《我條命剩返三十日？！》: 《我條命剩返三十日？！》35

《我條命剩返三十日？！》35

日期：ERR 404　　時段：ERR 404
死亡倒數：ERR 404

——————

喺佢哋面前嘅哋下，突然出現咗一個屎渠蓋。個屎渠蓋慢慢打開之後，攻上嚟嘅惡臭極度難頂，難頂到阿暉啲記憶返晒嚟：「我見過呢個屎渠蓋！」

「咁你記唔記得要捉實我，唔好放手？」少女拖住佢哋兩個，一嘢就跳入咗個屎渠入面。





「哇！！」阿暉又誇張咁大叫，反而阿彤比較冷靜。

同之前一樣，惡臭拜拜，花花世界，佢哋嚟到呢個香噴噴嘅地方喇。

少女帶住佢哋去星星屋，再入去房仔。用咗一段長時間，記錄所有同後生仔有關嘅事，例如見面、任務、揀人等等，全部都記錄在案。

「好多謝你哋嘅合作。」少女對住阿暉講：「如果有需要，可能要請你返嚟出庭作証。」

「好嘅冇問題，不過下次可唔可以，唔好咁突然又好近咁出現？遠返少少，俾返一點五米距離，唔好嚇親我。」阿暉笑笑口咁講。





「乜我而家嚇親你咩？」少女個樣嬲嬲地，「哼」咗一聲：「係唔係好唔滿意？」

「冇冇！」阿暉耍耍手，以笑摭醜：「我咁講啫。」

「你哋差唔多可以返去㗎喇。」少女唔埋阿暉，低頭執文件：「不過我攪埋呢疊嘢先，轉頭返嚟。你哋坐吓，好快返。」然後離開間房。

喺頭先錄口供嘅時候，阿暉知道咗，原來阿彤已經昏迷咗六年幾。即係話，阿彤不斷延長緊自己條命，但係一直都冇享受過生命。咁佢延長條命嚟做咩？

阿暉望住阿彤，好想問佢為咗啲咩，明知自己唔會醒返，都想延續自己條命：「點解你⋯⋯？」





「唔好問。」

「你又知我想問咩？」

「見你個樣尷尷尬尬就知啦！」阿彤恥笑一下阿暉。

「呃⋯⋯」阿暉搲搲頭，然後沉默。

「哈哈哈，你真係唔問㗎喎。」阿彤大笑起嚟。

「咁你叫我唔好問叫嘛。」阿暉真係捉摸唔住女人呢啲咁善變嘅性格。

「講笑咋，咁傻嘅你？」阿彤將枱面上嘅鐘擺球，拉到面前。拎起起一粒小球，然後放手，鐘擺球就開始左右搖動。





「你點解要想延長條命嘅？你⋯⋯明知你醒唔返。」

「我想見一個人。」

「邊個？」

「你估吓。」阿彤半趴喺張枱度，用一隻手托住個頭。

「一定係男人，或者係女人。」

「哈哈，你唔好話係人類？」阿彤笑得好開心。

「講啦人類。」阿暉俾阿彤嘅笑容吸引住：『佢真係幾得意。』

「嗰個人，我等咗佢好耐㗎，但係佢都冇出現過。」





「男朋友？」

「仲算係啩。」阿彤點頭，苦笑一下：「因為我昏迷咗，所以冇正式分手。」

「值咩？等佢咁耐。」

「等到咪值囉，不過最後都等唔到。」

「但係至少你睇清楚呢個人啦，係咪先。」阿暉突然變咗人生導師，勁有耐性，仲好有私心咁話：「以後唔好再搵佢喇，呢個人唔值得你咁樣等佢。」

「咁邊個先值得我等？」

阿暉同阿彤視線突然撞埋一齊，兩個人你眼望我眼，然後一齊沉默。





佢哋嘅視線都冇避開對方，時空好似瞬間凝結咗咁，呢個世界就剩返兩個人。