《我條命剩返三十日？！》: 《我條命剩返三十日？！》24

《我條命剩返三十日？！》24

日期：2024年8月18日　　時段：晚上
死亡倒數：13 ＋ N 日

——————

處理完張小姐嘅索償申請，阿暉一個人喺條街度遊盪，漫無目的咁行嚟行去。佢接受唔到阿叔無啦啦走咗，明明阿叔入去做手術嘅時候，精神好到爆炸，老虎都打死幾隻。

咁啱放工時間，好多人喺條街度。等巴士嘅等巴士，去行街嘅去行街，返屋企嘅返屋企。佢開始喺度諗：如果呢堆人搭唔到巴士呢？又望吓啲路人：如果佢地行行吓，上面有嘢冧落嚟呢？又望吓對面入緊大廈嘅人： 如果佢地返唔到屋企呢？





～（音樂）
如果　命運能選擇
十字街口你我踏出的每步更瀟灑
如果　活著能坦白
舊日所相信價值不必接受時代的糟蹋
～

『有冇咁 X 啱呀 X？』阿暉行過地鐵站出口，有人喺度街頭表演。有個後生仔彈住個結他，好忘我咁投入演唱。有人喺度錄影，有人喺度一齊唱，亦都有好多人掂行掂過。





首歌唱咗一半，阿暉竟然企喺度聽埋後面嗰半。比著平時，一定喺度話啲人走音，又唔好聽，然後走咗去。

今日，呢個後生仔，真心唱得幾好。副歌嘅第一句，好中自己而家呢一刻嘅感受。佢都好想，有得揀，唔好咁快死。

唱完喇，有零碎嘅掌聲。後生仔向觀眾點個頭，然後就轉下一首歌。阿暉好少聽歌，淨係會識最出名嗰幾首。聽咗兩句，好似冇聽過，然後就走咗喇。

離開好嘈嘅環境，肚餓喇，佢行咗去附近嘅七仔。行去飯團個櫃，見唔到有減價飯團，又冇晒十蚊飯團。佢拎起咗一個二十蚊嘅飯團望咗兩吓：『唉。都係算。』

佢放返低個飯團，去咗雪櫃拎咗嘅半打啤酒，再拎咗兩包薯片。少有地俾咗五毫子，買咗個膠袋，一個人拎住袋嘢，行去海旁坐。





對住個海，心情好似舒服啲。咁啱呢個鐘數，啱啱咗開始幻彩詠香江，呢個激光匯演做咗咁多年，佢都冇認真咁睇過。開咗罐啤酒，開咗包薯片，欣賞吓啲閃燈。

飲咗個幾鐘，半打啤酒，飲到急急地。趁文化中心未閂門，快手快腳執嘢去借個廁所，順便抌垃圾。

一路行一路睇吓個膠袋入面仲有冇嘢未食完，摷兩吓，見到一張抽獎咭。好似一番賞嗰啲咭仔咁，有個虛線方框，仲有個位俾你揭開。但係上面嘅字，阿暉睇極都睇唔明：『咩嚟㗎？』

阿暉都係冇理啲字，揭開咗張咭仔，見到個好大隻嘅「A」字時候，忍唔住：「哇！ X ！唔 X 係呀嘛？咁 X 好彩？」