《我條命剩返三十日？！》: 《我條命剩返三十日？！》18

《我條命剩返三十日？！》18

日期：2024年8月12日　　時段：晚上
死亡倒數：19 ＋ N 日

——————

夜晚返到屋企，阿妹即刻拉咗阿暉入房，帶住責怪嘅語氣：「阿哥，你做乜話佢知呀？」

「我睇唔過眼，佢點可以咁對你㗎？」





「我就係唔想佢知。」阿妹有啲嬲阿暉。

「你知唔知呀？」阿暉壓低嘅聲線，以免爸媽喺出面聽到：「佢嗰個狐狸精都有咗呀。」

阿妹停咗一下，然後話：「我知呀。」

「你知？」阿暉驚訝：「咁點解，你唔⋯⋯？」

「佢出得去滾，咁即係個女人緊要啲啦。」阿妹講吓，真係有啲心痛、唔捨得。





「而家你唔緊要咩？你都好緊要架喎！」

「出軌呢樣嘢，只有零次同無限次。」阿妹有啲唔舒服想嘔，喺床邊坐低咗：「就算佢留低，都只係為咗個仔。咁有咩意思？」

「咁你由得個B冇爸爸？」阿暉唔想阿妹咁就一世。

「有咩問題？」阿妹堅持己見：「我唔會搵返佢。」

阿妹乾嘔咗一下，阿暉即刻喺側邊想搵啲嘢兜住。但阿妹已經快快手拎放喺床邊、一個細細地嘅桶，對住個桶嘔。





「你冇嘢嘛？」阿暉冇呢啲經驗，手忙腳亂唔知要點算好：「要唔要紙巾？要唔要水？」

阿妹嘔咗少少嘢出嚟，順手拎起床邊嘅紙巾抹抹嘴。阿暉就拎咗個水樽遞俾佢：「仲要啲咩？」

阿妹搖搖頭，抖順條氣：「冇喇。」

「你想⋯⋯幾時話俾阿媽知？」阿暉拉咗張櫈坐喺旁邊，有啲擔心唔知屋企人點睇：「你知阿媽啦，佢好要面㗎嘛，佢一定叫你落咗佢。」

「所以咪要話你知先囉。」阿妹笑笑口：「萬一我要俾人趕出屋企，你會撐我㗎嘛。」

「梗⋯⋯梗係啦！駛乜講！」阿暉其實自己都身不由己，因為好快就到死期，不過唔可以俾阿妹知住。

「咁就好喇，BB出世之後有舅父錫。」阿妹繼續講將來嘅事：「你話BB係咪要跟返我哋姓呀？我唔想佢跟個衰人姓。」





「好！一於係咁！知道係仔定女未？」

「未呀，過多兩個星期啩。」

「係唔係要去做檢查定咩？我可以偷走出嚟陪你。」

「唔駛啦，我自己去得㗎喇。」阿妹性格雖然好獨立，但係聽到阿哥咁撐佢之後，真係好開心，放低咗一嚿心頭大石。

阿暉都知道自己係阿妹嘅精神支柱，點都唔可以俾自己死住。佢決定要去搵神婆個爸爸，睇吓自己有冇得救。