《我條命剩返三十日？！》: 《我條命剩返三十日？！》36

《我條命剩返三十日？！》36

日期：ERR 404　　時段：ERR 404
死亡倒數：ERR 404

——————

阿暉一直望住阿彤，望到個心仔卜卜卜卜咁喺度跳：『呀⋯⋯ XX 喇⋯⋯我唔係鍾意咗佢吓嘩？』

佢見阿彤好大膽咁挨埋嚟，仲愈嚟愈近：『佢⋯⋯唔係要錫埋嚟吓嘩？我 X ⋯⋯』怕羞到捉緊拳頭，郁都唔敢郁，又唔知點算好。





阿彤發現阿暉紅到面晒，嘴唇都震埋，於是停止接近，仲笑到收唔到聲：「阿叔你唔好話我知，你係A0呀嘛。哈哈哈哈！」

「咩、咩呀？A0 又點呀？」阿暉發現自己俾人玩，即刻起晒弶：「你哋啲凡夫俗子呀，個個都俾愛情矇閉雙眼，我先係人間最清醒嗰個。」

「你頭先係咪有戀愛嘅感覺呀？」阿彤變埋聲，嘟起個嘴：「係咪好緊張呢？」

「邊有啫？我係啤住你，睇吓你喺度做乜嘢咋。」阿暉喺度語無論次：「你再近啲，我就一嘢閃開㗎喇。」

阿彤一邊岌住頭表示贊同，一邊笑住咁聽阿暉為自己辯護：「好啦，以後就叫你做A0叔。」





「喂呀！」阿暉冇佢咁好氣。

「你句『喂呀』講得好得意，講多次嚟聽吓吖。」阿彤仲係玩緊佢咁。

「喂呀⋯⋯」阿暉冇佢咁好氣：「我都係唔同你講嘢。」

阿彤見到阿暉嘅反應，真係好得意，笑到肚痛孿埋。

阿暉想爆佢粗，但係又真係嬲唔落佢。覺得阿彤好慘，一直都醒唔返，好多嘢想做、好多嘢想試，最後都係得個講字。佢自我分析完，覺得自己係可憐佢，多過鍾意佢：『唔！一定係咁！』





呢個時候，少女入返嚟：「得喇，而家可以送你哋返去。阿彤先？」

「嗯。」阿彤回應少女，亦都平靜返落嚟，帶住微笑咁同阿暉認真講：「我走喇。」

「好行夾唔送喇。」阿暉見到阿彤個笑容加酒粒，覺得佢無敵咁可愛：『 X ！冇事！』

「你要好好保重。」阿彤企咗起身，打開雙手：「可唔可以最後攬多次？」

『最後？我哋，係咪唔會再見？』阿暉好想問，但係都冇問出口。佢打開雙手，上前攬住阿彤。

阿彤今次冇喊到，仲講咗句：「講樣嘢你知吖，其實你真係好似我男朋友呀，A0 叔。」

「吓？」阿暉真係估佢唔到。





阿彤開懷大笑，離開咗懷抱，行埋去少女嗰度：「我準備好喇。」

少女露出招牌笑容，喺阿彤嘅額頭上面，細細力咁彈咗一吓。

阿暉見住阿彤喺自己面前開始變透明，喺最後殘影時間，同佢揮手講再見，逐漸消失。唔知點解，阿暉有一種好心痛嘅感覺，乸住乸住咁。

少女行到阿暉面前：「到你喇。」

「我係咪會返去自己個身體入面？」

「冇錯。仲有，你唔會再可以抽離，會做返個正常人。」

「咁我條命呢？而家剩返幾多時間？」

「呢個係機密，唔話得你知。」少女講完，同上次一樣，未等阿暉答佢，就好大力咁敲咗佢個頭一下。





阿暉慘叫咗一聲：「痛——！」然後就眼前一黑，冇咗知覺。