《我條命剩返三十日？！》: 《我條命剩返三十日？！》04

《我條命剩返三十日？！》04

日期：2024年8月3日　　時段：晚上
死亡倒數：28日

——————

第二日，阿暉又喺公司做嘢，做到夜晚十點幾。

突然間，感覺到背後有一陣寒風吹過，窗前面嘅百葉簾輕輕咁郁，發出沙沙聲。阿暉打咗個冷震，成個人定住咗喺度。心諗：『唔 X 係掛⋯⋯』





佢唔敢轉身睇，合埋眼，雙手合十，喺度吟吟沉沉：「有怪莫怪、有怪莫怪⋯⋯細路仔唔識世界⋯⋯唔好攪我呀⋯⋯」

佢感到後面嘅寒氣愈嚟愈凍、凍個範圍愈嚟愈大，好似有啲嘢愈嚟愈近咁。太恐怖，佢直頭聲都唔敢出，靜靜地等，睇吓會唔會嗰啲嘢會自己走咗去。

「我燒多啲金銀衣紙俾你吖⋯⋯」阿暉繼續喺度吟吟沉沉：「俾條路我行吓⋯⋯」

沙沙沙⋯⋯百葉簾係咁keep住郁，佢就係咁等、係咁等。唔知等咗耐，總之就好漫長：「唔好呀，我唔想死住⋯⋯」

過咗好耐，終於俾佢等到，背後嘅寒氣消失咗，百葉簾都停咗落嚟。





阿暉驚驚青青咁慢慢擘大眼，眼掃視吓成間辦公室，一個人影都冇。

終於都鬆一口氣，拿拿臨開始執嘢拎袋，心諗都係快啲返屋企好啲。

落到公司樓下，經過間七仔，又見到嗰個返工時間喺度打機嘅後生仔。雖然阿暉唔係太鍾意佢，但係見到有生勾勾嘅人，好過見到其他不知名嘅嘢。

阿暉自己到估唔到，竟然會想同佢講嘢：「呀，又見到你。」

後生仔啤一啤佢，眼神完全流露住嫌棄，完全冇啋佢，繼續喺個收銀機前做自己嘢。





阿暉即刻後悔，而且充滿尷尬。佢快步走去雪櫃前面，拎起兩個特價飯團，仲有一枝平價綠茶。再慢速咁行去收銀機，默默咁放低啲嘢食。

後生仔粒聲唔出咁，帶住煩厭嘅嘴臉，幫佢嘟機。

阿暉覺得自己已經得罪咗佢，驚驚地咁拎個銀包出嚟準備拍咭。

「要唔要抽獎？買多四蚊。」後生仔語氣平過太平洋。

「唔駛喇唔該。」

後生仔冇理阿暉嘅答案，喺旁邊拎咗粒珍寶珠，再拎一張抽獎咭出嚟，喺部機度嘟。

「呃⋯⋯我⋯⋯唔要⋯⋯」阿暉想阻止佢。





後生仔冇停到手，但係啤咗佢一眼之後，將貨品連埋張抽獎咭推俾阿暉：「三十個二。」

阿暉唔太敢出聲，要硬食嗰粒四蚊嘅珍寶珠。好貴，但衰怕事。 快快手拍完張八達通、將啲嘢放入袋，然後就急急腳走。