《我條命剩返三十日？！》: 《我條命剩返三十日？！》13

《我條命剩返三十日？！》13

日期：2024年8月9日　　時段：早上
死亡倒數：22 ＋ N 日

——————

阿暉一直維持住喺「植物人」呢個狀態好幾日。開頭， 都有掙扎吓，想要出好多力咁郁郁吓。可惜，郁多幾次，佢就知道無補於事。無論佢郁幾大力，都係醒唔到，亦都冇人發現到。於是，第一日郁咗頭幾個鐘就放棄，唔再掙扎。

佢記得自己喺八月頭遇過一個少女，話自己瓜老襯嘅日期係八月底。第二次見到佢，淨係記得拖過佢隻纖纖玉手，後續發生咗啲乜嘢，全部都唔記得。





阿暉推斷唔到自己「昏迷」咗幾耐，淨係知自己「醒」咗大概兩、三日。距離八月底，而家仲有幾多日？佢真係無從稽考。試過偷聽吓隔離左右，或者姑娘嗰啲對話，咁啱得咁橋，全部都冇提及過日期，就連星期幾都冇講過。

呢幾日，佢自己諗咗好多嘢，人生走馬燈咁。如果就咁攤喺度，攤到八月底就咁瓜咗，自己有啲咩放唔低，會有啲咩遺憾？

回想起自己畢咗業之後嘅生活，都真係幾唔如意。返工又俾人恰，屋企人又睇佢唔起，朋友又唔多個。佢突然間，覺得自己可有可無，喺呢個世上浪費緊地球資源。

以前啲舊同學，叫做熟少少嗰幾個，都陸續結婚生仔、升職移民。個個都有晒自己嘅家庭、事業、美好生活。好似淨係得返自己一個，仲係勞勞碌碌咁做嘢、混混噩噩咁過活。

好似，喺呢個世界上，冇人在乎自己。




好似，喺呢個世界上，冇嘢值得留戀。
好似，喺呢個世界上，可以從此消失。

喺意志消沉，諗住就咁攤到埋單就算嘅時候，佢突然諗起：『呀，唔係喎。仲有阿妹。』

阿妹細阿暉七年，啱啱大學畢業，一邊做兼職一邊搵緊長工。

阿暉雖然未至於係妹控，但係佢都好錫阿妹。屋企冇乜錢，阿爸做看更，阿媽做酒樓洗碗，所以佢先至去做保險，開到單就有較高嘅收入，可以供阿妹讀大學，俾佢住宿舍享受大學生活。

而家唯一唔放心嘅就係阿妹。佢淨係想，可以喺臨死前醒到幾日，見到阿妹同佢交帶吓啲身後事，咁樣就算死都死得眼閉啲。仲有特別任務，就係要開返個電腦，刪除晒D drive入面啲檔案，免得俾人摷到出嚟啦，唔係就尷尬死。





佢心裡面一直祈求住，可以見返嗰個話自己係天使嘅少女。因為佢知道，少女一定可以幫到佢。

『天使呀天使，你可唔可以幫吓我？』