《我條命剩返三十日？！》: 《我條命剩返三十日？！》14

《我條命剩返三十日？！》14

日期：2024年8月11日　　時段：中午
死亡倒數：20 ＋ N 日

——————

過兩日，阿暉終於都醒返，側邊圍住阿爸阿媽阿妹，兩、三個中學同學，仲有幾個同事。佢地都因為阿暉醒返而好雀躍：「醫生醫生，病人醒咗喇！」「你終於都醒返喇！」「真係太好喇！」「阿暉你見點呀？」「下次行路小心啲呀，唔好再碌落樓梯喇。」

佢哋會一個一個咁行埋阿暉度，拍吓佢、又攬吓佢咁，仲有人開心到喊添。





「係呀，我醒返喇！」阿暉好開心，估唔到有咁多人嚟探自己：「我⋯⋯」突然阿暉覺得有啲唔妥，點解佢哋個個都喺度笑到見牙唔見眼咁，心諗：乜佢哋有咁關心過自己咩？

阿暉望住佢哋，慢慢收起笑容，見住佢哋一個一個咁慢慢變成透明，再慢慢消失。直至周圍空無一人，佢就喺病床上擘大眼，見到白雪雪嘅天花板同光管。再望望周圍，有同病房嘅叔叔伯伯：『我⋯⋯係咪醒咗？』

阿暉遞起手，放到面前睇睇。見到左手邊插住鹽水，仲有條病人手帶。佢放低手，覺得好攰，於是繼續攤喺張床度。

身邊一個人都冇，忽然覺得自己好空虛、有啲寂寞，兼且仲有啲凍。佢拉高張被𢫏住自己。呢個時候，隔離床個叔叔，帶有啲鄉音同佢講：「後生仔，里終依都死咗喇？」

「吓？」阿暉咳咗兩下，太耐冇飲水，喉嚨有啲乾痛：「咩話？」





「禾話，里死咗呀 XX。」咁啱有個姑娘喺病房出面行過，阿叔就大大聲咁同姑娘講：「呀二號床個哥仔死 X 咗呀。」

「咩話？」有個姑娘急急咁行埋嚟，見到阿暉醒咗之後，就淡定返，同阿暉講：「哦，你醒咗喇，我話俾醫生知。」臨走前仲同阿叔講：「你啲鄉音真係嚇死人。仲有呀，呢度醫院嚟，唔好講咁多粗口。」

阿叔哈哈大笑：「姑liang仲嘜笑 X 人禾，粗口真係巧 X 難戒㗎嘛 XX。 」

「阿叔，你知唔知，我瞓咗幾耐？」阿暉想搵啖水，但係身邊冇水杯或者水樽。

「你條 XX feng咗考多 X 日喇，禾入來咁 X 耐，里就feng足咁 X 耐，都唔願死嘅 XX。」





阿暉想撐起身坐好，搵吓電話、飲杯水咁。但係佢就俾阿叔喝住：「喂 XX！里唔考 X 亂 X 嚟郁。」

阿暉真係定住咗，望住阿叔走落床，拎起床側邊個遙控掣，幫佢將張床調起上半部：「里度巧 X 先震㗎 X，張chuang曉唔 X 同方位，東難絲北咁 X 多。咁 X 樣feng係咪好 XX 施服呀 XXXX？」

「唔該⋯⋯」阿暉好佩服阿叔雖然有鄉音，但係粗口就正到飛起。

「里個 XX 慢慢feng呀 XX。」阿叔較完阿暉張床，又走返上玩自己張床，示範俾阿暉睇唔同嘅模式：「里碌 XX 睇吓，張chuang係咪巧 X 巧玩呢？ XXXX 不過而果有 X 埋晏摩功能就正過 XX 喇。」

「呀，係呀係呀。」阿暉其實又想走落床郁動吓，但係阿叔係咁不停同佢分享自己嘅嘢，例如屋企人、自己嘅病情、第二日要做嘅手術等等，機關槍咁係咁講、係咁講。

阿暉搵唔到位停佢，唯有好無奈咁瞓喺度應酬吓佢。