《我條命剩返三十日？！》: 《我條命剩返三十日？！》21

《我條命剩返三十日？！》21

日期：2024年8月17日　　時段：中午
死亡倒數：14 ＋ N 日

——————

星期日，阿暉忽發奇想，傳訊息去「我們這一家」群組，約阿爸阿媽去飲茶。

「轉死性呀你？飲茶？」阿媽錄音恥笑緊阿暉：「咁得閒不如你去開個易拉架，睇吓開唔開到單啦。」





「打牌。今日贏梗。」阿爸就打咗幾粒字。

阿暉唯有無奈咁放低個電話，都好嘅，可以搵阿妹去行街，睇吓啲BB嘢，準備吓。

「今日有冇唔舒服？」阿暉同阿妹去到百貨公司，喺賣嬰兒用品嘅地方行嚟行去。

「最近日日都嘔。」阿妹今日精神唔錯：「尋晚去廁所洗嗰個桶，爭啲俾阿媽發現。」

「不如，我哋早啲同阿媽講。」阿暉怕自己走咗，就冇人撐阿妹。





「等遲啲，個B穩定咗先。」阿妹拎起一盒嬰兒衣服套裝：「呢個好靚呀，你話係咪？」

阿暉拎起隔離對鞋仔：「襯埋呢個幾好睇。」

「嗯！」阿妹心情好似幾好：「遲啲知道係男仔定女仔嘅時候，就可以買喇。」

佢地又行到去賣BB床嗰區，阿暉喺度玩緊吊喺床上面、揈揈吓嘅玩具：「要唔要買BB床？」

「呢張咁大，我間房唔夠位放，要買張細啲。」阿妹扁住嘴：「呀，遲啲佢大個咗，屋企就唔夠位喇。」





「可以瞓我間房呀，成間房俾咗佢啦。」阿暉講完之後個心噏咗一下。

「咁你瞓邊呀？瞓廳咩？」阿妹笑笑口：「定係你識咗個女朋友，要搬出去住？」

「唔係，咁大個咗就換張碌架床，男仔就同我瞓，女仔就同你瞓囉。」阿暉即刻改口，唔好露出破綻。

阿妹好開心咁繞住阿暉手臂：「阿哥真係好，咁錫佢。」

「我成副身家俾晒佢都得呀！」阿暉好似講笑咁講真。

「係咪連你啲寶貝高達都送晒俾佢先？」

「啱嘅咪攞埋去，」阿暉其實真係好心痛，無論係對阿妹，定係啲高達：「阻埞嘅，咪抌咗佢⋯⋯」





「你話㗎，唔好反口呀。」阿妹吱吱喳喳咁：「書枱都霸埋你嘅。」

「好呀。」

阿暉真係好想可以陪阿妹耐啲，好想可以睇到姨甥仔出世，好想可以生存得耐啲，好想好想⋯⋯