《我條命剩返三十日？！》: 《我條命剩返三十日？！》08

《我條命剩返三十日？！》08

日期：ERR 404　　時段：ERR 404
死亡倒數：ERR 404

——————

「唔⋯⋯」阿暉忍住啲感歎詞：「唔係啩。」

「千真萬確。」少女帶阿暉經過咗幾揀樓，但係好奇怪，周圍一個人都冇。





「其實呢，」阿暉想問好耐：「你上次話俾我睇嗰本嘢，我可唔可以睇多次？」

少女喺個圓形小斜孭袋度，拎咗本簿出嚟：「你講呢個？」

阿暉點吓頭，想睇多次入面寫乜。

少女打開本簿，上面寫住阿暉個名、性別呢啲個人資料，仲有最底，寫住「死亡日期：2024年8月31日」。

「就係呢個喇！」阿暉好激動咁指住最底：「咁即係點？過多幾個星期我就會死？」





「你暫時係呢日死。」少女笑笑口咁望住阿暉：「你係咪想長命啲呢？咁你想長多幾多日？幾多年？」

「呃⋯⋯」俾佢咁樣問一問，阿暉都唔知點答佢，淨係知自己唔想死住：「長命啲咁囉。」

「其實咁嘅，我係負責debug嘅天使。」少女帶住阿暉繼續行，經過無數個店鋪：「因為系統錯誤，你個死亡日期出咗錯。我哋而家就係去幫你改返你個官方死亡日期。」

「出錯咗？咁都錯得？」阿暉開始覺得成件事好兒嬉咁。

「其實都真係好唔尋常，我哋內部仲調查緊邊度、邊個位出錯。不過見你就嚟到期，所以要帶你嚟，親身改返啱個期先。」佢哋行入一個好大霧、涼涼地嘅地方，停低咗：「到喇。」





啲霧慢慢散走，佢哋嘅眼前出現咗一間好大間、奇形怪狀、外牆七彩繽紛嘅屋仔，周圍乜都冇晒。屋仔牆身由唔好形狀嘅磗頭堆砌而成，有正方形、長方形、鑽石形、星形、圓形、五邊形、六邊形等等。屋企有一粒超大粒嘅發光星星，唔合乎地例地大，大到好似要壓扁下面咁。

佢地行到去門口，少女拎出手指，掂一掂門鎖位置，再喺門柄掃一掃筆記簿上面嘅QR code。度門其中一個長方形圖案上面顯示住『龔志暉——檔案編號 199507190730-017』。

少女指住檔案編號：「你對吓個人資料呢度係出生年、月、日，同埋出世時間。」

「我唔知我幾點出世喎。」阿暉確認出生日期冇錯。

少女再撳幾下度門，顯示器範圍加大咗，上面寫住佢直系屋企人嘅資料：「呢啲啱唔啱？」

阿暉點點頭，見到顯示器嘅字之後，開始意識到，呢件事係真嘅，唔係發夢。

「咁得架喇。」少女喺門嘅另一堆圖案上面，跣咗幾下，又撳咗幾下，然後度門就自動打開：「OK，我哋入去喇。」