《我條命剩返三十日？！》: 《我條命剩返三十日？！》20

《我條命剩返三十日？！》20

日期：2024年8月15日　　時段：黃昏
死亡倒數：16 ＋ N 日

——————

「我⋯⋯冇去過喎。」阿暉俾佢咁樣問一問，真係驚到出汁：「會唔會係我前排昏迷咗，半隻腳踏入咗嗰類？」

「係你踏入過，所以先昏迷。唔好撈亂咗個次序。」雨婷爸爸一望就知佢發生過咩事。





雨婷被一言驚醒：「唔怪得啦，佢只係唔小心撠親腳跌低，又冇撞親頭，咁都昏迷咗幾日。原來係因為咁⋯⋯」

雨婷爸爸行到阿暉面前，示意佢起身，然後圍住佢行咗個圈，打量佢全身。用手指點吓佢塊面，又撩起pat陰：「睇你雙目無神，印堂發黑。唉！命不久矣。」

「你講真㗎世伯？」

「叫我陳師傅。」

阿暉即刻改口：「陳師傅，點樣可以化解？」





「有啲難攪，你俾人攪過你把火。」

「老豆，」雨婷又加把口：「你知唔知把火點解有兩隻色嘅？」

「有股神奇嘅力量，喺你膊頭度轉移緊。但係是好是壞，呢個就⋯⋯」陳師傅面有難色：「俾你嘅出生年月日、時晨八字我，幫你起個卦睇睇。」

雨婷已預先準備好，寫咗落張紙度：「呢度。」

陳師傅望一望雨婷，又啤一吓阿暉：「你兩個係咪拍緊拖？」





「唔係呀！」雨婷又笑吓阿暉：「佢未拍過拖，所以唔想死住。」

「唔係就得啦。」陳師傅心裡面嗰句：『幾驚你同個短命種拍緊拖呀，唔係就最好。』

阿暉耍手兼擰頭：「唔係唔係。」

「喺度等我一陣。」

阿暉同雨婷就繼續坐喺梳化度等。

陳師傅拎咗張紙仔，走埋去卜卦個壇度，拎住個龜殼，一路搖一路喺到依依吟吟。倒完啲銅錢出嚟之後，又塞返入龜殼，好似調酒師咁繼續搖個殼。

如是者，幾次之後，陳師傅又喺神壇度拎咗幾張紙出嚟燒，攪咗好多嘢。





阿暉細細聲問雨婷：「係咪好難攪呀？我今次係咪死梗喇。」

「冇事嘅。」雨婷開咗包薯片食，遞俾阿暉：「大不了咪死。」

阿暉都拎咗幾塊放入口：「嘩，你人仔細細睇化晒嗱？你唔驚嘅咩？」

「人終雖一死，爭在遲定早。只要唔係好痛苦咁走，我就心滿意足喇。」

陳師傅返返嚟，喺佢面前攤開張紙仔，倒咗啲灰去紙嘅正中間，然後左摺摺右摺摺，摺成一個正方形，再用線繞好。遞俾阿暉：「袋住佢，隨身攜帶，暫時可以幫你擋住煞先。」

「唔該陳師傅。」阿暉收好個小摺紙喺銀包：「有冇啲咩可以做到？」

「我查咗幾次你個命格，但每次都有啲唔同，理論上係唔會咁。」陳師傅坐低，飲啖茶：「我只可以同你講，有咩想做，你就去做啦，後生仔。」

「老豆，係咪真係冇得攪？」雨婷好少見爸爸會放棄。





「我唔知你得罪咗邊度嘅神明，好明顯，係有兩個大神喺度角力緊。你條命，而家就係喺佢哋手上。」

「咁點算？」雨婷望望阿暉，眼前呢個人好快就要離開，忽然有啲傷感。

「即係唔係撞鬼？」阿暉接受唔到，喺自己身上發生啲咁嘅事，捉住陳師傅雙手：「陳師傅可唔可以幫吓我，求求你！」

「我嘅法力，都係經過修行，神明賜俾我。」陳師傅嘆一口氣：「我真係無能為力。」

「陳師傅，你一定幫到我㗎，你試吓吖。」阿暉爭啲要跪喺地上面，淨係諗到留低阿妹喺世上，佢就好擔憂：「我唔想死住。」

「你好自為之喇，好好享受埋最後嘅日子。」陳師傅飲埋最後一啖茶，拍拍阿暉個膊頭：「或者做多啲好事，神明自然會救你。」講完就企起身，轉身離開客廳：「婷，送客。」

「師傅⋯⋯」經陳師傅咁樣一講，阿暉心情即刻跌落谷底。





8月31日，就係到期日！只係剩返兩個星期咋！