《我條命剩返三十日？！》: 《我條命剩返三十日？！》03

《我條命剩返三十日？！》03

日期：2024年8月2日　　時段：早上
死亡倒數：29日

——————

阿暉雖然好驚，但又無家可歸。結果要喺公園張長櫈度瞓，又凍、又餓、又驚咁捱過咗一晚。

到天光，打咗個乞嗤，索吓鼻水，然後再伸個懶腰，長歎一聲：「呀 X ——頂你個肺，張櫈咁 X 硬⋯⋯」





瞓得太差，條腰，仲有啲手手腳腳、全身都有啲痛。下次都係行返屋企算喇。

睇睇錶，而家只係七點幾。

「唉，返公司先算。」

阿暉當自己發咗個惡夢，當自己時運低，見到啲唔乾淨嘅嘢，千祈唔好放喺心上。返公司叉吓電、洗個面。

話雖如此，人腦真係好神奇。愈係叫自己忘記，嗰樣嘢嘅印象就愈深刻，簡直係揮之不去。嗰個少女個樣，一直喺阿暉嘅腦海裡面飄嚟飄去。成日凝住有人望住自己，明明門口嗰邊冇人，都會覺得有人企喺嗰度。攪到周身都唔自在，開始心煩氣燥。





同事陸續返到去：「咁早呀？」「咁頹點見客呀你？好心梳吓個頭啦。」「咁先叫型吖嘛，你冇見過咩？哈哈。」「佢個個月都攞第一㗎喎。」「由尾數上吖嘛。」「幾個星期冇單開都仲坐喺度，唔出去搵客。」「人哋攞底薪都夠食㗎喇，我哋知條鐵咩。」

單單打打嘅說話，阿暉其實已經免疫，通常只係求其應句「早晨」就算。但係今日真係好燥底，又唔夠瞓。費事同佢哋嘈，唯有當啲人冇到，扮聽唔到就算數。

全公司唯一一個可以叫做朋友嘅，就係坐隔離嘅神婆盧雨婷。有神婆之稱，係因為佢屋企做相關行業，專門幫人睇相、卜卦、擇日子嗰啲。

有一次佢起咗個壇喺公司，然後公司即刻開咗幾單大生意。自此，全公司迷信嘅人都當佢神咁拜，有咩諸事不順、頭暈身㷫都搵佢睇睇。

佢份人冇乜嘢，都幾易話為。而且對啲職權嘅嘢都冇興趣，只求有份工做住先，然後搵個金龜婿嫁咗佢。





「早晨呀阿暉。」雨婷同平時一樣，每日都充滿笑容咁打招呼。

「早晨。」阿暉終於見到人畜無害嘅熟人，心情當堂好返少少。雖然有啲唔好意思，但係佢都開咗口問佢：「想問吓你，有冇200蚊借俾我增值？」阿暉雙手合十，當佢神咁拜：「我冇錢返屋企，唔該你。」

雨婷二話不說咁就喺銀包度，拎咗200蚊俾佢：「做乜咁窮呀？」

「糧尾吖嘛，用晒啲錢喇。今個月又冇單開。」阿暉雙手拎錢：「出糧俾返你。」

「得啦，唔駛喇。」雨婷突然神色凝重咁望住阿暉：「你膊頭啲火，好似就熄咁。你冇嘢吖嘛？」

「膊頭？」

「嗯，呢度。」雨婷指住阿暉個左邊肩頭，就係尋晚俾少女拍咗一下嗰邊。





阿暉突然周身毛管戙，由腳板底戙到上頭頂：「你⋯⋯真係見到㗎？」

「尋日都唔係咁弱嘅。」雨婷疑惑咁行前幾步，摀低身睇真啲：「你做咩嚟？」

「話說呢，我尋晚撞鬼⋯⋯」阿暉細細聲同佢講少女嘅事。

雨婷一邊聽，一邊搖頭嘆息。

「點呀？係咪真㗎？我係咪真係會死？」阿暉好緊張，唔知見到嗰個死亡日期係真定假，又唔知點解會見到少女。

「呢個⋯⋯我都答你唔到，我唔係好識呢啲。」雨婷靈機一觸：「不如帶你去搵我爸，佢道行高啲、見識多啲，可能幫到你。」

「咁麻煩晒你。」