《我條命剩返三十日？！》: 《我條命剩返三十日？！》09

《我條命剩返三十日？！》09

日期：ERR 404　　時段：ERR 404
死亡倒數：ERR 404

——————

入咗去星星屋之後，阿暉同少女並肩而行。少女同阿暉講：「手續好簡單㗎咋，會問你幾個問題，你照直答就得。」

「會問嘅咩㗎？」





「都係你平時遇到嘅事，循例問吓、確認吓身份嘅啫。」

佢哋經過一個公園，仲有好多獨特形狀、顏色鮮艷嘅遊樂設施。阿暉望入去，見到有好多人喺入面，有男有女、有老有嫩，啲小朋友仲玩得好開心：「嗰啲人，全都係要嚟改日期？」

「佢哋？」少女跟住阿暉望嘅方向，但係冇停低腳步：「佢哋喺度等緊出生文件，就快投胎喇。」

「即係話，我曾經都喺度玩過？」阿暉對呢度完全冇印象。

「冇錯。人死咗之後，會被消除呢一世嘅記憶，然後喺度等下一世。」





呢個時候，有個細路女走咗埋嚟，攬住咗阿暉隻小腿，眼睛汪汪咁抬頭望住阿暉。

「呃⋯⋯」阿暉停低咗腳步。

少女踎低，同個細路女用阿暉聽唔明嘅語言對話：「小朋友，唔可以隨便走出嚟㗎，盪失路就搵唔返你㗎。」

「爸爸！」細路女好唔開心咁攬住阿暉，想喊出嚟，成泡眼淚咁：「我要爸爸呀！」

「佢唔係你爸爸。」少女摸摸細路女個頭，安慰佢：「乖囡，返返入去先。」





「嗚⋯⋯」細路女忍痛咁慢慢放開手，喊住咁揮揮手同阿暉道別，然後返返去公園入面。

「佢⋯⋯」阿暉都同佢揮揮手，想問少女關於細路女啲嘢：「佢係邊個？做乜事喺度喊得咁淒涼嘅？」

但係少女擺明拉開話題，指住前面樓梯：「呢度上一層就係。」

「我想問，頭先個細路女，我識佢？」阿暉感應到自己同個細路女，好似有啲連結咁。

「一陣上到去等叫名，然後簽返份同意書就得。」少女仍然冇回應阿暉嘅提問，帶住佢上樓梯：「因為係我哋呢邊出問題，所以你有權揀返某一啲設定。」

「設定？」阿暉硬係覺得呢個字，用得好奇怪。

「睇吓一陣個天使俾啲咩選擇你，」少女微笑住：「你可以揀你之後嘅人生，好似幾好咁喎。」





但阿暉就有啲疑惑：『真係好咩？』