《我條命剩返三十日？！》: 《我條命剩返三十日？！》10

《我條命剩返三十日？！》10

日期：ERR 404　　時段：ERR 404
死亡倒數：ERR 404

——————

入到去一間房仔，有一張枱白色圓形矮枱放喺中間，側邊嗰兩張單人梳化，睇落去好似好舒服咁。然後就乜都冇喇，阿暉爭啲以為自己入咗審犯房。好在四幅牆都用咗七彩繽粉嘅牆紙，間房睇落都冇咁㝰、冇咁冷漠。

阿暉坐喺其中一張深綠色嘅梳化度，真係軟淋淋咁，坐得好舒服。





「我要出一出去拎返啲文件先，你坐吓先，一陣會有另一個天使入嚟搵你。」少女臨走前叮囑阿暉：「你千祈唔好周圍走開呀，入咗異界你就係咁先㗎喇。」

「好。」

阿暉一個人等咗一陣，拎電話出嚟睇吓。點知收唔到訊號不特止，個畫面仲唔識郁添，淨係可以著吓熄吓個螢幕。

等到悶悶地，佢就企咗起身，學吓少女咁用手指篤吓牆紙上面啲圖案。冇反應。佢又試吓唔用兩隻手指咁，擘大啲圖案。都係冇反應。

阿暉唔係好奮氣，走咗去個門度，用手指喺度掃掃吓。





突然「咇」咗一聲，阿暉心諗：『哇 X ！係唔 X 係呀？真係天才呀我！咁 X 易就開到。』佢又掃多次，個門又「咇咇」咗兩聲。阿暉心裡面讚歎緊自己聰明才智嘅時候，個門「咇——」咁就自動打開咗。

然後有個人走咗入嚟，著晒西裝打晒呔，高高大大，青靚白淨幾靚仔咁：「你好，你係龔志暉？」

阿暉尷尷尬尬咁走返埋去梳化度坐，唔好俾人知自己樣衰咗，所以同人懶係熟咁：「係呀，等你好耐。」

靚仔冇自我介紹，一嚟就坐低，喺枱面上放咗三張紙：「呢度三個選擇，你睇吓你想要邊個？因為天機不可洩漏太多，所以淨係俾個大概你睇吓。」

A）35歲結婚，38歲生囡，40歲升做主任，45歲終身殘廢。往後保密。




　　總結：卧病在床，兒孫滿堂
B）33歲結婚，36歲離婚，43歲中合彩頭獎，44歲患重病。往後保密。
　　總結：與病同行，富裕人生
C）32歲結婚，34歲生囝，36歲離婚，41歲破產。往後保密。
　　總結：潦倒一生，獨子孝順

阿暉望望吓，好似有啲唔對路：「點解冇一個係好結局？」

「點為知係好結局？」靚仔問返佢轉頭。

「應該係結婚生仔，工作升職加人工，兒孫滿堂，幸福咁安詳完結人生。」阿暉講出自己想要嘅選擇，喺三張紙上面指嚟指去：：「可唔可以咁？呢度照去『35歲結婚，38歲生囡，40歲升做主任』，然後到『43歲中合彩頭獎』，再到呢個『兒孫滿堂』。」

「你真係想咁？」靚仔皺一皺眉：「諗清楚好喎。」

「係呀，得唔得呀？」阿暉異想天開，好興奮。





靚仔深深吸咗一口氣，再呼出嚟：「咁樣，你最後會仲慘。」

「咁樣點會仲慘呀？不知幾幸福。」阿暉真係未出發先興奮：「你諗吓喎，有個老婆有個囡，仲有錢，兒孫滿堂。」

「天機不可洩漏太多。」靚仔語氣深長，兩隻手自己十指緊扣住，兩隻食指粒骨頭頂住下巴：「總之，我已經幫你幫到盡，呢三個係最好嘅選擇。」

「點會呀？殘廢喎、重病喎。」阿暉皺晒眉頭：「我唔想變成咁。」

「你可以揀 C 。」靚仔語氣仍然平靜。

「破得產都唔慌好得去邊啦！」

「天機不可洩漏太多。」靚仔冇讓步：「你只可以揀呢三個其中一個。」





「X！你講 X 嚟講去都係得呢句，有冇攪 X 錯呀。」阿暉開始發嬲：「而家係你哋整錯咗我個死亡日期呀，俾返啲好日子我過吓都好啩！」

「系統出錯咗，我哋都唔想，已經盡力補救。」靚仔語氣突然變得強硬。

「補乜 X 嘢救呀，你咁樣係補救到啲乜 X 嘢呀？」

「至少你有得揀吖，邊有人可以揀自己嘅人生？」靚仔唔耐煩咁回應。

「XX 得呢三個選擇，係唔 X 係呀？」阿暉一諗到自己以後嘅人生，就好似紙上面寫嘅咁，真係揀唔落手。一時衝動，走埋去靚仔度，捉住佢衫領，好嬲：「你哋班 XX 憑乜 X 嘢決定我嘅人生？」

靚仔好快速咁捉返住佢隻手，好惡咁同佢講：「如果你想過幾個星期就埋單，咁你咪唔好揀囉，冇人迫你㗎。」

「放手呀你條 XX ！」：阿暉感覺到靚仔隻手好熱，再唔縮手就會焫親：「快 X 啲放手呀！XXXX！」阿暉另一隻手，想拉走靚仔隻手。

但係靚仔異常咁大力，掹走阿暉喺自己衣領隻手，仲慢慢將阿暉成個人吊起咗，塊面開始爆青筋，面目變得猙獰：「我唔放，咁又點？！」





阿暉用腳不斷踢靚仔，但可惜唔夠腳長，踢唔到：「呀！X！」