妖偵社: 第三章 大海撈針
「咇咇咇、咇咇咇⋯⋯」鬧鐘嘅響聲，嘈醒咗阿軍。
阿軍慢慢擘大眼，然後坐起身伸咗個懶腰。
「又要返工啦⋯⋯」阿軍起身嘅時候，佢抱怨自己嘅生活總係千篇一律。
休息完就要返工，返完工又返屋企休息，每日都係一樣，完全冇變化。
阿軍攞起放喺床頭櫃桶嘅手機一睇，佢心入邊就有一種不祥嘅預感，因為佢見到可晴媽媽喺凌晨嘅時候，打咗十幾個電話俾自己。
「莫非可晴出咗啲咩事？」阿軍不停咁諗可晴出咗啲咩事。
諗咗一陣間之後，阿軍用力咁拍自己塊面。
「唔好亂咁諗嘢！」佢喺心入面自己同自己講。
然後阿軍就打電話比可晴嘅媽媽。
「喂，陳阿姨！你尋晚係咁打俾我做咩事呀？」阿軍喺電話入面問可晴嘅媽媽。
「個衰女係唔係喺你屋企過夜啊？」陳阿姨問。
「可晴尋晚唔喺我度瞓，我尋日同佢睇完電影之後，佢就自己返咗屋企。」
「咁就弊喇！個衰女尋晚成晚都無返過屋企，我都唔知佢去咗邊度，打電話俾佢又唔聽，咁你話而家點算好呀？」陳阿姨好緊張咁講。
「陳阿姨，你冷靜啲先，我試吓再打電話俾佢先，我一陣間打返俾你。」
「好啦阿軍，你快啲去搵吓個衰女啦！」陳阿姨講完就收咗線。
阿軍嘗試咗幾次打電話俾佢，但係依然都係冇人接聽。
「死啦⋯⋯你唔好嚇我啦⋯⋯」阿軍開始變得好緊張。佢嘗試用各種方法聯絡可晴，但係依然都搵唔到佢。
阿軍嘗試咗半個鐘頭之後，佢決定先打返電話俾陳阿姨。
「喂，陳阿姨！我係阿軍，我頭先不停咁樣打電話俾可晴，但係都冇人聽⋯⋯」
「咁點算好呀？阿軍⋯⋯我唔想⋯⋯我唔想佢有事呀⋯⋯」陳阿姨喊住咁講。
「陳阿姨，你冷靜少少先⋯⋯」
「我點⋯⋯我點冷靜呀？我個女⋯⋯唔見咗啊⋯⋯」
「不如咁，我哋先去警署報咗警先，跟住我再諗方法搵返佢，你話好唔好？」
「失蹤都要過咗四十八個鐘頭先可以報警㗎⋯⋯」
「其實唔係㗎，阿姨，就算未夠四十八個鐘頭一樣可以照去報咗警先，我哋報完警再諗有咩方法，好唔好？」
「唯有係咁啦⋯⋯」陳阿姨好傷心咁講。
「咁轉頭九點左右，我哋約喺將軍澳警署等。」
「好啦⋯⋯」講完之後陳阿姨就收咗線。
阿軍好大力咁拍咗落個床頭櫃一下，呢一刻佢都唔知自己嘅心情究竟係憤怒、內疚定抑或係傷心。
佢淨係知自己好煩躁，又好擔心可晴
阿軍再次攞起電話打咗返公司請一日假，然後就去咗廁所梳洗，換衫準備出門口。
阿軍坐緊地鐵嘅時候，又忍唔住攞部手機出嚟，睇返以前同可晴一齊影嘅相，一齊去玩嘅地方。
佢碌到一套佢哋喺長洲玩嘅相同埋片，其中有一段片影住可晴用竹籤拮起一粒大魚蛋。
然後可情大大口咁咬住一啖，可能就係因為太大口，所以啲竹籤承受唔到剩低嗰一半魚蛋嘅重量，最後有半粒魚蛋跌咗落地。
雖然魚蛋唔係啲咩好貴嘅嘢，但係可晴竟然望住地下嗰半粒魚蛋喺度喊，佢覺得好唔開心，因為淨係食到半粒。
阿軍話我再買多一粒俾你啦。
但係可晴話就算你買多粒俾我都好，我就係食唔返地下嗰半粒啊！
仲有一段片係影住阿軍買咗一杯雪糕，阿軍一隻手揸住手機一隻手揸住杯雪糕。
跟住可晴話想食一啖，但係結果佢嗰一啖就將成杯雪糕都食晒。
阿軍望住手上面嗰個雪糕筒呆咗，完全唔知俾咩反應好，呢個時候可程就搶咗佢手上面部手機，影返住佢呆咗個樣。
兩人之間相處嘅點點滴滴全部都湧上心頭。
「自己點解尋晚送佢返屋企？點解自己冇能力好好保護佢？」阿軍係咁用力打自己個頭，佢真喺好後悔又好想喊。
不過地鐵始終都係公眾地方，阿軍都唔想係咁多人面前情緒失控，所以佢都喺盡量忍住啲淚水。
但係始終都有幾滴眼淚，喺不經意之間從阿軍隻眼入面流咗出嚟。
不知不覺間，他就已經到咗寶琳站。
阿軍行到警署附近就已經見到陳阿姨企咗喺警署嘅報案門口，於是阿軍加腳步跑向陳阿姨。
陳阿姨對眼喊到腫咗。
「放心啦，冇事喎，可晴一定會大步檻過㗎！」阿軍一見到就即刻安慰佢。
然後阿軍就扶住陳阿姨行入報案室。
「唔好意思呀，我想報案。」阿軍行到櫃檯前講。
「先生你想報案嘅話，去前面報派籌機，攞返個籌號先。」
阿軍望一望成個報案室，佢見到部派籌機，同時佢都見到成個報案室入面，只係得佢同陳阿姨。
「但係成個報案室就剩係得我哋兩個要報警，咁都要去攞籌號？」阿軍望實個警察講。
「先生，攞籌號呢個係規矩，就算有冇人都要照做。」
「得！得！得！」阿軍唯有好無奈咁行過去攞籌號。
等佢攞完張籌號紙之後，報案室啲櫃檯入面就已經冇晒警察。
「有冇搞錯啊！原來係因為自己要去蛇王，所以叫我撳飛！」阿軍坐喺報案室櫃檯附近啲凳。
「軍仔，警察去晒邊度啊？」陳阿姨問阿軍。
「我都唔知。」阿軍無奈咁翹埋雙手搖搖頭。
佢哋兩個等咗成十幾分鐘，先見到有個警察行出櫃檯嚟攞文件。
「唔好意思，我哋仲要等幾耐？」阿軍即刻截住個警察問。
「麻煩你在耐心等候多一陣，我哋有案件處理緊。」警察講完之後，就頭也不回咁離開咗報案室。
阿軍已經等到唔耐煩，佢心入面已經講晒粗口。
又過咗大約半個鐘頭之後，終於有個警察行出問阿軍同陳阿姨喺報案室入面等緊咩。
「等緊報案囉！唔係可以等咩啊？等運到啊？」阿軍極度唔耐煩。
「先生，你冷靜少少先。」警員安撫佢。
「我點冷靜呀？等完又等、等完又等！」阿軍講嘢越嚟越大聲。
陳阿姨拍一拍阿軍手臂，然後同佢講：「唔緊要啦，軍仔。」
陳阿姨安撫完阿軍，阿軍冇咁大脾氣行過去櫃檯。
「先生、女士，你哋做咩事報警呀？」
「我個女朋友，即係呢位女士個女唔知去咗邊度。」
「先生，麻煩你詳細少少形容個情況。」
「就係尋晚嘅九點幾，我同佢一齊去睇戲⋯⋯」阿軍好仔細咁樣形容每一個細節，而警察都問得好仔細。
成份筆錄口供大約做咗三個鐘頭左右，阿軍同陳阿姨兩個又簽咗啲文件。
「我而家會將啲文件交去失蹤人口調查科，你哋兩位返去等消息啦，應該冇咁快會搵到佢。」完成手續之後，警察就同佢哋兩個講。
「你哋唔係即刻派人去搵嘅咩？」阿軍好嬲咁拍枱質問警察。
「先生你冷靜啲先，我哋處理都有程序，兩個返去等消息啦！」警察似乎想打發佢哋走。
阿軍簡直就係怒氣攻心。
當佢想用粗口鬧啲警察嘅時候，陳阿姨截住咗佢。
「軍仔，我哋都係出去門口先講啦⋯⋯」陳阿姨無奈咁搖搖頭。
「阿姨你頭先做咩截住我？」阿軍喺警署門口好不解咁問阿姨。
「軍仔，如果你頭先同佢哋嘈，激嬲啲警察之後，啲警察咪更加唔願意去查。」
阿軍呆咗一下，其實陳阿姨都講得啱。
呢個時候，阿軍聽到有人叫陳阿姨個名。
「秀君！」
陳阿姨擰轉頭一望，原來係可晴阿爸啱啱收工過咗嚟。
「老公，你終於都嚟啦⋯⋯」陳阿姨見到佢忍唔住又再喊。
「全叔，對唔住呀，如果唔係我⋯⋯」阿軍好內疚咁望住可晴父母。
「算啦，呢個都唔係你嘅錯，我再搵一啲做私家偵探嘅朋友去調查。」全叔同阿軍講。
「老公，我有啲攰，你同我一齊返去啦。」陳阿姨望住全叔講。
「萬軍，我同秀君返去休息吓先，有咩消息你就即刻再通知我哋。」全叔揮一揮手，然後就拖住陳阿姨返屋企。