First Fantasy 你睇我寫 - 故事創作的心路歷程與補完: 6. 再關於「用字」 - 首登 20240704

6. 再關於「用字」 - 首登 20240704

關於「用字」，仲有一啲嘢可以講，就算唔係普遍寫小說嘅共識，都會係First Fantasy嘅寫作風格。

第一，就係避免用過份非正式，或者唔夠普及嘅用語，如「底底」、「約炮」之類。「底底」會用返底褲。「約炮」除非某角色係某身份情況下可以係對話使用，否則希望First Fantasy唔會寫所謂「約炮」嘅內容，因為乏味。

第二，上次都講過，唔會用台灣或大陸而香港從來唔用嘅字，如果係共用嘅反而可以考慮。如「幹」、「操」去描述性交嘅動作。當然，呢兩個字會明顯係書面用嘅字，講到廣東話，都係用返「插」、「抽插」、「扑」呢類會比較適合。不過又咁講，個人認為廣東話係描述性交動作嘅字詞係有啲唔夠多嘅，可能因為又係避忌心態，呢類字詞無好好發展。再唔係就係用粗口「𨳒」，上次講過，用粗口會將劇情突然出現不必要嘅低俗化，應該留喺特別時刻先用。如果濫用，只會令故事整體無變化。

第三，唔會用中國歷史皇帝嘅字詞嚟比喻當代處境。如「後宮」之類，因為完全偏離香港處境。如果大家仲用緊呢類比喻，好明顯係受上一輩嘅色情文字創作人影響。咩「X皇Y后」之類，其實都係不合時宜嘅借代。





第四，有啲似使用中國歷史皇帝嘅字詞，就係避免使用武俠小說嘅字詞嚟比喻當代處境。同樣，如果大家仲用緊呢類比喻，好明顯係受上一輩嘅色情文字創作人影響。上一輩深受金庸一輩嘅小說人影響，好自然將拳腳功夫嘅寫法放落性愛嘅支體場面。嗰啲描述練功嘅招式，如今用嚟描述代當嘅性愛場面，難免令人作嘔。

第五，避免用四字詞。四字詞有普及性，可以將一啲概念簡單咁令人明白。不過用嚟描述人樣、身材嘅時候，其實都係將人樣、身材過份簡化，甚至再描述幾個人之後就會變成不斷重複使用相同四字詞嘅局面，唔通嗰幾個人係一樣樣嘅？事實上，First Fantasy認為除非人物有啲特徵係可以簡單咁描述，如Queenie係黑妹，如果唔係，「甜故」其實唔適合過多描述人樣、身材，就留畀讀者自由喺腦入面想像自己心中嘅人物就好喇。畢竟，大家都知咩叫靚女㗎啦，再唔係，大家自己都有自己心中嘅靚女㗎啦。

第六，避免使用擬聲字描述叫聲。女人嘅叫聲係性愛嘅重要一環，不過作為純文字寫作，係無可能將一下叫聲用一千字去描述嘅，但係用一個擬聲字去描述又會顯得過份簡單，所以First Fantasy嘅睇法係，完全刪去用擬聲字描述叫聲，將文字空間留返畀其他嘅描述先更有意義。

Instagram: @morironin