《我條命剩返三十日？！》: 《我條命剩返三十日？！》37

《我條命剩返三十日？！》37

日期：2024年8月22日　　時段：下午
死亡倒數：？ 日

——————

阿暉醒返，望到天花板嘅燈，好掁眼。佢咪埋眼，仲手摭一摭啲光，再感受到呢個凍凍地嘅氣溫，仲聞到呢種消毒氣味。佢敢肯定，呢度係醫院。大概係因為佢個精神離開咗，所以個肉體就暈咗喺街。

『哇，好彩有人送我嚟醫院啫，唔會俾人當垃圾掉 X 咗。』





阿暉習慣咗個光度，擘大眼再睇睇周圍。見到啲護士喺度行嚟行去派藥，隔離啲病人各顧各自己食嘢、瞓覺、碌電話。佢伸咗個懶腰，摸摸個頭，俾人包紥咗。

「醒喇？」有個護士行埋佢身邊：「有冇見邊度唔舒服？或者痛？」

阿暉伸伸手腳，又轉吓條腰：「冇事。」

「你撳親個頭，入嚟嗰陣幫你照咗個腦，結果都冇咩事，少少皮外傷。」

「好嘅，唔該姑娘。」





「嚟，量個血壓先。」血壓量完，姑娘紀錄完：「有咩問題，一陣醫生巡房你再問佢啦。」

「唔該。」阿暉好似瞓咗好耐咁，手手腳腳都硬晒。佢走落床伸展吓，拉拉筋。然後喺個櫃入面，拎咗個電話出嚟。一望個日期：『哇！幾日喇？』有好多個電話通知，同屋企人講聲冇事之後，再處理好公司請假嘅事。

嗰晚嘅記憶冇被消失，佢記得好清楚發生過咩事。

阿彤應該都係呢間醫院，想去探吓佢，但係唔知佢係咩病房。佢望吓四周圍，一個人都唔識，又冇人會理佢。於是就行出病房，同姑娘交帶講聲出去行吓之後，就行咗出𨋢口。

入咗𨋢，唔知點解好自然就撳咗五樓，嗰個掣好似有魔力咁，佢覺得阿彤會喺嗰度。





出咗𨋢，佢行到去接待處，有啲驚啲姑娘好惡，但都膽粗粗咁開口問：「呃，唔該。我想探陳亦彤。」

姑娘望一望佢，帶住懷疑嘅眼神問：「你係佢邊位？」

「我係佢⋯⋯朋友。」阿暉估中咗，阿彤真係喺度，覺得自己好醒：「我啱啱先知原來佢同我同一間醫院，所以想探吓佢。」

「未到探病時間喎。」

「探病時間我呀妹要嚟搵我，我可唔可以趁呢個時間去探阿彤先？」阿暉揚一揚雙手，展示住件病人衫：「我都入咗院。」

姑娘黑咗一下面：「唔係探病時間，只可以係親人入去陪佢。」

呢個時候，後面傳嚟一把老人家嘅聲：「咦？阿樂？」





阿暉望一望後面：「我⋯⋯」

「你終於都嚟探彤彤喇？」一個拎住拐杖嘅老婆婆，面上帶住微笑。

「呀⋯⋯」阿暉好醒，即刻認親認戚，仲扮可憐：「係呀婆婆，但係我而家入唔到去。」

「陳姑娘，佢係彤彤嘅男朋友。」婆婆同姑娘講：「可唔可以通融吓？」

「好啦，一次㗎咋。」姑娘講完就坐返低做嘢。

婆婆慢慢行，阿暉主動上前扶住佢：「婆婆，小心啲。」

婆婆笑得好開心：「你返嚟真係太好喇，彤彤知道一定好開心。」

「唔⋯⋯」阿暉心諗：『有冇真係同呀男朋友仔咁似樣呀？』





「阿樂，你冇咩嘛？做乜事入咗醫院嘅？」婆婆見到阿暉嘅病人衫，有啲擔心。

「冇事，身體檢查啫。」阿暉隨便答。

「冇事就好喇。」婆婆有啲擔心咁問：「你係咪唔會再走㗎喇？」

「呀，係呢，」阿暉唔敢隨便幫人承諾啲咩，都係帶婆婆遊吓花園先：「婆婆你身體幾好嘛？」

「老喇，就嚟行唔郁。」婆婆好健談，同阿暉乜都傾一餐。