《我條命剩返三十日？！》: 《我條命剩返三十日？！》19

《我條命剩返三十日？！》19

日期：2024年8月15日　　時段：黃昏
死亡倒數：16 ＋ N 日

——————

阿暉跟住同事雨婷，又稱神婆，去佢爸爸個工作嘅地方。佢哋去到旺區嘅其中一幢唐樓，雨婷開咗地下嘅鐵閘，帶阿暉行樓梯上去：「二樓。」

「嘩，點解個工作室要開喺呢啲咁陰濕嘅地方嘅？又冇燈，又漏水。」阿暉啱啱踩到個水氹，啲水彈到少少個褲腳：「好恐怖咁。」





「日久失修啫，盞燈壞咗好耐都冇人整。個業主立案法團形同虛設，有得於冇，淨係識收錢。」雨婷笑阿暉好細膽：「有冇咁驚呀你？」

「我邊有驚啫！」阿暉講得大聲少少，可以掩飾恐懼。

「其實呢度好旺㗎，樓下有髮型屋，樓上有人夾band。」

「有冇一樓一先？」阿暉諗住攪吓笑，等自己可以輕鬆吓。

「你啱？」





「問吓啫。」

「呢度冇呀，隔離街就有幾竇，要唔要帶你去埋嗰邊？」雨婷哈哈大笑，笑聲好有魔力。

阿暉會忍唔住，同佢一齊笑：「頂你咪玩啦，我而家都唔知仲有冇命可以識女仔。」

佢哋到咗二樓，雨婷用鎖匙開咗鐵閘，再開埋木門，向住屋入面大叫：「老豆，我帶咗個朋友嚟喇。」

「爆緊石呀，你等陣。」有一把男人聲喺某一間房度傳出嚟，中氣十足。





屋入面開住燈，就好似普通屋企咁，有飯枱、茶几、梳化、電視櫃嗰啲。不過就有個比較大嘅神枱，成間屋都飄住浸元寶蠟燭香嘅味，阿暉聞到有少少濁親，咳咗幾吓。

雨婷斟咗杯水俾阿暉，坐低咗喺梳化：「唔知你想唔想知，不過我都想話你知，頭先有嘢跟住你。」

阿暉嚇一跳：「唔係呀化？」

「走咗喇。」雨婷輕鬆回應：「佢冇跟到入嚟，唔駛怕。」

「跟住我做咩？」阿暉凝住係嗰個天使少女：「你見唔見到樣？」

「見唔到，但係我見到嘅好奇怪嘅嘢。」雨婷眼仔碌碌，諗咗一諗。

「咩呀？」





「你把火時大時細咁，好似好旺盛，但又好似好弱雞咁。」雨婷停頓咗一下：「仲有，我唔知我有冇睇錯，佢好似攪緊你把火。」

「我係咪真係時日無多？」阿暉唔知算好：「係咪要寫定遺囑？」

「唔駛啩我估。」雨婷都係樂觀派，覺得爸爸會攪得掂。

呢個時候，雨婷爸爸走咗出嚟，一望到阿暉，招呼都未打就同佢講：「𡃁仔，你係咪去過嗰度？」

「吓？」阿暉完全冇印象：「邊度？」

「地獄。」