《我條命剩返三十日？！》: 《我條命剩返三十日？！》25

《我條命剩返三十日？！》25

日期：2024年8月18日　　時段：晚上
死亡倒數：13 ＋ N 日

——————

阿暉嗱嗱臨去完個廁所，走返去頭先嗰間七仔度，諗住換獎：「唔該，我中咗獎。」

店員係一個姨姨：「呢個？唔係我哋㗎喎。」





「我頭先喺度買嘢嗰陣，另外一個同事俾我㗎。」阿暉特登行回頭路，返嚟呢間七仔。

「而家做緊Hello Mimi 微波爐玻璃兜喎，我冇見過呢個。」店員姨姨指一指收銀機前面嘅宣傳立牌：「廿蚊一個印花，八個印花加四十八蚊就可以換一個。」

「吓？」阿暉望望宣傳，百思不得其解，又問阿姨：「咁⋯⋯我呢個⋯⋯？」

「唔係呢度㗎。」店員姨姨有啲唔耐煩：「你係咪買嘢俾錢呀？唔係就唔好阻住後面啦。」

阿暉望一望後面，真係有好多人排緊隊俾錢，有啲人望吓望吓，「做乜攪咁耐」咁嘅樣。





「買嘢上前吖唔該。」店員姨姨同後面講。

阿暉喺間七仔入面打咗個百鴿轉，睇吓周圍有冇貼住手上呢張抽獎咭嘅有關宣傳。間七仔又細又迫，行咗兩轉都唔見有，所以都係走人先。

離開咗間七仔之後，諗諗吓，記得之前都好似有過一張，唔知有冇抌咗。佢拎個銀包出嚟，左摷摷，右摷摷，喺一疊單入面，搵到一張抽獎咭。拎住兩張對比吓，果然係一模一樣。

阿暉回憶吓呢張咭係點得返嚟：「呀！就係入院嗰日！」佢記得見過個後生仔兩次，兩次都有事發生：「頂吖，毛筒都棟 XX 埋！」最衰頭先買嘢嗰陣，冇留意個收銀員個樣，但隱約記得，應該係個男仔嚟。

佢好心急咁走去巴士站搭巴士，返去公司附近嗰間七仔，睇吓見唔見嗰個後生仔。佢深信，條命去到月尾呢單嘢，一定關嗰個後生仔事。





落咗車之後，阿暉一枝箭標入七仔。企喺收銀機前篤緊機嘅，唔係嗰個後生仔，而係一個細細粒、臉上面有兩條刀疤嘅阿婆。

阿暉氣來氣喘，上氣唔接下氣咁，走去佢面前問佢：「唔該，我中獎，呢度係唔係可以拎獎？」

阿婆望一望佢，用低沉嘅聲音問：「你中咩獎？」

「A獎。」阿暉拎咗張抽獎咭出嚟：「呢個。」

阿婆望咗兩眼，嘆咗一口氣，死氣沉沉咁講：「估唔到喺你度。」

「吓？咩喺我度？」

「你拎咗我張咭。」阿婆接過張A獎咭，喺收銀機隔離拎咗一部遊戲機出嚟，對住張A獎咭，好似輸入緊啲嘢入去咁：「好彩搵得返。」





阿暉見阿婆咁講，有啲淆，喺未攪清楚發生咩事之前，佢都係即刻拎返張咭先：「咪住先，你係邊個？」心跳不斷加速，呢件事一啲都唔尋常。

佢見到阿婆手上嘅遊戲機，螢幕上面有一堆唔識嘅文字，睇得明嘅只係得數目字。佢仲見到阿婆而家個樣，著嘅衫褲，甚至連表情，都係同而家一模一樣，同步進行緊、閉路電視咁。仲有啲個人資料，佢注意有一欄係寫咗日期，用咗紅色字，眨吓眨吓。

「 X 你俾 X 返張咭我。」阿婆語氣變得急燥：「我未 X 入完！」

「呢張咭係我㗎喎！」阿暉見阿婆想伸手搶佢張咭，即刻揸實張咭，褪後幾步：「你唔好 X 亂嚟喎！」

阿婆河東獅吼咁怒吼一聲，跳咗上收銀櫃上面，準備再撲向阿暉咁嘅甫士：「俾返我！」

阿暉嚇到鼻哥窿都冇肉，跑走幾步，匿埋咗喺個貨架後面：『XX！佢會唔會變 X 咗做異形㗎？』