《我條命剩返三十日？！》: 《我條命剩返三十日？！》15

《我條命剩返三十日？！》15

日期：2024年8月11日　　時段：黃昏
死亡倒數：20 ＋ N 日

——————

阿妹收到消息，知道阿暉醒返，收工之後即刻嚟到醫院探佢。阿妹真係好興奮，一入到病房，就開籠雀咁吱吱喳喳，係咪攬住阿暉隻手喺度搖：「阿哥，你醒返真係太好喇！你幾時出院呀？」

「呢度啲病床唔夠用，醫生話冇咩就聽朝就可以出院。」





「聽朝呀？」阿妹拎個電話出嚟睇時間表，然後扁晒嘴：「我唔得閒呀⋯⋯要返工⋯⋯」

「唔緊要啦，我自己攪得掂。」

「咁你咪好慘？阿爸阿媽又唔得閒，得返你一個。」

「得㗎喇，冇問題喎。」阿暉精神都算幾唔錯，係攰少少咁啫。

「我有啲嘢要俾你睇呀！你咪埋眼先啦！」





阿妹成日都古靈精怪，阿暉心諗住佢一定係準備咗出院禮物，笑笑口咁咪埋眼：「你唔好整蠱我呀。」

「唔會啦，你會好開心㗎！」阿妹拎咗一張咭仔放喺阿暉手上：「得喇！」

「係先好講。」阿暉慢慢擘大眼，見到手上面，有一張4R相咁嘅嘢，幅圖係一大撻白色咁，仲間有個黑色圈，黑色圈中間有一個細細嘅白灰色嘅圓形。阿暉睇到眼都突埋：「喂⋯⋯你⋯⋯」再望真啲，幅圖上面有幾行睇唔明嘅數字。但佢都好肯定，係一張超聲波相。

「你做舅父喇！係咪好開心呀？」阿妹笑住口咁講。

阿暉望住阿妹嘅笑容，喺佢眼中，阿妹仲係好細個㗎咋。而且佢啱啱大學畢業，前途無限，而家嚟整個細路出嚟？阿暉真係笑唔出，口噏噏咁：「阿朗你個 XX 死仔包吖⋯⋯我 XXXX 攪大我個妹個肚？」





「你唔開心咩⋯⋯？」阿妹收起笑容，佢以為阿哥會係支持自己，唯一一個。

阿暉望望阿妹，勉強笑出嚟：「嗯。你哋幾結婚呀？」

「我哋⋯⋯分咗手⋯⋯」阿妹耷低頭，唔係好敢望阿哥。

「乜話？」阿暉晴天霹靂：『我 X 你個XX XXX！𡁻完鬆你個 XX？攪 X 大人個肚不特止，仲要唔 X 負責，咩 XX 男人嚟？！ XXXX ！』

「我想生佢出嚟。」阿妹抬頭望住阿暉，好肯定咁講：「我一個人都可以養大個BB。」

「阿妹，你諗清楚未？」阿暉知道問佢點解分手都無補於事，而家首先要說服佢唔好要個B先：「生小朋友難，養大佢更難。你要湊佢，邊有時間去做嘢？」

「我⋯⋯可以返part time，而家做緊free lance畫圖，都可以搵到食。」





「生細路呢件事，唔係你想像中咁易㗎。」

「我去返多幾份工，實得㗎。」

「冇多個人幫你分擔，你會好辛苦。」阿暉比較傾向佢唔要個B：「唔係喇，我覺得你不如⋯⋯」

「我唔濟呀！」阿妹開始眼泛淚光：「個個都叫我落咗佢，但係我唔要呀⋯⋯」佢企起身，拎起阿暉隻手，放喺自己個肚上面，喊住咁講：「佢而家就喺入面慢慢長大緊喇⋯⋯」

阿暉停咗一下，拉住阿妹慢慢坐喺床邊。佢知道阿妹個心而家一定好亂，唔知點算。

「我唔想⋯⋯落咗佢呀⋯⋯」阿妹開始喊出嚟。

阿暉用力攬住佢，輕輕咁拍佢背脊：「阿哥撐你，唔駛驚。」

然後阿妹就一直喊，喊到收唔到聲，將呢個月所累積起嚟嘅負面情緒，一次過發洩晒出嚟。