《我條命剩返三十日？！》: 《我條命剩返三十日？！》12

《我條命剩返三十日？！》12

日期：2024年8月6日　　時段：黃昏
死亡倒數：25 ＋ N 日

——————

『呢度係邊度？』阿暉想擘大雙眼，但係眼皮好重，開唔到眼。佢淨係feel涼涼爽爽嘅氣溫，聽到有啲嘟嘟聲，仲有消毒藥水嘅味道：『X ，唔 X 係瓜咗吓嘩？』

阿暉成個人係攤平咗喺床度，手手腳腳好似痺痺地咁。佢就郁啲手指，想活動吓。郁多兩郁，就聽到有人講話：「阿哥你醒喇？」





『阿妹？』阿暉再掙扎多幾吓，又試吓撐大眼。

點知說時遲那時快，隻左眼俾人用兩隻手指強行撐大咗，然後一嘢強光刺入眼：『喂！我 X 你！咩嚟？』

好快到右眼，再一嘢強光：『做咩呀 X！好 X 痛呀隻眼！』用盡力起飛腳攻擊。

然後聽到阿妹把聲：「醫生，阿哥隻腳好似郁緊呀。」

跟住阿暉對腳就俾人按摩咁款，撳吓撳吓。又屈吓、又伸吓；又拎起、又放低，仲打腳板底。





『我 X 你個 X！痛㗎！咁 X 大力！』阿暉俾人打完腳板底後，仲要俾人當公仔咁嚟舞去：『你咪 X 恃住自己係醫生，就可以打 X 人呀！我投訴你㗎 XX！』

「阿哥係咪就嚟醒返喇？」

「呢啲係好跡象，繼續觀察住先。」

「好嘅，唔該醫生。」阿妹坐低咗，捉住阿暉隻手，把聲有啲想喊咁：「阿哥你要快啲醒返呀⋯⋯」

『喂，你阿哥我咪生勾勾喺度囉！』阿暉聽到啲鼻水雪雪聲，個心都有啲急：『你唔係喊緊係咪呀？係咪有人蝦你？等我去幫你教訓佢！』





阿妹喺度飲泣，雖然阿暉唔知佢喊咩，不過就係咁同佢講嘢、安慰佢。可惜，阿妹一粒字都聽唔到。

阿妹喊咗陣，好快就收拾心情，然後就同阿暉講：「探病時間完喇，我後日day off再嚟過。你要快啲醒返呀。」

阿暉開始意識到，自己真係瞓緊喺醫院。頭先應該係醫生檢查瞳孔同身體機能：『我係有意識嘅，但係郁唔到。咁即係⋯⋯我而家係植物人？唔 X 係啩？！！』