《我條命剩返三十日？！》: 《我條命剩返三十日？！》27

《我條命剩返三十日？！》27

日期：ERR 404　　時段：ERR 404
死亡倒數：ERR 404

——————

阿暉嚇到只得夠發出「呀！呀——！」咁嘅叫聲，腳仔軟都企唔到起身，喺個地度撐撐吓。

後生仔行埋佢身邊，踎喺佢隔離，一臉冷漠、目無表情：「唔駛咁驚喎，我唔會食咗你。」





阿暉聽到佢嘅言下之意，就係要殺咗佢咁：「你⋯⋯你唔會食咗我啫⋯⋯但係你會消滅我吖嘛⋯⋯」

「駛鬼我親自郁手，你都就嚟死。」後生仔坐喺阿暉嘅前面：「同你做個交易。」

阿暉見到佢笑都唔笑吓，又記得嗰個阿婆好似係佢條𡃁，佢又親手殺咗阿婆，真係唔知信唔信得過：「咩交易？」

「跟我做嘢，每完成一個任務，就有一張咭，可以延長你條命。」後生仔喺背後拎咗頂帽出嚟，戴喺頭上，變返一個普通嘅七仔收銀員。

「啲咭係，抽嘅？」





「係，保底有一個月命。」後生仔舉起一隻手指：「你今次真係好好彩，可以攞返三年命。」

「我都未做任務，點解你要俾我？仲要兩張？」

「試玩版。」後生仔拍拍阿暉嘅膊頭：「覺得好玩咪繼續。」

阿暉腦入面高速運算：「要做咩㗎？」呢個世上邊有免費午餐，但係好似有返啲生存機會：「犯法嘢我唔做㗎。」

後生仔冷笑咗一下：「你諗你喇。」然後拎包煙，抽咗一枝煙出嚟。





「即係要殺人？」阿暉中學時期係有群埋啲壞同學，但係最多都係蝦吓人，打吓人，但唔會去到要攞人命：「我唔得㗎！」

「睇你點定義。」後生仔吸咗一啖煙，再噴出一團煙霧。

阿暉唔知佢呢句有啲咩隱喻，正想吸口氣開口問嗰陣， 唔小心吸埋啲煙，濁親咳咗幾聲。

後生仔見佢喺咳，再用力索多兩啖煙，向住阿暉狂噴。

阿暉再喪咳多幾吓：「咳！咳咳！喂⋯⋯」

「廢柴。」後生仔擔住口煙，行返去收銀櫃位。

阿暉咳住咁企起身，跟住佢行去櫃位：「呢兩張係咪可以兌咗先？唔駛做任務？」





「係。」後生仔即刻成個面口變晒，由目無表情，變成官方微笑。

阿暉拎埋另一張抽獎咭出嚟，開埋佢，中咗個H獎：「呢個係？」

「一個月。」後生仔整熄咗手上枝煙，然後拎部遊戲機出嚟篤篤吓，遞俾阿暉睇：「兩張，分開揀兩個人。揀咗三年嗰個先。」

「兩個人？」阿暉睇到個螢幕上面，有三個並排嘅方框，同頭先一樣，好似睇緊閉路電視咁，見到有個人喺度郁郁吓。不過今次睇得好清楚嘅係，方框下面有人名、姓別、年齡、出生及死亡日期。

仲有一欄，好吸引阿暉嘅眼球，就係一行眨吓眨吓嘅紅色日期，寫住咗減咗一年之後嘅「更新死亡日期」。

「你呢個係咩意思？」阿暉都唔係蠢，即刻知道發生緊咩事，想確認吓自己諗嘅係咪真。

「你覺得係咩意思，就係咩意思。」後生仔仲好好咁推薦阿暉，指住最中間嗰個：「諗唔到揀邊個？可以揀佢，呢個人奸淫虜掠乜都做齊。」

阿暉望住個螢幕，見到嗰個人嘅正面。嗰個人三十幾、四十歲，見到佢膊頭有啲肌肉，好大隻咁，帶住兇狠嘅眼神，露出淫邪嘅笑容，面容猥瑣。





畫面嘅背景，係一個好似後樓梯咁嘅地方，暗暗地。仲有幾次，佢企咗喺身，再向前趴低。畫面係極度唔穩定，好似打緊交咁。

後生仔較光少少個螢幕，仲將嗰格變做全螢幕：「睇唔睇到？」

阿暉見到一個關鍵性畫面，就知道大隻佬一定唔係打緊交。因為佢見到間中會有隻腳，喺大隻佬個頭邊出現，又會踢到佢個膊頭。嗰隻腳，著住白短襪、黑皮鞋，明顯係掙扎緊。嗰個大隻佬，捉實隻腳唔準佢郁，佢仲伸埋條脷出嚟，喺度舔隻腳。

「要唔要開聲聽？」後生仔又變返黑面，目無表情。

「唔駛唔駛。」阿暉勁搖頭，唔想見証住一啲慘不忍睹嘅事情，眼神避開螢幕，唔睇落去，望住後生仔：「我⋯⋯唔想睇。」

「你揀咗佢，佢就會變負數，即場暴斃。」後生仔收返起部機：「咁當然，你會蝕咗半年。」

「唔好攪我。」阿暉搖搖頭，佢唔想殺人，一手拎走張抽獎咭，調轉頭向門口走過去，當自己冇睇過。





後生仔提高啲聲線：「咁你要唔要救個女仔？趁佢仲未做到最後一步。」