First Fantasy 你睇我寫 - 故事創作的心路歷程與補完: 3. 故事與真實的距離 - 首登 20240622

3. 故事與真實的距離 - 首登 20240622

一個好無養份嘅講法，「作者係取材自自己嘅生活經驗而寫作」。話佢「無養份」嘅原因係因為，無一個作者唔係咁樣，咁點解仲要講？因為作者嘅對手係讀者，讀者大部份都唔係作者，即係從未經驗喺自己嘅生活取材寫作，所以呢種好似作者角度毫無養份嘅講法，喺讀者角度反而係賣點。另一種類似嘅講法，係標榜「真人真事」嘅故事，同所謂「取材自自己嘅生活經驗」異曲同功，但係讀者們一樣受樂。事實上，故事嘅本質就係虛構同真實混合而成，正確嚟講應該係真實嘅體驗以虛構嘅形式表達。比重拿捏得當，就可以說服讀者，反之，讀者無癮，睇唔到落去。唯一可以令故事變成真人真事嘅方法係要將故事擺脫故事，放到新聞、報告文學或歷史嘅種類之內。

無論故事有幾虛構或真實，作者都有將故事說服讀者相信係事實嘅責任，問題係點樣可以達到有水平嘅說服效果呢？喺呢度我想講，本來呢篇我嘅標題係「關於『情節』」嘅，因為我認為，識得思考故事情節就可以增加故事嘅說服力。故事係點樣發展㗎呢？情節係點決定㗎呢？簡單一句，就係基於角色嘅行動動機，呢度所指嘅行動，可以係真實嘅行動，如殺人、講大話、犧牲等，又或者係思想上嘅行動，例如角色面對兩難式，作出選擇嘅思考過程就係角色另一種行動動機。作者將角色嘅行動動機解釋畀讀者聽，就會出現「情節」。

不過，讀者唔係徹底單純咁跟從作者嘅思考模式嘅，如果用嚟解釋行動動機嘅情節牽強，又或者過份簡單，就會令讀作唔相信情節，如果牽強情節氾濫，結論就係一個差嘅作品。成功嘅作品，就係將虛構嘅情節向讀者解釋行動動機得當，令讀者相信虛構情節係會喺呢個故事情況之下發生嘅。要交代一個角色嘅行動動機，有時會需要另一個行動動機支持，層層遞進而家成為一連串嘅劇情，最後成為故事。以「進擊的巨人」為例，故事劇情嘅緊密就將一個個角色嘅行動動機解釋得淋漓盡致，而成為當代經典。

由此可見，一啲對解釋角色嘅行動動機，以至某種特定故事環境出現乏力嘅故事，都係令人睇唔到落去嘅原因。講到呢度，討論點可以伸延到故事創作嘅另一主要元素，「用字」。以後再講。





Instagram: @morironin