘢。好嘅，仲有咩吩咐？』





阿彤喘咗兩聲氣：『仲有⋯⋯照顧好自己⋯⋯行埋⋯⋯我嗰份⋯⋯』

『喂呀，講埋啲咁嘅嘢。』阿暉見到阿彤嘅眼角，有少少眼淚水滲出嚟，好擔心阿彤：『你⋯⋯冇嘢嘛？』

等咗一陣，阿彤都冇應佢：『喂呀⋯⋯你點呀？』

「你出句聲吖。」阿暉有好強烈嘅不詳預感，開始心急。

再等多咗一陣，儀器啲指數開始唔穩定，仲有部機開始響。阿暉知道阿彤夠鐘喇，忍住泡眼淚，撳咗救命掣叫醫生：「阿彤！你撐住！」

「彤彤⋯⋯」婆婆扶住拐杖企起身，捉住阿彤隻手，好似知道彤彤要走喇：「彤彤唔駛驚⋯⋯爸爸媽媽會嚟接你㗎⋯⋯」

阿暉好心急衝出門口，諗住見到隨便一個醫生或者護士，都拉入嚟搶救咗先：「有冇醫生？救命呀！」

當佢走出房門嗰一刻，佢聽到「咇——」一聲。呢一下尖銳嘅聲音，好似一嘢就直插入心臟入面咁，好 X 痛。





佢回頭望入返病房，見到半透明嘅阿彤，企咗喺床腳嗰邊，帶住微笑同佢揮手：『多謝你。』

然後，阿彤就正式咁離開咗呢個世界。