《我條命剩返三十日？！》: 《我條命剩返三十日？！》01

《我條命剩返三十日？！》01

日期：2024年8月1日　　時段：晚上
死亡倒數：30日

——————

夜晚十一點幾，一個身穿Uniqlo西裝嘅打工仔，由一座辦公室大樓，拖住疲倦嘅身軀、沉重嘅腳步，軟弱無力咁行出嚟。

『呀⋯⋯終於都放工喇⋯⋯』





龔志暉，二十九歲，大學畢業之後，就入咗呢間無人性公司度做保險推銷員，做咗咁耐都冇乜晉升機會。成日都俾屋企人話佢冇大志，又唔俾心機做嘢，咁多年都仲係做緊生物鍊嘅最底層。但其實，佢喺公司俾人恰到上心口，又俾人搶客、又俾人跣，唔通又話屋企人知咩？咪盞佢哋擔心，唯有硬食啦。

阿暉行行吓經過間七仔，飢荒嘅感覺突然澎湃咁湧現。雖然係糧尾，但真係餓到癲咗，阿暉決定入去買啲嘢食醫吓肚先。拎咗兩個減價清貨飯團，仲有一枝又平又無味嘅綠茶，走埋去櫃檯準備俾錢。

「二十六個二，快手啲啦。」返夜更、有啲不修邊幅嘅後生仔，一邊撳收銀機，一邊睇住部電話。

阿暉拍一下八達通。

咇咇——





後生仔啤咗阿暉一眼，然後又喺電話度撳幾下：「負錢呀。」

「咁增值先。」阿暉摷摷褲袋，潛咗個銀包出嚟。入面一張銀紙都冇，只係得一堆冇用又claim唔到錢嘅單，同埋嗰張殘殘舊舊嘅八達通。

後生仔見阿暉攪咁耐，有啲唔耐煩：「點呀？你仲要唔要？」直接拎起部電話打機。

「呃⋯⋯」阿暉搵埋個背囊暗格位，真係一毫子都冇，仙都唔仙吓。望住兩個飯團，好肚餓，但係又冇錢喺身，都係算啦：「唔要喇，唔該。」

阿暉失望咁轉身，行咗兩步，個後生仔叫住佢：「喂，阿叔。」





『叔乜 X 呀叔？』阿暉心諗，會唔會係個後生仔見到佢咁慘，叫佢返轉頭免費請自己食飯團呢。佢停低腳步，擰轉頭，滿懷希望咁回應：「咩事？」

「唔要就擺返好佢啦。」後生仔應該輸咗鋪機，細細聲講咗幾句粗口。

『X ⋯⋯』阿暉默默咁走返埋去，拎返啲嘢返原位，然後又默默咁離開七仔。