《我條命剩返三十日？！》: 《我條命剩返三十日？！》28

《我條命剩返三十日？！》28

日期：ERR 404　　時段：ERR 404
死亡倒數：ERR 404

——————

阿暉一手握住門柄，另一手握住張抽獎咭，手心冒汗，仲有少少震。突然間覺得，個膊頭好重，好重嘅責任感直接壓喺身上。

「嗰個女仔升中三咋。」後生仔講嘅時候，留意住阿暉嘅反應。





『咁細個⋯⋯』阿暉內心好掙扎，但係救個女仔，大隻佬就要死。

「嘩，咁樣擒上去砸住佢。」後生仔突然做埋現場評論員，不過聲線就冇高低、情緒起伏：「哎吔，俾人踢開咗。」

雖然後生仔語氣極度平淡，但係都聽到阿暉心跳加速，情緒亦都開始激動起嚟。

「佢又再衝前去，捉實對腳喇，今次應該走唔甩。」

阿暉試吓沉住度氣，當聽唔到，但係後生仔較咗部機出聲。





「唔好呀！嗚⋯⋯救命呀！停手呀！」女仔好驚，一路喊一路叫。

「收聲呀𡃁妹！再 X 嘈捉你返去慢慢 X ！我 XXXX 吖！」大隻佬把聲好惡好大聲，仲冚咗佢一把。

「嗚⋯⋯唔好呀⋯⋯放手！放手呀⋯⋯」女仔喊到好慘烈：「唔好呀——！」

呢一刻，阿暉再忍唔住，要爆喇：「 我 X ——！」

後生仔都俾佢嚇一嚇，然後又露出微笑，迎接喺門口，怒氣沖沖咁衝返嚟嘅阿暉。





「駛唔駛、有咩代價、先換到呢三年？」阿暉喺櫃面，好大力咁放低咗張A獎抽獎咭，激動到心跳快到嘭嘭聲，呼吸都唔多暢順。

「呢個送㗎嘛。」後生仔熄返部機嘅聲，開始喺部機度入資料。

「我換！」阿暉呢一刻，真係正義感爆棚到，佢覺得自己給變咗正義超人：「快 X 啲！」

「多謝幫襯。」

「快 X 啲呀！咪 X 講嘢！」

後生仔喺個遊戲機度繼續撳撳吓，俾阿暉檢查人名同時數，確認兌換：「啱就打個手指模，呢度。」

阿暉將手指公放喺螢幕上面，遊戲機發出「咇」一聲。





「得未？」阿暉好心急。

「攪掂。」後生仔俾咗個ok手勢：「恭喜你多三年命。」

「個女仔點？」阿暉都係關心個女仔多啲：「 XX 入咗未？」

「無可奉告。」後生仔指一指阿暉隻手：「仲有一張，換唔換埋佢？」

「可唔可以話我知？」阿暉個樣好誠懇：「唔該你吖。」

後生仔望一望阿暉，搖一搖頭：「你咁心軟，唔係一件好事，好蝕底。」

「快 X 啲話我知呀！」阿暉激動到抆住後生仔嘅前臂：「XXXX！你講唔 X 講呀 XX！」

後生仔處變不驚，拉開佢隻手，一啲同情心都冇：「你聽日睇新聞咪知。」





阿暉帶啲激動咁放手，個心仲係好囉囉攣：「XXXX XX XX XXX！」

「唔換就走啦，記得要換嘢就返嚟搵我。」

阿暉踢咗一下個櫃枱，發洩憤怒，然後頭也不回咁離開七仔。