《我條命剩返三十日？！》: 《我條命剩返三十日？！》11

《我條命剩返三十日？！》11

日期：ERR 404　　時段：ERR 404
死亡倒數：ERR 404

——————

喺呢個咁危急、兩個人就嚟開片嘅時候，度門又「咇——」一聲打開咗。少女一入嚟見到靚仔的起咗阿暉，下一步就係會撻死阿暉，即刻大聲喝停靚仔：「停手！」

靚仔望一望少女，然後一手將阿暉掉落梳化，青筋消退：「係佢撩起我把火先。」





阿暉嚇到上氣唔接下氣，要定定神先。

「忍一時風平浪靜。你知你而家孭咗幾多條喺身㗎，咪亂嚟。」少女喺牆上面又摸咗幾吓，「嘟嘟」聲，然後「唧」一聲。

「Sorry。」靚仔回復原本個靚仔樣，坐喺另一張梳化度，整理吓啲條呔同衫褲。

「不過我一早估到佢會攪到你咁嬲，唔記得提提你。」少女歎口氣、搖搖頭，將手頭下一份文件放喺佢手上：「唔好理佢住喇，你睇咗呢個先。」

靚仔打開一望，擘大個口、難以置信咁速讀文件：「吓？」然後再速讀幾次：「真係要咁？」





「嗯。」

「咁樣做，係可以將影響減到最低。但係⋯⋯」靚仔又皺起眉頭。

「佢揀咗邊個選擇吖？」

「佢揀唔到。」

「咁咪係囉。」





「咁⋯⋯」

「嗯⋯⋯」

阿暉抖返順條氣，見到少女同靚仔，兩個一齊欲言又止咁望住自己，凝住有啲唔好嘅事要發生咁：「喂呀，咩事？係咪關我事？」

靚仔冷笑咗一吓，向後挨喺張梳化度，一幅唔關佢事咁嘅樣。

少女就黑口黑面咁，喺牆邊用腳細細力踢咗一下，然後就喺牆度其中一個粉紅色嘅長方形度，拉出一張摺櫈。單手拎住摺櫈條鐵腳，行埋阿暉度。

「喂喂！唔好亂嚟！」阿暉即刻一招鯉魚翻身，跳咗去梳化後面，超驚少女會用張史上最強武器——摺櫈嚟攻擊自己，淆晒底：「咪呀你！」

少女見到阿暉嘅反應，大笑起嚟，然後打開咗摺櫈，坐低咗。





阿暉真係嚇到鼻哥窿都冇肉：「我叫你一聲阿姐喇，唔好玩我啦。」

「坐低啦，我哋係嚟幫你㗎。」

「唔駛坐，」阿暉仍然踎喺張梳化後面，好似安全好多：「我喺度聽得喇。」

少女縮縮膊頭，又笑咗一吓：「好啦，咁你聽住喇。」

「你可以返去，今日冇事發生過。」靚仔接答。

「吓？乜話？」阿暉懷疑自己聽錯。

「你可以返去，今日冇事發生過。」少女答多一次。

「玩呀而家？又話要改期，又話有唔同選擇。攪咁多嘢，而家你話我知咩都冇發生過？」阿暉難以置信，根本就係俾人玩。





靚仔同阿暉講：「上頭話你揀唔到，幫你決定咗。」

「唔 X 係啩？喂呀！」阿暉接受唔到：「攪 X 錯呀？」

靚仔即刻伸直條腰，目露兇光咁。

少女捉住靚仔隻手，制止佢發惡，然後同阿暉講：「請你收吓你把口。」

「乜⋯⋯」阿暉見到靚仔個反應，即刻聯想到佢可能係粗口過敏症：『乜呢度啲人咁 X 純潔嘅？係唔 X 係呀？』跟住繼續嬲嬲地嘅語氣：「唔係喎，你哋有冇攪錯？開頭又話有得揀，而家又冇得揀。即係點呀？」

「上頭見到你啱啱嘅反應，判斷你已經揀咗。」少女微笑：「你三個都唔要吖嘛。」

「吓？乜、」阿暉頓一頓，改一改口：「乜呀？我都未揀。」





「你已經揀咗。」靚仔回復平靜咁講，重覆住同一句：「唔好要我哋講第三次。」

「三個都唔要唔代表我想維持原判喎。」阿暉比較關心呢樣，佢真係唔想快瓜：「咁即係我延長咗我條命未？」

「呢層⋯⋯你就當係原本嗰個先啦。」少女笑笑口咁企起身，企喺阿暉面前。

阿暉心有不甘：「咁即係點？」

少女冇答佢：「你而家會返返去，唔會記得你嚟過呢度。祝你好運喇。」

「喂！」阿暉都未反應得切，少女就喺佢個頭度敲咗一下。阿暉慘叫咗一聲：「呀——！」然後就眼前一黑，冇咗知覺。