《我條命剩返三十日？！》: 《我條命剩返三十日？！》02

《我條命剩返三十日？！》02

日期：2024年8月2日　　時段：凌晨
死亡倒數：29日

——————

阿暉望望手錶，哇，原來已經十二點多啲！

正想跑去巴士站，趕尾班車之際，佢突然醒起：「呀⋯⋯負咗錢喎⋯⋯」





收起跑咗幾步嘅快腳，轉為絕望又沉重嘅腳步：「死啦，冇錢點 X 樣返屋企？」一邊行，一邊盤算緊，住咁遠，應該行返去定點。

佢行到去公司附近嘅綠化小公園，搵咗張長櫈坐低。碌吓電話，睇吓會唔會有人救到佢。點知，拎個電話出嚟碌兩碌，電話突然就變咗黑mon，熄咗機。

「X ！唔 X 係啩？」阿暉撳住個開關掣，乜反應都冇。佢又拍吓部電話，又chok吓部電話。當然，部電話繼續冇反應。

做咗成日嘢，俾人玩咗成日，再加上又餓又眼瞓，個人開始燥燥地，喺度鬧部電話：「又話續航力有10個鐘，而家要搵人先 X 嚟冇電，你係咪玩 X 我呀？」

「部電話都冇得罪你，請你溫柔對待。」一把女聲，喺個電話發出嚟：「唔準講粗口。」





阿暉以為部電話識應佢，嚇到連電話都飛走埋。

「仲要掉走埋，你真係好粗魯！」

「電話⋯⋯識⋯⋯講嘢嘅⋯⋯？」阿暉望住飛到十米外嘅電話，以為撞嘢，準備拔足狂奔。

「個電話唔識講嘢，係我講緊嘢。」有人拍一拍阿暉個膊頭。

「我 X！」阿暉轉頭，就望到有塊女仔嘅面，喺相隔三十厘米嘅距離，嚇到一嘢就彈開四、五米，仲要跌坐咗喺度。





阿暉見到一個身高目測1.5米、身穿白色連身短裙、黑色長靴、孭住一個細細地嘅圓形斜孭袋、帶住可愛笑容嘅少女，企咗喺佢前面。

「喂呀，細路女，」阿暉爭啲嚇破膽：「夜麻麻唔好搭人膊頭呀。」慢慢企返起身，拍拍囉柚：「嚇 X 死人咩？」

「龔志暉先生，請你尊重啲。」少女扁扁嘴，有啲唔開心：「同埋，我唔係細路女。」

「夜晚條街好多懷人㗎，你都係快啲返屋企。」阿暉上下打量緊面前嘅少女：「咦？唔係喎，你點知個名㗎？你識我？」

「係呀。」少女喺個斜孭袋度，拎咗一本A5咁大嘅記事簿出嚟：「我專登嚟搵你架。」

「我唔識你㗎喎。」阿暉好疑惑，心諗佢係咪呃錢黨嚟，拿拿臨打發佢走就算：「你都係快啲返屋企啦。」

少女行近阿暉，打開記事簿嘅其中一頁，放喺佢面前。





阿暉望到自己嘅資料寫咗喺上面：「你係私家偵探？我得罪咗邊個，要晒錢嚟查我？」

「你睇吓呢度先啦。」少女指住佢出生日期隔離嗰欄，上面寫住咗死亡日期——2024年8月31日。

「吓？」

突然，無端刮起一陣寒風，凍到打晒冷震，個少女就無情白事咁消失咗。

「喂！未講完呀！」阿暉周圍望、周圍搵吓，都唔見嗰個少女。確定自己撞鬼，雙手合十：「有怪莫怪⋯⋯」