《我條命剩返三十日？！》: 《我條命剩返三十日？！》30

《我條命剩返三十日？！》30

日期：2024年8月19日　　時段：凌晨
死亡倒數：12 ＋ N ＋ 850 日

——————

阿暉頭先氣沖沖咁離開七仔，都冇理到要行去邊，就一味向前行。

行咗幾分鐘，開始見暈，天旋地轉，仲聽到砰砰嘭嘭，類似爆炸咁嘅聲。佢企定定，用力咪埋眼，冚埋對耳仔，等冇咁暈先再繼續行。





好快冇事喇，阿暉望住個天，長歎一聲：「唉！ X ——」

呢兩個星期，佢覺得自己好似入咗個困局入面。由見到天使少女嗰日，呢個局就開始一路轉，走極都走唔到出嚟咁。

佢喺斑馬線前停咗落嚟，望到對面馬路，都有一個人等緊過馬路。但係嗰個人耷低頭，著住連身碎花及膝裙，長頭髮但又冇紥起，垂喺兩邊膊頭。成個人仲好似俾人打咗紅色神枱燈咁嘅色，狀態有啲恐怖。

阿暉好鬼驚，亦都好驚鬼：『咩料呀又嚟？』

望望吓先發現，自己而家呢個位都係打咗紅燈。哦，原來，係防止低頭族冇睇燈就過馬路嘅新型輔助裝置：『我 X 吖⋯⋯嚇 X 死人咩。』





雖則係咁，佢都唔係好夠膽望住嗰個人，眼神放喺地下啲紅色光度，開始喺度懷疑人生。

到而家為止，阿暉都唔知道而家係咪真係而家，呢度係咪真係呢度。而家呢個自己，會唔會唔係自己嚟？而家其實係處於一個平行宇宙？

諗諗吓，又諗吓對面嗰個人，會唔會係同佢一樣，要拎啲抽獎咭去延續生命？嗰個人係唔係都就嚟死？嗰個人有冇見過後生仔？或者會唔會同天使少女有關係？

「好 X 煩呀 X ！」佢拍吓自己個頭，再抆吓啲頭髮，自己鬧自己：「呀！唔好諗唔好諗⋯⋯醒啲啦 XX！ 」

阿暉等咗好耐都未轉燈，有啲唔耐煩，走埋去燈柱嗰度，大力拍咗幾下個「行人過路按鍵」。兩秒後，就轉咗綠燈。





佢開始過馬路，但係好奇怪，對面嗰個人郁都唔郁。所以特登行斜線兜遠少少，唔好行咁近佢。

馬路過咗一半，嗰個長髮女子都仲係企喺度，眼尾仲睄到佢好似望緊自己。

『X！唔 X 係吓嘩？』阿暉覺得好唔妥，明明新型輔助裝置個紅色燈，會喺綠燈時自動熄燈，但係點解⋯⋯嗰個人仍然係紅色。

佢定住咗喺斑馬線中間，唔敢郁，亦唔敢轉身，因為佢感覺到，後面有一陣好強嘅冷空氣，喺佢背脊散發出嚟。佢望住前面嗰個長髮女子，而咁啱長髮女子又抬起頭，同阿暉四目交投。

阿暉睇得好清楚，長髮女子有啲憔悴，面色蒼白，雖然唔恐怖，但都夠嚇。

「你見到我？」長髮女子有啲驚訝。

「我⋯⋯見到⋯⋯」唔知邊度得嚟嘅勇氣，阿暉竟然會應佢。





長髮女子露出微笑，慢慢飄到阿暉面前。冇錯，係飄。

『喂呀 X⋯⋯』阿暉褪後幾步：「有事慢慢講⋯⋯」