《我條命剩返三十日？！》: 《我條命剩返三十日？！》07

《我條命剩返三十日？！》07

日期：ERR 404　　時段：ERR 404
死亡倒數：ERR 404

——————

跌入去坑渠嗰一刻，乜嘢臭味都冇晒，仲有啲淡淡嘅花香。離心力冇咗，好似喺空中飄浮緊咁。

阿暉見住有好多不知名嘅街道、商鋪、大廈喺側邊飛過，有啲驚會撞親。前面有一架巴士飛緊埋嚟，驚到大叫：「喂！睇住前面呀！撞喇！」





「第一次係會驚少少嘅，冷靜啲。」少女繼續向前飛。

「喂！」阿暉見住架巴士愈嚟愈大，就撞埋嚟：「X！停呀！唔好！我 X ！」

就巴士撞埋嚟嗰一刻，阿暉合埋雙眼，諗住實死冇生。點知，感到有一下寒風吹過，然後好似⋯⋯咩都冇發生過。

阿暉仲感覺到少女隻手，拖到佢實一實，慢慢擘大眼，擰轉後面，見到架巴士向後飛走，仲嚇到面青口唇白：「呀 X！咩事？我穿 X 過咗架巴士？」

佢哋著咗陸，少女就變臉，好嬲咁甩開佢隻手：「你真係好粗魯！」





阿暉窒咗窒：「吓？咩事？」

少女「哼」咗一聲：「早知就唔救你啦。」然後就調頭走咗。

阿暉望望周圍，街道都係似曾相識嘅地方，所有事物驟眼睇上嚟，基本上同平時冇咩分別。不過呢度用嘅文字，全部都睇唔明。

阿暉覺得都係保住條命仔緊要，使出一招「千錯萬錯都係自己錯」嘅絕招，追到少女面前，截住佢條路：「對唔住呀⋯⋯」

少女眼掘掘咁望住阿暉，粒聲唔出。





「係我唔好⋯」阿暉妹妹個男朋友，成日都用呢招，好容易就氹返妹妹。雖然從未喺女仔身上用過，但係基於男性體內嘅求生慾基因，佢已經覺醒咗：「我會改⋯⋯」

「改咩？」少女仍然好惡，危機仍然未解除。

阿暉其實真係唔知衰咩，但係靈機一觸，執口水尾跟佢講：「我以後唔會咁粗魯㗎喇。」

「真係？」少女瞇起雙眼，直視住阿暉。由眼神可以睇得出，少女喺度檢查緊阿暉嘅真誠度。

阿暉點個頭，問候一下，怯怯地咁講：「係⋯⋯係呀。」

「好啦，咁你記住喇，以後唔好講粗口。」少女嘅笑容又重現返。

「吓？」阿暉完全估唔到，少女竟然會係因為呢樣嘢而嬲：『我 X 吖，做乜 X 唔俾人講粗口？你係我乜 X 呀？』





少女好興奮咁撓住阿暉嘅手臂：「你話架，唔好反口。」

「好、好嘅。」阿暉唔理得咁多，應承咗先算。而家最重要，係要知道少女帶自己去邊：「呢度其實係邊度嚟？」

少女個頭上面，多咗個光環，bling bling聲咁：「呢度係天堂呀。」