《我條命剩返三十日？！》: 《我條命剩返三十日？！》23

《我條命剩返三十日？！》23

日期：2024年8月18日　　時段：下午
死亡倒數：13 ＋ N 日

——————

食完晏，阿暉執齊文件，上去客人嘅屋企。

佢去到一個私人屋苑，撳門鐘。有一位面容憔悴嘅女士出嚟開門，年紀應該大阿暉幾年，三十幾可能就嚟四十歲咁上下：「龔先生，麻煩你了。」





阿暉除鞋入屋，低頭就見到隻襪腳趾公嗰度穿咗個窿，腳趾公凸咗出嚟少少：『呀⋯⋯ X ⋯⋯』即係縮起隻腳趾公，扮冇事咁搵個公文袋遮一遮，順便喺入面拎裝住帛金嘅信封交俾客人：「張小姐，節哀順變。」

「有心。」張小姐接過信封，露出一閃而過嘅微笑，帶阿暉去飯枱坐低，斟咗杯水俾俾佢：「要你專登上嚟唔好意思，因為要湊小朋友，仲有好多嘢要處理。」

「唔緊要，最緊要係方便你。」阿暉坐低咗，拎咗啲文件出嚟，同張小姐解釋賠償流程：「呢張申請表我哋而家要填咗先，之後有啲咩文件要補交，我再寫張list俾你。」

「好嘅，唔該。」張小姐表面上好沉靜。

阿暉填好咗張小姐啲個人資料後，就去到最痛心嘅階段，就係填死者資料。除咗個人資料呢啲基本嘢之外，仲要問埋佢死因、最後主診醫生等等資料。





『佢會唔會喊㗎？』阿暉打開嗰版，遞到張小組面前：「呢個部份，你先睇睇。」

張小姐望多兩望，真係控制唔到難過嘅情緒，喊咗出嚟。

阿暉唔知點算好，唯有喺紙巾盒掹張紙巾俾佢：『頂，烏鴉嘴講中咗添⋯⋯』

張小姐接過紙巾：「唔好意思。」然後就衝咗入咗房。

阿暉望到佢咁嘅反應，聯想到自己屋企人。到時，唔知佢哋會唔會都係咁傷心呢，定係會好快冇事？





喺等緊張小姐返嚟嗰時，有個六、七歲嘅男仔走到阿暉身邊，篤吓佢隻腳趾公：「哥哥，穿咗窿呀。」

阿暉即刻收埋隻腳：「係呀，著錯咗。」

「咁點解你唔換嘅？」小朋友好熱心：「我有兩對新襪呀，送一對俾你吖。」

「哈哈，唔駛喇，我遲啲會買。」阿暉心諗呢個：『呢個細路咁 Q 趣致嘅，三九唔識七，做咩送對襪俾我？』

「哥哥可唔可以同我玩呀？」

阿暉笑笑口咁對住佢：「好呀，你想玩咩？」

小朋友放低手上嘅咭，再跑去自己地盤嗰度拎咗部藍白色嘅機過嚟。阿暉都同佢一齊坐喺地下，幫佢開咗部機。





小朋友拎咗其中一張咭，放喺部機度，就會自動出聲：「A Lion. This is a lion.」小朋友就跟住一齊讀：「A Lion. This is a lion.」佢掹吓阿暉隻手：「哥哥都要一齊讀呀。」

「好。」阿暉心諗：『乜而家啲細路興玩呢啲㗎？英文咁 X 高級。』

「你揀一張。」小朋友俾咗幾咭阿暉揀。

阿暉隨手拎咗一張，小朋友就放喺部機度，兩個人跟住部機一齊讀：「Happy. Mickey mouse is happy.」「Afraid. Pluto is afraid.」「Sweating. Donald duck is sweating.」

如是者玩咗一陣，張小姐出返嚟，同個小朋友講：「軒軒，唔好阻住哥哥，你自己玩住先。」然後轉頭同阿暉講：「唔好意思，我哋繼續。」

「唔會唔會。」阿暉返去頭先個位坐好：「醫生資料、進行死因研究及解剖呢幾個部份，可需要你填一填。呢部份基本資料，我可以幫你完成，想借一借你爸爸張身份証。」

「好嘅。」張小姐俾咗身份証阿暉，然後就開始填表。

「唔該晒。」阿暉接過張身份証，望到張爸爸張相，呆住咗。





有一個熟口熟面嘅身影浮現咗出嚟，著住病人衫，仲隱約好似聽到有把聲同佢講：「XXXX 禾吔鹽 X 多過里吔米呀 XX。」

阿暉心突然空咗一下：『佢咪係⋯⋯隔離床個阿叔？』