《我條命剩返三十日？！》: 《我條命剩返三十日？！》34

《我條命剩返三十日？！》34

日期：2024年8月19日　　時段：早上
死亡倒數：12 ＋ N ＋ 850 日

——————

個太陽都出晒嚟，身邊愈嚟愈多人。

阿彤喊完一輪，對眼腫腫地，提起微笑，可愛嘅酒粒更顯得佢楚楚可憐：「係呢，點解你要延長條命？」





「我？我其實，諗住放棄㗎喇。」

「點解嘅？」

「我唔想用人哋條命嚟換自己條命。」阿暉講返頭先個情況俾阿彤知：「但係個情況都幾危急，咁咪救咗個女仔先。」

「原來係咁，你係佢救命恩人。」阿彤真心覺得阿暉做得好好。

「哈，係啫。但係嗰個人死咗喎，因為我。」阿暉對呢件事耿耿於懷，雖然大隻佬係衰人，但始終都覺得，係自己殺咗佢。





「冇得咁計嘅，死咗個衰人，但係救返個女仔。你救嘅係佢嘅人生。」

「人生⋯⋯」

「雖然點都會有陰影，但係事情未去到最差。希望佢可以快啲有返自己嘅生活，唔好只係活喺陰影之下。」阿彤個心都沉咗一下，因為自己而家，都只不過係生存緊，而唔係生活。

「唔⋯⋯」阿暉覺得阿彤諗嘢都幾成熟，攪到自己好低能咁。佢而家都開始喺度思考自己嘅事，諗緊自己之後要做啲咩。

「你有多兩年幾命，可以做到好多嘢呀。」阿彤笑笑口咁自嘲：「好似我咁，就乜都做唔到喇。」





阿暉望住阿彤，佢嘅眼神好羨慕自己，可以繼續生活：「如果你醒返，你想做咩？」

「我搵一份穩定嘅工，然後喺放工之後，就做自己想做嘅嘢。」阿彤興奮咁分享：「我想學整蛋糕啦，想學韓文啦，又想去學跳舞。」

「原來你咁好學。」阿暉聽到阿彤嘅熱烈分享，自己都感染埋啲歡樂氣氛。

傾傾吓，時間都差唔多，阿彤轉返話題：「你識唔識入返自己度呀？」

「梗係唔識啦。」阿暉想繼續講吓笑，輕鬆吓：「可唔可以教我呀師姐。」

點知阿彤真係笑出嚟：「你大我好多喎阿叔。」

阿暉原本就唔係咁鍾意俾人叫阿叔嘅，不過見阿彤笑得咁開心，咁就冇所謂啦：「你經驗多嘛。」





「你好似頭先咁，諗住就得㗎喇。」

「OK，冇問題。」

「你要保重呀，好多謝你。」阿彤企咗起身，拍拍條裙：「咁我走先喇。」

正當佢哋要好好道別嘅時候，少女突然喺佢哋兩個中間憑空出現：「等陣！」

阿暉嚇親，仲企埋起身：「哇！咩事？」阿彤就向後褪咗兩步。

「你、同埋你。」少女食指指完阿暉，又指住阿彤，好認真咁講：「兩個係好重要嘅証人！」

「你係邊個？」阿彤冇見過少女，根本就唔識佢。

但係阿暉認得：「天使少女？」





「希望你哋可以跟我返去，錄個口供。」少女收起手指，同佢哋講返發生咩事：「破壞秩序嘅主腦已經拉咗，有晒証據，一定告得入。」

「發生咩事？邊個主腦？」阿暉聽到重點字眼「拉咗」同埋「告得入」，確定少女係好人嚟。

「尋晚你同主腦所發生嘅事，已經全部錄起咗，交晒上去。」

「你跟蹤我？」阿暉完全冇注意到俾人跟蹤。

「都唔駛跟蹤嘅，你都見我唔到，坐埋喺你隔離你都唔知啦。」少女笑一笑，然後又好認真：「我知道你同佢有接觸，所以上次見完你之後，就開始跟住你。」

「哦！」阿暉記起雨婷話有嘢一直跟住自己：「原來係你。」

「咩係我？」





「冇嘢，你繼續。」

「佢亂咁玩啲人命，將啲人命調嚟調去，攪到近排我哋多咗好多嘢做。又要處理返相關人士嘅命運，又要留證據捉佢。」少女嘆咗口氣：「就快可以close file喇，不過我好需要你哋嘅証供。」

「嗯。」阿彤一直都唔係好鍾意後生仔：「我可以幫手。」

阿暉同阿彤講：「我哋共同進退。」

「咁我哋行喇。」少女一左一右咁拖住佢兩個隻手：「拖實呀！」