《我條命剩返三十日？！》: 《我條命剩返三十日？！》32

《我條命剩返三十日？！》32

日期：2024年8月19日　　時段：凌晨
死亡倒數：12 ＋ N ＋ 850 日

——————

「你？都係？」阿暉聽到阿彤咁講，開始平靜落嚟。

「嗯。」





「你都抽過獎？」

「嗯。」

「你都就嚟死？」

「嗯。」

「呀⋯⋯」阿暉估唔到阿彤係同道中人：「頭先⋯⋯激動咗少少，sorry呀。」





「唔緊要。我啱啱變成咁嘅時候，都好似你咁嬲。」阿彤仍然笑笑口。

阿暉留意到佢笑起上嚟，右邊面有一粒淺淺嘅酒窩：「你頭先話，我哋而家喺潛意識層入面？咁即係點？」

「就好似咁。」阿彤喺阿暉面前飄起咗：「可以自由咁飄嚟飄去。」

「唔係化？」

「你試吓吖。」阿彤喺度左飄飄右飄飄。





「我唔識㗎喎。」阿暉望住阿彤飛嚟飛去，好羨慕。

「諗住就得㗎喇。」

「即係話『我要飄起』咁呀？」阿暉趷起腳踭，抬起個下爬：「我飄～咁呀？」

「哈哈哈，唔係咁。」阿彤俾傻更更嘅阿暉引到大笑：「好似你要行路，你都唔駛同自己講『我要行路』咁啦。」

阿暉見到阿彤笑佢，即刻尷尷尬尬咁企返好：「即係點呀？」

阿彤飄高啲：「跟住嚟。」然後再飄走。

「喂！等埋！」阿暉淨係諗住要跟住佢，不期然就飄起咗，兩隻腳離咗地：「哇！X！真係飛起咗？！」





阿暉心情突然變得好興奮，終於好似可以龍珠入面嗰個孫悟空咁樣飛！細個嗰陣，用念力，加埋盤坐咗好耐，都飛唔起！而家一試就得咗：「 X 真係好 X 爽！」

佢仲喺度周圍飛嚟飛去、飛高飛低咁，一嚟就好快上手，想飛邊度都得：「正！」

「你知唔知呀？我細細個就好想飛㗎喇。」阿暉好興奮咁同阿彤分享：「我試過好多方法都飛唔起。」

「係？」阿彤估唔到阿暉咁有童真。

「你仲識唔識瞬間轉移？」

「咩嚟？」

「即係閃一下，跟住就去咗第二度。」阿暉好熱烈咁分享細個啲童年回憶：「仲勁過多啦A夢個隨意門，法寶都唔駛用。」

阿彤睇住佢變到成個細路咁，心情都好愉快，係咁多年嚟，最開心嘅一次。