妖偵社: 第二章 失蹤

「雷可晴！你又咁夜先返屋企！」可晴媽媽喺電話入邊好惡咁話佢。

「我今日同咗阿軍去睇電影呀。」可晴無奈咁回答媽媽。

「咁你又唔早啲同我講聲？你知唔知你搞到我幾擔心呀？」媽媽用埋怨嘅語氣同你講。

「我之前有同你講過㗎，喺你自己唔記得咋！仲有啊！我都唔細個啦，你可唔可以唔好咩都管住我？」可晴有少少唔耐煩。

「咁啲飯餸你仲食唔食呀？唔食我放入雪櫃啦。」





「你放啦、放啦。」

其實每個家長都係想關心自己嘅仔女，但總係用錯方法，最終令到關係越嚟越遠。

可晴講完之後，就收咗佢線。

可晴等咗一陣車。

或者其實都唔止一陣，計落應該都有大半個鐘頭。





佢望一望手機，發現時間已經去到凌晨接近一點。

然後佢又行咗去小巴站牌睇一睇，佢先發現原來已經過咗尾班車。

突然阿軍打電話過嚟問可晴：「傻瓜，你返到屋企未啊？」

「我梗係返到啦，我嗰度一坐小巴上去就係屋企樓下啦。」可晴唔想阿軍擔心，所以佢就講咗大話。

「咁你快啲去沖涼休息，我都差唔多返到屋企。」阿軍話。





「知道啦、知道啦！我差唔多要入電梯啦，聽日再講啦，拜拜。」

「拜拜」阿軍講完再見之後，可晴就收咗線。

佢原本係打算坐的士返屋企。

但係可晴等咗五分鐘都未有的士，佢又諗起最近打算同阿軍一齊買樓，佢都係覺得用少啲錢好啲。

雖然去康盛花園係要行一段山路，但係佢覺得今日嘅天氣又唔算特別熱，而且又冇落雨。

於是佢決定行路返屋企。

雖然夜晚嘅山路特別寧靜同埋昏暗，但係呢條路佢由細行到大，所以佢都冇話特別驚。

佢行下行下，突然之間漂例咗一陣好濃嘅霧。





雖然係有啲奇怪，但係山上面濕氣重，可晴都唔覺得有咩咁特別，但係條路就越行越怪。

唔單止係路面嘅質地唔同咗，就連路燈嘅顏色都唔同。

原本嘅街燈係偏黃色，不過今日嘅街燈係偏向紅色。

而且可晴行近一睇，佢先發現街燈係唔知咩時候變成咗紅色嘅燈籠。

正當可晴諗緊，係咪因為大霧，所以令到自己行錯路嘅時候，更奇怪嘅事情發生咗。

可晴聽到身後傳嚟從來都未聽過嘅奇怪嘅中式音樂。

「乜嘢人咁夜玩音樂呀？唔怕嘈到人瞓覺咩？」可晴心諗。





佢調轉頭，打算睇吓係咩人咁奇怪。

可晴一轉身就已經嚇親，因為佢見到有兩個着住紅色古裝嘅人，分別舉起一塊紅色嘅牌匾，牌匾上面印住兩個字「肅靜」。

後方仲有接近三十個着住紅色古裝嘅人組成樂隊，然後就到着住十六個着住白色古裝嘅人負責抬轎，再後少少就有一隊着住黑色古裝嘅護衛。

「唔係咁夜仲有人拍鬼片呀嘛？」可晴心諗。

「鏡頭呢？鏡頭呢？」可晴一邊自言自語一邊周圍望。

好快可晴就知道呢班人唔係拍緊戲。

嚴格啲嚟講，呢班唔係人⋯⋯

雖然山腰好大霧，但係可晴都可以好清楚咁睇到轎上嘅一啲花紋，不過當可晴好認真，想睇清楚每一個人樣貌嘅時候，佢就發現無論如何，佢都睇唔清楚。





呢一班⋯⋯

唔係冇五官，只係無論如何，都睇唔清楚。

可晴嚇到匿喺旁邊嘅草叢入面，仔細咁樣觀察佢哋。

呢一刻，可晴只係好想佢哋快啲離開。

可晴望實佢哋，直到自己眼乾，先眨一下眼。

就喺佢眨眼嘅一瞬間，突然之間所有着住古裝嘅「人」都一齊擰轉頭對正可晴嘅方向。

「嘩！唔係咁邪呀嘛！」可晴開始慌張。





「南無阿彌⋯⋯嗡嘛呢叭⋯⋯我們的天父願你的國來⋯⋯」可晴喺心中默念所有佢認識嘅經文。

但似乎並冇任何作用。

因為當可晴一眨眼嘅時候，就一個護衛衝向可晴。

就係千鈞一髮之際，可晴突然諗起唔知邊個教，只要暫時閉氣，靈體就唔搵唔到人嘅位置。

於是可晴用力吸咗一大啖氣，然後忍住閉氣。

果然護衛嘅動作停止咗。

不過可晴都係人冇辦法，一直閉氣。

當可晴忍唔住換氣嘅時候，護衛又再次衝向可晴，佢哋之間嘅距離，只係得返兩三個身位。

可晴嚇到撳實個嘴，擘大雙眼望實佢。

當可晴再次眨眼嘅時候⋯⋯

護衛已經閃到喺佢面前，距離甚至喺面貼面。

可晴雖然睇唔清楚佢嘅五官，但係隱隱約約感受到佢個樣好悲傷。

直至護衛慢慢將個頭向前伸，距離越嚟越近，而可晴俾佢嚇到忍唔住喘咗一口氣。

呢個時候，可晴感受到佢嘅五官，由傷心變成開心。

可晴好想喊出嚟，但係佢已經被嚇到完全唔知點算好，連郁都唔敢郁。

然後佢聽到有一把女人聲喺佢耳仔邊細細聲咁講：「 終於比我搵到你啦！倩兒⋯⋯」

然後就有一對手，貼住可晴耳仔兩邊，呢對手慢慢從可晴頭嘅後面伸出嚟，直到可晴雙眼望到佢手掌為止。

突然之間，個對手撳住咗可晴雙眼⋯⋯