妖偵社: 第四章 占卜店
阿軍見到可晴嘅父母返咗屋企之後，佢都打算返屋企再休息一下。
於是佢就行去地鐵站，準備坐地鐵返屋企。
不過阿軍入閘之前，佢就覺得有少少肚餓。
於是佢決定喺附近嘅商場食咗嘢先，然後再返屋企。
阿軍喺商場入面行咗一陣間，都諗唔到食啲咩好，反而佢喺商場入面就見到有間占卜舖覺得幾得意，想行入去睇吓。
「先生，歡迎光臨！想占卜啲咩呢？」一個皮膚好白，少少肥，睇落去都唔夠一米五五嘅女店員企咗喺前台同阿軍打招呼。
阿軍感覺呢個女仔好熟口面，就係諗唔起係邊度見過佢。
「先生，做咩呆咗嘅？」女店員問佢。
「無事！無事！我自己望吓啲水晶先。」阿軍擰轉頭望一啲陳列喺店門口嘅水晶。
阿軍總係有種好奇怪嘅感覺，但係佢自己又講唔出，不過佢都冇諗太多，因為佢其實成日都認錯人。
望咗一陣水晶之後，阿軍就擰轉身。
「我想問呢，你哋占卜嘅話可唔可以尋人㗎？」阿軍好奇咁問女店員。
「其實係得嘅，不過如果親屬搵親屬嘅話會準啲。」女店員答返佢。
雖然女店員嘅答案好正路，但係阿軍就覺得佢答得好奇怪。
「點解佢好似知道一啲嘢咁？」阿軍喺度諗。
不過佢諗多咗一陣之後，佢就覺得應該係自己諗多咗。
「先生放心喎，我哋係明碼實價嘅。」女店員見到阿軍喺度諗嘢，佢以為阿軍喺緊占卜一次要幾錢。
「唔係，我唔係諗緊價錢，純粹喺感覺上有啲奇怪啫。」阿軍笑一笑咁答佢。
「不過我都想問一下占卜一次要幾錢？」阿軍問返女店員。
「我哋收好平㗎，一次收兩百。」女店員話。
正當阿軍打算拿錢出嚟嘅時候，一個老婆婆從舖頭入面嘅休息室行出嚟。
阿軍突然靈光一閃⋯⋯
「哦！我認得你哋兩個啦！」阿軍驚訝咁講。
原來佢哋兩位就係尋日，阿軍喺地鐵站撞到，講嘢好古怪嘅老婆婆同埋少女。
阿軍諗返起晒尋日嘅情景，特別係婆婆講嘅一句說話。
「如果有一個好重要嘅人消失咗，你又會願意犧牲幾多去拯救佢。」
「你點解一早就知道可晴會失蹤？」阿軍好嬲咁指住婆婆問。
「冷靜啲先啦！」女店員嘗試安撫阿軍嘅情緒。
「我而家就去報警，有咩你哋留返同警察講！」阿軍好嬲咁講。
「咁你而家都係想搵返你女朋友，喺唔喺啊？」女店員問阿軍。
「喺呀，如果可晴平平安安出返嚟嘅話，我可以當咩事都冇發生，但係如果佢少一條毛都好，我一定唔會放過你哋。」阿軍翹埋對手望實女店員講。
「咁我話俾你聽，可晴唔喺俾人捉走咗。」
「唔喺俾捉人捉走？咁係咩啊？被鬼捉走啊？」阿軍好串咁反問女店員。
點知女店員點點頭，表示同意阿軍嘅講法。
「咩料啊？俾鬼捉走？我先唔信囉！」阿軍好大聲咁講。
「唔緊要啦，信不信由你，反正呢件事，唔關我同我婆婆事。」女店員無奈咁表示。
「咁你哋話可晴失蹤唔關你哋事，但喺你吔又會一早就知道可晴會失蹤？」阿軍又問。
「好老實講，我哋係開占卜舖嘅，可以預知未來都好正常啫！」女店員好自信咁講。
阿軍呆咗一下，佢完全冇諗過女店員會咁樣答佢，而且又好似好合理。
霎時之間，阿軍都諗唔到講啲咩好。
「咁你哋知道可晴會俾嘢捉走，咁你哋又唔阻止？」於是阿軍又問佢。
「如果我阻止咗呢件事發生嘅話，咁我哋鋪頭嘅預言咪唔準，我哋開占卜舖㗎，如果啲預言唔準，我仲點做生意啊？」女店員強勢咁反問阿軍。
一時之間，阿軍都唔知俾咩反應好。
「咁我而家應該點算呀？」阿軍語氣冷靜咗少少咁樣問。
「我幫你占卜咗先啦。」女店員話。
阿軍點點頭問：「咁我要點做？」
「你張枱面嗰個籖筒嘅籖倒入個箱入面先，跟住再喺箱入面抽一支出嚟。」女店員指示阿軍應該點做。
阿軍覺得好奇怪，因為平時求籤都係跪低，然後搖出嚟。
「乜唔係應該跪低搖出嚟咩？」阿軍好奇咁問佢。
「咁我鋪頭細冇位俾你跪吖嘛，其實點抽都係一樣嘅。」
阿軍聽完之後就照做。
佢抽到五號籖，然後佢將之前交俾女店員。
「即係點呀？我點先可以搵返可晴？」佢問女店員。
女店員望住支籤諗咗一陣。
「你俾啲時間我考慮吓。」女店員望住阿軍講。
阿軍完全聽唔明佢想講啲咩。
「咩叫做俾啲時間你考慮吓？」阿軍好疑惑咁望住佢。
「講你都唔明，你返去先啦，緣份到我自然就會幫你搵返佢。」女店員話。
阿軍感覺好奇怪，雖然阿軍覺得佢哋同可晴嘅失蹤一定有啲關係，但係阿軍又覺得佢哋唔係壞人。
「係喎，你都未講你叫咩名。」阿軍問女店員叫咩名。
「我姓巫馬叫善㛓，你可以叫我小善或者小㛓都得。」
阿軍感覺好迷惘，但係佢覺得繼續留喺度都解決唔到件事，而且佢哋又唔肯講多少少，所以阿軍都唔想繼續留喺度。
當佢準備轉身離開嘅時候，小㛓叫停咗佢。
「先生，你未俾錢啊！」小㛓話。
「俾咩錢呀？」阿軍一臉疑惑咁望住小㛓。
「占卜要俾錢㗎嘛。」
「我都唔知占卜結果，咁俾咩錢呀？」阿軍嘅表情好愕然。
「我唔理啦，總之我占卜左就要收錢，舖頭入面係有閉路電視㗎，你唔俾錢我就真係報警喇！」
阿軍好無奈咁喺銀包入面攞咗二百出嚟。
「好男不與狗鬥！」講完之後，阿軍就將兩張一百蚊紙大大力咁拍咗落枱面。
「多謝惠顧喎！」小㛓好開心咁收咗錢，然後佢仲要講咗句：「我唔係狗，我係狐⋯⋯」小㛓講咗一半，就用隻手揞住個口。
「你喺湖？咩湖呀？洞庭湖呀？你講緊啲咩啊？」阿軍真係完全唔知小㛓想表達啲咩。
「算啦，冇嘢啦，你唔明㗎啦！」小㛓敷衍佢。
阿軍都無太在意，反正阿軍都唔係好想知。
佢係枱面攞咗一張卡片，隨手就放咗入去放手機嗰個褲袋。
然後阿軍轉身離開，估唔到小㛓又叫停佢。
「呢個俾你。」小㛓喺櫃檯下面攞咗一個護身符出嚟。
「嘩！呢個咁靚嘅吊飾，今次又要收幾錢？」阿軍好輕佻咁問小㛓。
「免費送㗎！你要唔要呀？唔要我就慳返！」小㛓好輕佻咁講。
「免費送嘅梗係要啦！」阿軍伸隻手出嚟攞個護身符，然後就轉身離開。
「喂！我仲有嘢未講啊，個護身符淨係可以用一⋯⋯」小㛓都仲未講完，就已經離開咗間舖頭。