《我條命剩返三十日？！》: 《我條命剩返三十日？！》31

《我條命剩返三十日？！》31

日期：2024年8月19日　　時段：凌晨
死亡倒數：12 ＋ N ＋ 850 日

——————

喺長髮少女飄緊過嚟嘅同時，有一架的士突然喺阿暉面前高速行過，嚇到阿暉又褪後多幾步。

阿暉非常驚訝，因為，頭先架的士，有一半係穿過咗自己！





佢聽到交通燈號發出嘅緩慢噠噠聲，望到行人過路已經變返紅燈。但係，啲車一架、一架咁穿過佢個身體：「嘩！ X ！咩事？」

長髮女子飄到阿暉面前停低，冇理到穿過緊佢哋嘅車：「你好，我係阿彤。」

「吓？」

「好高興認識你。」阿彤好似好開心咁笑笑口。

「喂，等陣先！」阿暉覺得事有蹺蹊，亦都覺得俾車穿過呢件事，似曾相識咁：「咁你係人？定係鬼？」





「我⋯⋯兩樣都唔係。」阿彤收一收臉上嘅笑容。

「吓？即係點？」

「呢度係潛意識層。」

阿暉心諗：『潛乜 X 話？』

「我理論上死咗，但係實際上未死。」





「你知唔 X 知你而家講緊乜 X 呀 X ？」阿暉反應好大

「唔⋯⋯」阿彤唔知點講好。

「呢個世界係咪已經 X 癲咗？」阿暉對於最近所發生嘅事，開始覺得煩厭，嬲到行嚟行去：「XXXX 我而家係咪返唔到去原本個世界喇？咩事呀而家？！」

「你冷靜啲先。」

「XXXX 你叫我點 X 冷靜呀？一時又話我得返幾個星期命， XX 一時又話我加多幾年命，XXXX 而家又話我喺個潛意識層入面。」阿暉真係忍無可忍，向住阿彤發脾氣：「攪乜 X 呀？」

但係阿彤冇出聲，只係點住頭，聽住阿暉喺度鬧。

「我乜 X 都唔 X 想知呀！做乜 X 要俾我知都咁 XX多嘢喎！ XX 淨係做個正常人咋。」





阿暉一直係咁埋怨、係咁鬧，鬧都冇嘢好鬧，又重複鬧多次，鬧到氣來氣喘。

「嗰個乜 X 嘢天使，好似要幫我咁，XXXX 都唔知係咪佢 X 攪到我得返幾個星期命。嗰個喺七仔做嗰個 XX 呀，攪埋啲乜 X 抽獎咭呀，又話送又盛咁。XX 到頭嚟攪 X 到我而家人唔 X 似人，鬼唔 X 似鬼。喂呀大佬，死咪死囉 XX，唔好咁 X 煩得唔 X 得呀？」

大約十分鐘之後，終於停落嚟。

「我明你呀，因為我都係。」阿彤嘅笑容，係溫暖而甜美嘅。