First Fantasy 你睇我寫 - 故事創作的心路歷程與補完: 4. 關於「關係」- 首登 20240628

4. 關於「關係」- 首登 20240628

每一個故事都要為角色建立「關係」，而喺《純文字發洩之作》入面，有關性關係嘅關係就更加重要，亦更加需要逐一好好建立。關係嘅建立可以顯出關係嘅重要，以及關係之間發生嘅事有某種程度上嘅難得，甚至意義。例如，拳擊隊隊長Victoria點都算係個有練拳嘅人，不過偏偏畀一個唔識打嘅陌生男救咗。兩者關係就係「陌生人」，但因為共同目標而出現劇情。Victoria因為被拯救而愛上陌生男，之後發生嘅事，喺Victoria嘅立場就變得理所當然，因為都係為自己嘅英雄而做。

一啲再複雜少少嘅原素，就算要描述一段性關係之前，都必需要先好好建立兩者之間嘅關係，咁先顯得呢場床上戲有所意義。阿豪嘅出場係一個「正人君子」，亦係公司入面比較常見到嘅類型。呢類男同事，唔會對新入職嘅少女同事無性幻想，不過出於理論上唔會見人係靚女就上，始終係返緊工，呢點打工仔都會明，而且係日常。新同事Tiffany受過幾次阿豪嘅協助，於是投懷送抱，可能大家會樂見阿豪喺第一集就應該上。咁講，阿豪唔係無上，不過First Fantasy唔會比阿豪咁易上到，因為太過簡單，阿豪同Tiffany仲未建立好關係，如果咁就嚟一場床上戲，又或者枱上戲嘅話，咁寫一兩個故事，內容全係性器官嘅糾纏，咁我會建議大家都係睇返AV，唔好嘥時間睇小說，我都唔會嘥時間寫小說。再講，雖然所有男人都希望喺街見到邊個就上邊個，但事實係，就算真係比所有男人咁做，男人都會好快厭倦性行為（唔好駁我，性行為其實好攰，唔係真係有feel，睇下就算）。再唔係就係反過嚟，男人開始尋找，或者加入自己想要同對方嘅關係背景嚟滿足性愛嘅意義。呢度係解釋緊，點解要為性愛加入主題，如姐弟、師生、同事、護士與醫生或病人等，啊，仲有，敵人。呢啲全部都係為角色建立一層表面嘅關係。AV情節嘅角色扮演都有呢一個效果，但係論小說，小說嘅角色關係就會更加複雜。

唔好呃我，撇除性慾，從心理上，所有男人其實都係要從佔領女人嘅身體嚟得到成功感，以及接住以嚟嘅滿足感。問題係，點樣先可以做到呢？又或者，點樣先可以加大滿足感嘅程度呢？好簡單咁講，只要加入能夠佔領女人身體之前嘅難度就可以。加入難度以後，再加入解難嘅方法，喺呢個過程入面會有一個好微妙嘅效果，就係一個本來可以同任何男人發生性關係嘅女人，突然變得只有能夠解難嘅男人先可以獨享，亦即係之前講嘅「關係之間發生嘅事有某種程度上嘅難得，甚至意義」。就算係強姦嘅情節，都唔等於男人需要必然成功，如阿勇對Tiffany所做嘅，結果都可以係一場空。不過咁唔代表呢幕無意義，喺故事上就正正係增加咗同Tiffany發生性行為嘅難度，倘若之後有一幕阿勇成功得手，咁就可以令成功感昇華。

再再複雜少少嘅關係，就係關係嘅本質改變。如一對情侶，本來有性關係，到後來兩人分開，然後再以非情侶身份發生性行為。又例如，一個男人討厭一個女人，但某種情況下，有機會同呢個女人發生性關係，喺又好奇又過唔到自己嗰關嘅情況之下，無論邊個選擇都係可以令故事更加好睇。





呢啲所有「關係」都係劇情嘅起點。嗰啲乏力交代角色關係，以及發展關係嘅故事，其實都無必要睇落去，又或者可能只係純粹滿足嗰啲唔識日文嘅港男，可以透過呢啲咁乏味嘅文字，滿足一下聲畫以外嘅低級性幻想。

Instagram: @morironin