《我條命剩返三十日？！》: 《我條命剩返三十日？！》33

《我條命剩返三十日？！》33

日期：2024年8月19日　　時段：凌晨
死亡倒數：12 ＋ N ＋ 850 日

——————

佢哋兩個一邊飛，一邊傾吓偈，好快就到咗山頂，搵咗個位坐低抖抖。

「係呢，咁你係咪都係見到個天使，話你知你就嚟死？」阿暉伸吓啲手手腳腳。





阿彤擰擰頭：「我病發入咗醫院，昏迷咗好耐，然後潛意識就出咗嚟，仲見到你頭先所講嘅後生仔。佢都係俾咗張抽獎咭我，開完之後，佢就話我可以有多三個月命，咁我咪換咗。」

「病發昏迷？」阿暉突然好同情阿彤：「咩病？」

「呃⋯⋯類似急性貧血嗰啲啫⋯⋯」

阿暉對病理都有少少認識，貧血貧到昏迷咁耐，一定唔只係貧血咁簡單：「然後呢？」

「然後，三個月之後我都係醒唔返。」阿彤苦笑咗一下：「之後再見到佢，佢就叫我做啲任務，可以再換多啲命。」





「佢要你做咩？你有冇做？」阿暉非常好奇。

「佢要我周圍搵啲目標人物俾佢。」

「咩目標？」

「衰人，總之係衰人就得。」阿彤回憶住佢同後生仔嘅對話：「啱嘅話，就會懲罰佢。」

阿暉諗起嗰部遊戲機，佢換命嗰陣，有三個人俾佢揀，唔通就係阿彤搵出嚟嘅？





呢個時候，地平線嗰度有一條打橫嘅光線，慢慢堆開黑幕，成個黑色嘅天空都變光咗，灰灰地，又藍藍地。有個鹹蛋黃由嗰度慢慢爬上嚟，個天再變成黃黃地，又橙橙地咁。

阿暉從來都唔會嚟呢啲又遠又高消費嘅遊客地區，至於日出，對佢嚟講都係冇咩意義。佢都唔係呢啲注重儀式感嘅浪漫人士，要佢晨咁早起身睇日出，一定難過攞佢條命。

日出嘅光，照射落佢哋身上。佢見到阿彤望住日出嘅神情，微笑嘅面上面，充滿心事。眼前呢個畫面，令佢對日出有一個好好嘅印象。

「係呢，咁你總共換咗幾長命？」

「嗯。計埋計埋，應該都延長咗六年有多喇。」

「咁你醒返之後，咁咪仲可以玩多幾年？」

「唔⋯⋯」阿彤冇出到聲，耷低咗個頭，望住自己踢踢吓嘅腳。





阿暉見佢冇反應，即刻知道自己講錯嘢，諗緊點兜。

阿彤突然喺度啜泣：「我⋯⋯唔會醒得返⋯⋯」

阿暉有啲嚇親，摸摸褲袋又冇紙巾喎，唔知點算好。面對住一個喊緊嘅女仔，都唔係好識俾反應：「呃⋯⋯凡事冇絕對嘅，希望在明天吖嘛⋯⋯可能你聽日就醒返呢。」

「我知㗎，由第一日開始，我就知㗎喇。」阿彤成功忍住咗啲眼淚：「我係冇可能醒得返。」

「而家啲醫生好叻㗎，一定搵到方法。」

「醒返嘅機會近乎零，係醫生講嘅。」阿彤其實已經接受咗事實，語氣都好平靜，只係，有啲唔甘心。

阿暉都無言了，諗唔到可以用啲咩方法去安慰到佢：「sorry⋯⋯我唔知可以為你做啲咩喇⋯⋯」

阿彤望住阿暉：「你可唔可以攬吓我？」





阿暉呆咗一吓：「呃，咁唔係太好啩，我哋啱啱識咗冇幾耐。」

「Sorry，當我冇講過。」阿彤耷低頭，抹走就嚟滴出嚟嘅眼淚。

頭先阿彤都有話佢知，後生仔係第一個，而阿暉就係第二個可以同佢接觸到到嘅人。

『睇嚟佢應該好孤獨，一直都係得佢自己一個。』阿暉突然同理心爆炸，再懶好笑咁講：「好啦，過嚟等哥哥抱吓你。」佢坐近啲阿彤，輕輕咁搭住佢個膊頭。

阿彤笑咗一下，然後鑽入去阿暉嘅懷抱入面。兩秒後，佢就開始攬實阿暉大喊特喊。

阿暉或多或少都明點解佢會喊得咁犀利，所以俾多少少力去攬住佢，輕輕咁拍拍佢膊頭。