First Fantasy 你睇我寫 - 故事創作的心路歷程與補完: 5. 關於「用字」 - 首登 20240703
5. 關於「用字」 - 首登 20240703
講到「用字」，其實就係故事寫作嘅最前線，有如一場戰爭嘅唔係用坦克定大炮定戰機嘅水平，而係戰機應該要飛到幾快、坦克嘅外殼應該要做幾厚、炮彈應該要做成幾大破壞力嘅水平。一部四平八穏嘅車，應該可以用嚟做van仔送貨，但就唔可以參加Formula One，更加唔可以溝女。到部車可以開到Formula One嘅水平，但又唔可以用嚟打仗。「用字」就係故事設計嘅最前線，係描述緊環境、人物、劇情嘅最前線。
睇過唔少故事，特別喺網上嘅故事，都係四平八穏嘅寫法，可以感覺到作者有一定文字功力，當然更加重要嘅係完全感受到作者深受台灣或者大陸嘅文學影響嚟決定用字。我唔夠膽話呢啲係優點定缺點，當然，寫到四平八穏嘅文句，係應該先當成係優點嘅。以First Fantasy嘅立場，寫故事會全力使用廣東話，又或者正確嚟講係香港話。唔會考慮先寫書面，因為First Fantasy係優先考慮內容到唔到肉，一轉成書面，就係台灣、大陸化，結果就係唔到肉。作為香港嘅作者，我主張大家將香港使用嘅廣東話入文，呢點以前Ben sir嗰啲學者都講過。特別係一啲好刁鑽嘅字，就更加應該借寫作機會將香港使用嘅廣東話好好入文。
當然，香港嘅作者好快就會發現有好多我哋每日講嘅字都唔識寫，甚至搵到好多可能真係未有嘅字詞（例子：「lur地」個「lur」字，望賜教。），但係作為香港作者，係有責任好好咁將香港使用嘅廣東話入文。至於嗰啲咩想比埋其他華文社區嘅讀者睇嘅諗法，其實都應該先寫香港嘅語言，再翻譯咁去做。呢度希望First Fantasy 可以堅持做到，可能讀者會發現偶有錯失，請大家多多包涵。不過，好老實講，First Fantasy其實中文文字功夫一向麻麻，如果大家有睇First Fantasy嘅畫作，偶然會加入設計文字，或者會留意到呢點。不過正正就係因為我呢個中文咁差嘅人都堅持寫廣東話，所以大家，嗰啲比我寫得更好嘅香港作者都應該可以做到。
另外，好明顯嘅係，香港作者深受香港文化中學，以至所謂公開試，以前叫會考，而家叫DSE 嘅風氣影響，寫文好偏執幾個我覺得係毛病嘅位。第一，標題過份清晰。基本上已經好高水平咁用一句說話講咗個故事出嚟，包括人物關係、成個背景。呢個做法除咗有可能係受日本輕小說嗰啲一句好長嘅標題影響之外，更加有可能係受公開試影響。請注意，公開試係因為考試，試題有責任將標題寫得清晰嚟避免誤會、爭抝，並唔係試範緊一個標目嘅標準寫法。除咗公開試、輕小說嘅影響之外，以甜故嘅範疇嚟講，就係深受日本AV嘅標題影響喇，呢度嘅影響甚麼決定咗大部份當代香港甜故嘅內容同範圍，有啲偏離咗「用字」，暫時唔講。第二，香港嘅中文公開試亦令人誤會一篇文嘅標準長度，純論創作，故事係無長度標準嘅。第三，公開試亦影響咗香港作者思考所謂第一身等嘅寫作角度嘅執著，都係嗰句，論創作，並無需要用一種方法寫成個故事，不過都係偏離咗「用字」，暫時唔講住。
「用字」係描述一個角色喺故事嘅處境、身份，唔係作者本人嘅處境、身份。例如，一個作者可以創作出一個麻甩佬同老師嘅故事，但係一個麻甩佬係會講粗口嘅，老師就唔會講粗口，不過一個老師要進行性發洩，或者可以成為佢突然要講粗口嘅理由，所以作者係無需要過份保持文字嘅乾淨，角色要講嘅時候，咪畀佢講囉。當然，一個乖乖女要講啲平時唔講嘅嘢，作者都有責任對佢有難為腼腆嘅掙扎描述先得。呢點唔難，講少啲。
所謂香港廣東話有時喺甜故就會顯出一個問題，就係大部份嘅性器官都只有兩極嘅用語，唔係過份正式、就係過份低俗。一個好難用嘅詞，「乳暈」，其實喺廣東話故事入面出現係非常突兀，就係因為過份正式。另一例子，女人嘅性器官，嗱，我呢度寫都唔知點寫好。喺《純文字發洩之作》入面，多數用「私處」、「私處口」、「陰道」 一啲比較中性嘅字眼，不過都係有啲過份正式，姑且咁用，再唔係就係用粗口「閪」一字，不過就過份低俗，無情白事，何必用個咁極端嘅字呢？有幾多個男女朋友會對對方用個呢個字？唔該去IG留個言。一個差唔多嘅例子，「陰莖」，過份正式，故事變教科書，再唔係就多人用「肉棒」，完全受台灣、日本文化影響，但係廣東話從來唔講。廣東話會講「條嘢」、「碌嘢」，每個角色都咁講嘅話都係奇奇怪怪嘅。另一種做法，就係用「下面」去表示男女嘅性器官，問題係，「下面」只係一個用位置指示嚟回避直接稱呼嘅講法，並唔係性器官嘅名。「頭」就係頭，有無人會叫「頭」做「上面」呢？原因只係因為「頭」，大家覺得唔需要回避。
以上種種例子，針對嘅都係性器官嘅稱呼，正正就係因為故事描述其實需要唔同程度、力度嘅用字去配合角色。特別係有旁白嘅部份，一個旁白理應可以將情況描述得中性一啲，但因為用字唔適當就將成個故事變得無謂嘅低俗，又或者過份正式，一啲都唔似講緊故事。另外，有唔同力度嘅描述，就算係同一件事，男人心諗，同女人心諗都會出現唔同溫度，咁嘅用字變化先可以令故事立體、有趣。當然，香港作者首先要擺脫到公開試嘅限制先會感受到呢個問題嘅重要，如果唔係，寫一個區區幾千、幾萬字極端主觀嘅所謂故仔，學咩人去思考用文字去描述唔同角色、唔同處境嘅變化呢。
Instagram: @morironin