《我條命剩返三十日？！》: 《我條命剩返三十日？！》26

《我條命剩返三十日？！》26

日期：ERR 404　　時段：ERR 404
死亡倒數：ERR 404

——————

阿婆冇變異，仍然係細細粒嘅阿婆一個，但係面上嘅刀疤開始變紅，仲識發光咁，好似溶岩咁閃閃吓。佢再怒吼一聲，就開始刮起一陣強風，好似疫情前嗰個超強颱風「山竹」咁勁。

氣溫亦都突然驟降，體感溫度得返攝氏五度，凍到阿暉棚牙喺度震騰騰羅拔臣。貨架都冧咗幾個，加上吊喺天花上面嘅宣傳牌吹到揈揈吓，啲報紙、雜誌沙沙聲咁周圍飛，啲燈仲喺度閃閃吓。





『嘩！乜料？ XX 唔 X 係世界末日吓嘩？』阿暉見唔對路，再走遠啲，去到飲品雪櫃前面，諗住開門匿入去。不過呢間七仔唔係呢個設計，雪櫃貨架唔識郁，要行倉門入雪櫃先有掟匿。但係個倉門喺阿婆嗰邊，加上打到差唔多十號風球咁，企都企唔穩，一定走唔到入去。

「我 X 吖！點 X 算呀？」阿暉坐咗喺地下，挨住牆角，用手檔住風過嚟嘅嘢：「呢鑊真係死 X 得！」

阿婆已經跳咗落地，無懼颱風咁行埋阿暉度，任由紙張打喺佢身上，聲底都變得再沙啞啲，一步一步向住阿暉行過去：「XX 俾返張咭我！」

就喺阿暉驚到剩係識坐喺度嘅時候，有一道強光照喺阿婆身上，好似spotlight咁。好掁眼，阿婆都失咗少少型格，咪埋少少對眼，望向後面：「邊 X 個 XX 照 X 我？」

入口嗰度門嗰邊，有個黑影，慢慢愈嚟愈大，變成一個人影：「阿婆，你夠鐘喇。」





阿婆轉身向住人影，喺側旁求其擸一把長遮，擺晒戰鬥甫士咁，無所畏懼咁指住個門口：「嚟吖！我唔 X 怕你㗎！」

「你過咗鐘喇，邊個叫你唔睇住時間。」人影愈嚟愈清𥇦，但係背光問題，仲未見到個樣。

阿婆突然仰天長「笑」：「你唔好 X 以為我咩都唔係 X 知呀，你都係同我一 X 樣㗎咋！ XX ！」

阿暉愈聽愈覺得奇怪，唔明佢哋喺度講緊咩，不過睇嚟佢兩個肯係有牙齒印，都係繼續匿埋著數啲：『呢兩條友真係分分鐘打 X 起上嚟⋯⋯邊 X 度有得匿埋呀 X 。』

人影行到去阿婆面前，好輕易就拎走咗佢把摭：「你有排都未去到我呢個級數，你唔好唔記得，你條命都係我俾你。」





阿暉終於見到人影個樣喇，佢就係之前收銀嗰個後生仔：「呀！真係佢呀 X ！」

阿婆仍然惡屎能登咁同佢講：「咁又點 X 樣？我都可以收𡃁嘅啫 XX！」

「你？下世啦。」後生仔遞一遞手，強風停咗，周圍飛緊嘅紙張、雜物都跌埋晒落地。啲燈正常返，唔再閃，成間七仔一片狼藉，好似打完杖咁。

阿婆窒咗一下，但仍然好似佢惡晒咁：「咩、咩呀！你咪 X 蝦我七老八十呀！XXX 你掂 X 到我，我都告 X 你非禮呀！XX！」

後生仔行到去阿婆面前，明顯高佢兩頭，俯瞰咁望住阿婆。冇出聲都嚇到阿婆開始驚驚地：「你、XX 咪亂 X 嚟呀！我唔 X 驚你呀！」

後生仔將隻手放喺阿婆個頭頂上，阿婆想走但係走唔切，喺度慘叫。然後，阿婆就由腳底，開始慢慢灰飛煙滅，渣到冇剩。

阿暉嚇到就嚟瀨屎，呢個後生仔應該唔係人嚟，一定要盡快啲離開呢度！





微風吹走啲細灰，吹到去阿暉度，佢忍唔住咳咗兩下。後生仔跟住啲聲嘅方向望，見到阿暉，就眼掘掘咁望住佢，向住佢行過去。