妖偵社: 第一章 約會日
「下一站，調景嶺⋯⋯」
「奇遇，要來臨，各就各位靠近，要小心⋯⋯」
地鐵嘅廣播同電話鈴聲嘈醒咗熟睡嘅男仔。 佢醒咗之後，望一望地鐵路線圖牌。
「頂，坐過站添！」佢細細聲咁自言自語。 佢望一望手提電話，原來頭先係佢女朋友打電話俾佢。
於是佢就打返電話俾女朋友。
「喂，顧萬軍！你約我九點半㗎！依家幾點呀？你仲未到呀？」女朋友有少少嬲咁鬧佢。
「對唔住呀寶寶⋯⋯」阿軍好內疚咁講。
「咁你即係去到邊度啫？」女朋友問佢。
「我而家喺調景嶺。」
「吓！你成半個鐘之前同我講你已經去到油塘地鐵站喎！你而家仲喺調景嶺？」
「對唔住呀，我半個鐘頭之前已經上咗車，但係唔小心瞓着咗，坐過咗站，班地鐵又開返咗去調景嶺。」
「唉！算啦、算啦！總之你而家快啲過嚟，電影就嚟開始啦。」女朋友講完之後，就收咗佢線。
阿軍一到咗調景嶺站之後，就急急腳咁落車，然後轉車返去寶琳。
阿軍坐車去到寶琳站之後，佢準備落車。就係佢落車嘅時候，佢唔小心撞到一個婆婆。
婆婆嘅袋入面嘅水果，跌到成地都係，於是阿軍就去幫佢手執返啲水果。
但奇怪嘅係，婆婆冇責怪佢，又冇唔該佢，反而係講咗一啲好奇怪嘅嘢。
「後生仔，如果有一個好重要嘅人消失咗，你又會願意犧牲幾多去拯救佢呢？」
婆婆眼都唔眨咁望住佢，令到阿軍覺得毛骨悚然。
就係呢個時候，一個皮膚好白，少少肥又有少少矮，睇落去只有十六歲嘅女仔，行到去婆婆身邊。
一邊執返啲水果，一邊同阿軍道歉。
「對唔住呀，嚇親你，我婆婆有腦退化，你可以唔使太在意佢講嘅嘢。」女仔尷尬咁笑。
「哦！原來係咁。」阿軍都冇諗太多。 阿軍幫婆婆執完啲水果之後，佢就急急腳離開。
阿軍跑去戲院。佢去到戲院門口，就見到女朋友翹着手等佢。
「對唔住呀⋯⋯我今日感冒，頭先食咗藥，所以我先會喺地鐵入面瞓着咗。」阿軍好內疚咁同女朋友講。
「好啦、好啦，我原諒你啦！下次唔准再遲到啦！」女朋友溫柔咁安慰佢。
「嗯！」阿軍笑住咁答佢 「我哋快啲入去啦，電影就嚟開始啦！」女朋友拖住阿軍隻手，好開心咁同佢一齊入戲院買票。
「唔該兩張成人嘅愛在基爾內里。」阿軍去櫃檯買票。
「先生揀位吖。」 「呢兩個，唔該你。」阿軍揀咗最後一排中間嘅兩個座位。
買完票之後，女朋友就拖住阿軍入場。 「等陣！寶寶你唔食爆谷？我哋仲未買！」阿軍企喺度望住戲院門口嘅小賣部。
女朋友諗咗一下，跟住佢同阿軍講：「傻豬我哋要儲錢買樓呀，戲院門口啲爆谷咁貴，我哋今次唔好買啦，下次先食啦。」
「好啦。」阿軍笑住咁答佢。 女朋友搣咗阿軍塊面一下。
之後兩人就一齊入咗去戲院。
「啊！入到嚟我先覺得有啲口渴添。」女朋友同阿軍講。
「我而家去買。」
「唔好啦，套戲就嚟開場啦，都係算啦！我忍吓都得嘅。」女朋友嗲住咁講。
突然阿軍打開自己個背囊，然後攞咗兩杯珍珠奶茶出嚟。
「傻瓜，我一早買咗俾你，不過冇話俾你聽。」阿軍笑住同女朋友講。
「都係你最有我心！」好開心咁攞咗杯奶茶。
女朋友開咗杯奶茶，一邊睇戲一邊飲。 套電影好快就過咗十分鐘。
女朋友望一望阿軍，見到佢已經瞓着咗。
女朋友摸一摸阿軍額頭，發現阿軍額頭真係好熱，好似病得好犀利，所以佢再打擾阿軍瞓覺。
直至電影完場，女朋友先再拍醒阿軍。
「喂！寶寶起身啦！電影完咗啦！」
「嗯？嗯？」阿軍一臉疑惑。似乎阿軍真係瞓得好淰。 「我話！完！埸！啦！衰人！」女朋友翹住手咁望住佢。
「對唔住呀！我瞓足全場添⋯⋯」阿軍除咗內疚之外，都唔知可以俾咩反應。
「死啦，我今日每件事都激嬲佢⋯⋯」阿軍心諗。
正當阿軍以為責怪佢嘅時候，點知女朋友都仲係咁溫柔。
「傻豬，我知你今日病咗，唔緊要啦！今日就破例一次，我就你啦！下不為例啦！」
「寶寶！我愛你！」阿軍一邊講一邊錫過去佢塊面。
「喂呀！你病咗就唔好錫我啦！陣間搞到我都病！」女朋友抱怨佢。
「對唔住⋯⋯道知！」 講完之後，佢哋兩個就甜甜蜜蜜咁離開戲院。
「寶寶，你肚唔肚餓啊？」阿軍問。
「有少少肚餓呀。」女朋友扁晒嘴咁講。
「好啦！我哋出發去食嘢啦！」阿軍好似個傻仔咁，拖住女朋友喺條街度亂跑。
「喂呀！你行慢啲啦！」女朋友一邊抱怨一邊傻笑。
因為夜晚其實都唔係好多餐廳仲有營業，所以佢哋隨便選擇咗一間餐廳。 「
寶寶，試吓我呢個呀。」女朋友餵佢食咗一細塊豬扒。
「好唔好食呀？」女朋友問佢。
「好食！傻瓜你都試吓我呢個呀。」阿軍又切咗細細舊塊牛扒俾佢食。
其實呢間餐廳嘅食物真係好一般，甚至算唔上係好食，但係有彼此喺身邊就會覺得乜嘢都特別好食。
佢哋食完嘢就準備返屋企。 「寶寶，你今日病咗就唔好送我返去啦！」
「但係⋯⋯」
「唔使但係啦！我住康盛花園，你住喺油塘，送咗我返去之後，咁夜仲邊度會有車返屋企，而且你又病咗。」女朋友打斷佢。 「不過⋯⋯」
「冇不過啦！你今日激嬲咗我咁多次！今日一定要聽我講！」女朋友再次打斷佢。
「好啦，咁你返去嘅時候小心啲，返到去要同我講。」
「知道啦！」