《我條命剩返三十日？！》: 《我條命剩返三十日？！》05

《我條命剩返三十日？！》05

日期：2024年8月4日　　時段：凌晨
死亡倒數：27日

——————

阿暉離開咗便利店之後，睇睇手錶，啱啱走咗班車，要等二十分鐘。於是開咗個飯團，一路食一路行去巴士站。

『哇 X ，啲飯咁 X 硬，一定係雪 X 咗好 X 耐，唔係點會賣十蚊吖。』





佢好努力咁𡁻啲飯，食咗一啖，再飲多啖綠茶送飯，咁先冇咁難食。

費盡九牛二虎之牙力，終於食完一個，𡁻到個牙骹好攰。揸住枝綠茶，搓吓個牙骹，唔小心鬆手跌咗枝綠茶。

『呀 X ⋯⋯』

綠茶沿住斜路一直碌，碌呀碌，碌得好開心；
阿暉追住綠茶搏命跑，跑呀跑，跑到索晒氣。





斜路跑到一半，有個人突然喺中間出現，截住咗枝綠茶。阿暉見到嗰個人，好似係白衣少女！即刻想剎掣，不過跑得太快，剎唔到掣，左腳戟右腳，失去重心，直接撲咗上去，攬住咗少女一齊跌落地，仲碌咗兩下。變成面對面、男上女下咁嘅姿勢，爭在未嘴落去。

「哇！做咩呀你？」少女一嘢勁大力咁推開阿暉，順手扻佢一巴。

「X ⋯⋯」阿暉被扻到滿天星星，仲未load到發生咩事，淨係知邊俾人打咗一下，摸住塊面：「好 X 痛。」

「行開呀你。」少女再一腳踢開阿暉，自己企咗起身，執起咗枝綠茶，拍拍樽上啲灰塵，細心呵護，但就好惡咁同阿暉講：「枝綠茶冇得罪你啫，請你溫柔對待。」

「呀！」阿暉睇清楚啲，佢真係白衣少女，即刻跪低扣拜，大聲道歉：「對唔住呀大姐！有怪莫怪！我以後唔敢喇！」





少女望望佢，哼咗一聲：「以後唔可以咁樣碌走枝綠茶。」

阿暉聽完之後呆一呆：「吓？」冇諗過佢咁在意枝綠茶。

「我叫你以後唔準咁樣對枝綠茶。」少女個樣真係好認真。

「哦⋯⋯」阿暉順住佢意先，佢點話點好啦。

「咁就好喇。」少女笑返，走埋去伸手拉起阿暉。

阿暉企返好，望真啲，少女嘅衣著同前日見到嘅一樣，又係神出鬼沒咁，戰戰競競咁問：「你⋯⋯係人定係鬼？」

「我？」少女嘅笑容真係好可愛：「我係天使。」

「吓？」阿暉吓到下巴到就嚟跌落地。





「我係落入凡間的天使。」

「哈哈，咪玩啦。」阿暉大笑咗出嚟：『無啦啦喺度tag歌，真係忍唔 X 到笑。』

少女即刻變臉，沉默咁掘住阿暉。

阿暉意識到自己講錯嘢：「我意思係，我未見過天使，唔知你係咪真啫。」

少女面口變返好少少，拖住阿暉隻手：「你跟我嚟。」