《我條命剩返三十日？！》: 《我條命剩返三十日？！》06

《我條命剩返三十日？！》06

日期：2024年8月4日　　時段：凌晨
死亡倒數：27日

——————

少女帶住阿暉一路行，一路介紹沿途風景。但係阿暉覺得好奇怪，明明望到嘅係快餐店，少女就話係賣衫嘅鋪頭；明明係櫃員機，佢就話係郵筒。

阿暉開始覺得，呢個少女唔係鬼，而係一個傻傻地嘅青山走犯，諗緊係唔係要帶佢返青山。





不過咁，阿暉咁大個人，從未試過俾女仔拖住隻手：『呀⋯⋯佢隻手軟綿綿咁，好 X 正啊。』佢都輕輕咁捉住少女隻手，同佢一齊行。

望真啲少女，個樣都生得幾標緻、幾可愛，心諗：『如果佢唔係傻嘅，做女朋友都幾好吖。』

阿暉幻想完之後，即刻自扻一巴，等自己清醒啲：『醒呀 X！而家個女仔係咩目的都唔 X 知，喺度諗乜 X 嘢呀？』

繼續拖住手好似有啲怪，仲有啲尷尬。佢嘗試鬆開少女隻手，但係少女即刻同佢講：「拖實，唔好放手。」

「點解嘅？」阿暉好疑惑咁問：「其實我哋去緊邊？」





「帶緊你去天使嘅世界。」

「一定要咁樣拖住？」

「係呀，如果唔係，」少女個樣突然間陰沉咗一嘢：「你會跌咗入異界，到時永不超生，邊個都教你唔到。」

「異界？」阿暉心諗：『玩咩而家？哈利波特嗰啲呀？咁佢可能係巫師，而唔 X 係天使。』

少女點咗下頭：「捉實啲，準備。」





「準備咩？」阿暉即刻捉實啲少女隻手。

佢哋喺一個坑渠前面，少女停低腳步：「一陣會好大風，你要拖實我呀，千祈唔好放手。」

「好。」阿暉望住屎渠蓋慢慢消失，攻上嚟嘅惡臭好難頂，即刻揑住個鼻：『唔 X 係啩？唔跌死都臭 X 死。』

少女一躍而下，阿暉冇起跳，但都跟住咗少女一齊跳咗落坑渠。