《我條命剩返三十日？！》: 《我條命剩返三十日？！》29

《我條命剩返三十日？！》29

日期：ERR 404　　時段：ERR 404
死亡倒數：ERR 404

——————

隔咗一陣，七仔個門開返，後生仔笑臉迎接：「你返嚟換嗱？」

不過佢見到唔係阿暉，面上嘅笑容一瞬間就收起咗。佢頭上頂收銀員帽，瞬間俾佢爆炸起嚟嘅頭髮撐起咗。佢嘅身體亦都隨之發大，肌肉增新到好似Hulk咁大隻，頭頂就嚟掂到天花版，爭在冇變到綠色。





「你知你今次走唔甩喇，係咪？」入嚟嗰個女仔，身穿白色連身短裙、黑色長靴、孭住一個細細地嘅圓形斜孭袋，以往嘅可愛笑容唔見咗，淨返認真嘅神情。無錯，佢就係好耐冇出場嘅天使少女。

少女揮一揮手，有另外一隻，一樣都係Hulk咁強壯嘅怪獸走入嚟，聲音低沉咁講：「你都係乖乖地，跟我哋返去啦！」

「XX 你做乜 XX 背叛我哋呀 XXXX！」後生仔眼睛變成閃燈紅色，面向怪獸，揮動手臂去攻擊：「你呢個 XX 二五仔！」

「我只係做返應該做咩事啫！」怪獸跳起身，冇理到假天花同埋燈，照撞爛佢，跟住降落喺後生仔背面，一鎚打佢背脊。

後生仔砰嘭咁跌咗落地，不過都冇阻到佢順勢反身，再一手撐返起自己，起飛腳伸向怪獸。





怪獸食咗佢一腳，彈咗去後面，同啲貨架一齊冧檔，堆埋一堆：「呀——！」

「你睇你孱咗幾 X 多！廢柴！」後生仔再衝去怪獸前面，起手要請佢食兜鎚窩「面」。

不過說時遲、那時快，天使少女喺佢哋後面使出一招法術，令到後生仔對手停住咗，冇得再向前衝：「我哋有晒證據㗎喇，今次實鋤得你入。」

後生仔連啲牙都變尖埋，張牙無瓜咁轉身，撲向少女。少女反應迅速，即刻跳起，然後降落喺後生仔嘅頭後面。

怪獸呢個時候又衝上前，捉住後生仔隻腳，等佢失平衡仆向前面。





今次後生仔因為俾少女控制住對手，所以撐唔住到個地下，一仆一碌咁撻咗落地，連個地都凹埋 ：「吼——」

少女順住個勢，打咗個關斗碌走咗，怪獸就即刻撲上去砸住後生仔：「你話邊個廢柴？」衝力令到兩隻重量級嘅怪物向前滑行三米，剷起晒啲地板，撞冧晒啲貨架。

後生仔對手俾怪獸扣住咗喺背後，佢用力掙扎，但係都甩唔開怪獸：「你囉！廢柴！ XX ！」

「你俾廢柴打低咗，咁你咪仲廢？」怪獸冷笑一下，再用多啲力扣實後生仔對手。

後生仔發晒惡，係咁踢腳，諗住要企返起身。但少女就趁呢個時候，走埋去後生仔度，用手掌掂住佢印堂，唸咗句咒語。跟住，喺後生仔嘅身體周圍，冒出好多泡泡，然後再變成一個大型泡泡，包住咗佢成個人。

後生仔逐漸變返一個正常人樣，喺個泡泡入面係咁掙扎，但係都出唔到個泡泡。佢係咁講嘢喺度鬧，但係個泡泡隔音超勁，喺出面一粒聲都聽唔到。

怪獸都放開手，身型縮細至一個高高大大嘅正常人，著住西裝打埋條呔，青靚白淨，仍然靚仔：「終於，都拉到佢。」





少女微笑，向靚仔遞起一個手指公。然後去篤篤個泡泡，拉出一個電話筒，同入面嘅後生仔講：「而家唔係事必要你講，除非你想講。但係你所講嘅一切，將會成為呈堂証供。」

「放我出去呀 XX ！」後生仔仍然激動。

「同你講聲先，入面有錄音㗎，唔好講粗口。到時加咗刑，唔好怪話我冇話你知。」少女笑笑口咁收返埋個電話筒，問靚仔：「佢最憎咩色？」

靚仔又篤吓個泡泡，成個泡泡變咗透明粉紅色：「呢隻。」

後生仔接受唔到自己俾人拉咗，仲要喺個粉紅色泡泡入面，崩潰咁勁爆粗：「我 XXXX ！你條 XX 拉還拉！做乜 X 困我喺個咁姣屎燉篤嘅 XX 波入面？我 X 你個 XX 大XX呀！ XX XXX！快 X 啲放我出去！唔係我 XX 到你行唔 X 到！」

少女望一望入面發晒癲嘅後生仔，心都涼埋：「立咗大功，你可以再減刑喇。」同靚仔相視而笑，互相擊掌。

靚仔指一指門口出面，喺出面條街，行咗冇幾遠嘅阿暉：「咁佢點？」

「我哋要搵埋佢返去。」少女望一望破爛不堪嘅七仔：「不過要執返呢度先。」