實不相瞞，井型屋其實係鎮魂塔: 梁先生的請求
梁先生的請求
「琴晚，我又一次入咗去鎮魂塔。」午飯時我在席間發話，除了阿曦和阿晴沒聽懂外，爸爸、媽媽和阿旻都覺得我在開玩笑。
「阿曉，今日只係一月一，你早咗三個月喎。」爸爸說。
媽媽伸手摸着我額頭說︰「係咪呢排温書壓力太大，搞到你精神錯亂？」
「阿哥，咩叫『又』？你之前有去過咩？無聽你講過嘅。」阿旻是唯一針對我的說話作出回應的人。
而我選擇統一回答他們︰「我唔係講笑，而且都無唔正常，之前我去過一次，但嗰次我以為自己只係暈咗一陣而發嘅夢，但琴晚再去過一次之後，我好肯定嗰次唔係發夢，而係真有其事，我真係去咗鎮魂塔，仲差啲返唔到出嚟！」
「好好好，但無啦啦點解會有鎮魂塔？」爸爸還是半信半疑。
「井型屋其實就係鎮魂塔，所以呢度特別猛，我已經遇到過好多靈異事件。」我說。
「咁鎮魂塔入面係點，點解你會入咗去？」媽媽對靈異之事接受程度較高，故已經深信不疑。
我耐心的向她解釋︰「鎮魂塔入面同我哋棟樓無咩分別，只係燈光柔和啲，入面充滿住歡笑聲，同好多單位有保護罩咁。仲有，入面嘅時間流逝同我哋而家唔同，喺入面好耐，但現實世界都只係過咗一陣。同埋唔可以留喺入面咁耐，你啲記憶會慢慢消失，最後唔記得自己係邊個就返唔到出嚟，我琴晚都差啲出事。兩次我都係畀人強行帶入去，第一次係因為盧老太，琴晚就係捉我去做玩伴。」
媽媽聽完有點震驚，原來自己差點便失去了一個兒子。
「會唔會係你發夢喳？」阿旻又提出質疑。
「一定唔係！」我斬釘截鐵的說︰「同埋你唔係都開始信有鬼啦咩？」
阿旻面紅耳赤，連忙解釋︰「嗱，澄清返，我無信嘅，只係我嘅知識暫時未解釋到啫。」
「大哥哥，我又想去玩。」阿曦興奮的說。
「我都要、我都要，帶埋我去。」阿晴也搶着要一起去。
「嗰度唔係遊樂場，無嘢玩㗎，而且可能去咗就返唔到屋企，見唔到我哋。」我並非想嚇壞他們，只是有話直說，但都已經令他們害怕得差點哭了。
「不過，我懷疑如果無人帶的話，進入嘅媒介係lift，因為琴晚我走得返出嚟，都係靠萬生，佢好似有密碼咁，㩒咗一輪lift我就返到嚟。」我憶述。
「萬生？」爸爸、媽媽和阿旻異口同聲說。
「係，就係已經過咗身嘅其中一位五狼案疑犯，佢一直都無離開過，一直都喺附近巡邏。只不過……」我有點後悔說︰「我講咗佢聽佢叫咩名，可能佢已經恢復記憶，離開咗鎮魂塔，畢竟佢都唔似係惡鬼。」
「咁即係入唔返去證明唔到。」阿旻立即說，我也反駁不了。
「仲諗住叫你帶我去參觀吓㖭。」媽媽也失望的說。
「散場，繼續食飯。」爸爸打圓場道。
如是者，鎮魂塔的話題便暫時完結，坦白說，我也不想再去第三次了。
飯後，我問阿旻︰「上次你話拎張相再去問多次，我哋今日去囉？」
「咪搞，」阿旻一臉嫌棄道︰「今日我約咗friend，你自己去啦！」
「咁好囉……」我失望道，其實我心裏想她陪我一起去，最少遇到危險時也有個照應，但我實在不想這件事再拖下去了，所以我最終還是獨自前往。
「廖生，喺唔喺度？麻煩開開門，有嘢想請教你。」我拍了將近十分鐘門，但廖先生始終無應門，單位內甚至連動靜也沒有。
「無辦法，唯有問梁生。」我轉身便敲四二一室的門並喊︰「梁生，我有嘢想請教你，關於你一直查緊嘅嘢㗎。」
我敲了數次門，同樣無人應門，心灰意冷之際，單位終於傳出聲音︰「你係咪有線索？咁邊個殺咗我寶貝女？」
「我都查緊，係有啲頭緒鎖定咗啲目標，我知你都查緊，而且查咗成十年，所以想同你共享情報，會快啲揾到真相。你開門先，我哋慢慢傾。」我在門外喊。
「吱」，門打開，梁先生看到我後第一個反應不是興奮，而是憤怒，他怒道︰「乜又係你呢個仆街仔？又想揾我寶貝女嚟開玩笑？上次放過你你仲唔感恩？今日唔好好教訓你我唔姓梁！」
「唔係啊！冷靜啲聽我講先，我真係有嘢要問你㗎！」我一面逃跑一面解釋，但他沒有要停下的意思，我沿着井繞圈拼命跑，他在後面窮追不捨。
「咁落去都唔係辦法，搏一鋪，死就死。」我停下面對着梁先生，手裏緊緊拿着那張照片。
看到那張照片，梁先生終於停下，他一手搶走照片，雙眼極速充滿淚水，比滴眼藥水還快，他失聲痛哭，甚麼話也說不出，我也只好繼續傻傻的站着等他下一步行動。
「你，查到啲咩？」梁先生強忍淚水，用沙啞的聲音問。
「我知道有五狼，唔係四狼。」我拋磚引玉，一方面測試他知道多少，一方面嘗試套出他有何人選。
「五狼？乜唔係四狼咩？」梁先生驚訝的問︰「我查咗咁多年都無突破，原來係因為漏咗一個？點解我無諗過嘅……」由他的反應看得出他不是裝傻，而是真的不知道，看來他的女兒也挺不孝，寧願告訴外人真相也不願告知和她血脈相連的父親，害他父親窮一生精力也找不到真相。
等等，難道五狼中其中一個是他？所以才故意不告訴他以作報復？應該不會這麼戲劇性吧！
梁先生握着我的手，懇求道︰「細路，可唔可以講我知係邊五個？」他差點跪下來求我。
「好好好，我哋入屋坐低慢慢傾，OK？」我尷尬的問，然後他便立即拉我進他的家，好好的招待我。
我喝了一口檸檬茶，然後說︰「以我所知，疑似五狼嘅人，有兩個已經死咗，剩低有兩個仲生存緊，而最後一個我都未查到。」之後我吃了一口檸檬味雪芳蛋糕。
「咁而家知嘅有邊幾個？」梁先生着急的問。
「死咗嗰兩個係萬生同徐生，仲在生嘅係王生同廖生，仲有一個我都未知。」我如實相告，但他的反應令我始料不及。
「我一早知。」梁先生聽完平靜的說︰「當時警察拉佢哋之後我就已經知係佢哋，只係我咁多年一直都無證據，我仲諗住你會有另外嘅人選，點知都係佢哋，你都唔係第一個同我講，只係你講有第五個人，我仲以為你會有其他新答案。」
「既然你知佢哋四個有份，我就有嘢要問你，雖然你可能覺得有啲無稽，但我真係好想知，另外我仲有一個新諗法都想講埋你知。」我把這次的來意道出，他以一付願聞其詳的樣子作回應。
「早幾晚我發咗個夢，但我覺得似係你個女報夢多啲。夢入面我見到細個嘅佢，廖生同佢玩緊，然後王生、徐生、萬生同一個我唔識嘅帶住玩具登場，不過相入面我有見過佢，最後佢哋同你入咗屋，留返廖生同你個女喺出面玩。然後畫面一轉，你個女大咗，畀好多人圍住，但江叔救咗佢出嚟，仲同佢好親暱。雖然我都知好無稽，但想知你對呢啲事有無印象？」我憶述那晚的夢問道。
梁先生苦思一會，然後說︰「我記憶入面無呢啲畫面，我同佢哋幾個係識，但未至於熟到咁，而且你講唔識嗰個人我都無乜印象，不過有一樣係真嘅，就係我個女同江仔呢個負心漢係青梅竹馬，一直好好朋友，甚至我都懷疑佢哋唔止係朋友咁簡單，真該煨。」一提到江叔的時候，他明顯帶着怒火。
梁先生的答案令我既失望又有希望，失望的是因為連他都不知道那神秘人是誰，要找出來更加困難；有希望的是他認證了江叔跟梁女的關係親密，所以Tracy絕對不會是他的前度。
「啊！」我突然想起甚麼，拿着照片連忙問︰「你個女大過嘅相有無？」
可是梁先生搖搖地，失落的說︰「佢大咗之後已經唔肯再影相，因為佢唔想再畀人纏住，所以我都無佢大個嘅相，連學生相都特登遮住個樣嚟影，淨係見到塊面嘅一小部份，所以你見我車頭相都係用佢小學嘅相。」
既然無近照，那便確認不到她現在的樣子，廖先生說她還在生的言論就很難尋找證據，不能判斷他是真傻還是假黐，那只好相信我的直覺好了。
「我咪話有個新諗法想講你知嘅，」我再喝了一口檸檬茶後說︰「我認為廖生係無辜，佢唔係其中一隻狼，佢真係見到你個女，亦都真係傻咗。」
聽到我這個說法，梁先生皺起了眉頭，怒火已經開始燃燒，但他硬是把怒火壓下，盡量心平氣和的問︰「你係有啲咩證據？」
我搖搖頭，只吐出「直覺」兩個字，他的怒火便再也壓抑不住，對我爆發道︰「細路，唔好三分顏色上大虹，我以為你有咩新料先對你客客氣氣，點知無料到，而家仲幫個黐線佬洗白，話佢無辜？佢詐傻扮懵㗎喳！我日日喺度mon住佢，就係等佢露出馬腳。」
「咁你等咗成十年等到未？」我淡定的問。
梁先生雖然深深不忿，但又無可奈何的答︰「未。」
我聽到後不禁為自己的小勝利而冷笑一聲，然後對他說︰「咁咪係，一個人點做戲，都無可能做足十年唔鬆懈，仲要你住正佢隔籬，日日mon到佢實，稍為放鬆都會畀你捉到啦，咁都無出過事，證明咗啲咩？證明咗佢係真傻，亦都證明咗佢係真係見到你個女，但我懷疑只係佢嘅鬼魂。」
「鬼魂？呢個世界無鬼㗎！如果真係有，唔係應該第一時間畀我見咗先咩？點會畀個外人見？再講，我個女出事嗰時佢都仲係正常，點解佢係無辜？」梁先生不解的問。
我心裏大概知道他看不到女兒的原因，不過我沒有向他說明，只是又一次搖搖頭，回答道︰「你問我我都答你唔到，我嘅推斷係建基於佢無講大話之上，所以先話佢真係見到你個女嘅鬼魂，而我認為佢畀廖生見得一定係有佢嘅原因，可能係覺得佢會幫到手查出真相啩。」
「荒謬！我作為老竇唔係仲更加會落心落力幫佢查咩？旨意啲外人？連警察都一早已經close file唔再查，成個世界係得返我先查緊！」梁先生勞氣道。
「咁又唔好咁武斷，我咪喺度查緊。」我自言自語道，但梁先生好像也聽到，兇狠的白了我一眼，我連忙轉移話題︰「江叔佢同你個女咁close，佢有無查過你個女單嘢？」
我一提到江叔，梁先生開始面露不悅，尖酸的說︰「呢個衰仔一開始都仲好積極去查，仲特登去學埋啲咩問米通靈嗰啲話幫我個女揾真兇。挑！點知積極完一排就無哂聲氣，仲好似唔識我個女咁隻字不提，見到我仲要兜路走，我呸！正垃圾！」
看來他對江叔不滿源於他的半途而廢，我想大概是他有新歡所以才忘記舊人吧！糟糕！那新人難道是Tracy？真是一個見異思遷的壞男人！
「梁生，我就同你分享咗咁多，不如你都講返我知呢十年你查到啲乜？我哋交換情報，有助破案，可能我會留意到一啲你忽略咗嘅細節呢！」我大膽開口問。
「你都講得啱，咁我就講你聽，你等陣。」說完後梁先生便走到梁女的神主牌前，拜完後在下面拿出了一本厚厚的筆記本，裏面夾滿了剪報和相片。他拿到我面前，翻開跟我逐一解說。
但我的心意此時並不在這本筆記本上，而是落在梁女的神主牌上，梁氏紫茵，梁紫茵，一個挺常見但美妙動聽的名字。
梁先生察覺到我的注意力分散了，在我面前打了個響指，把我召回來，然後繼續解說。他查到的東西，有不少AI已經告訴了我，可是有一樣是他查到而我很感興趣的──王太的證言。
雖然梁先生以惡意抹黑、胡說八道來評價這段證言，但無可否認這與鎮魂塔內王太的說詞如出一轍，均是指控梁女為人水性楊花，結局是咎由自取，只是這裏她無提及五狼是哪五人。
「你認為王生都有份，點解你唔指證佢？」我好奇的問。
「我證據唔夠，而且佢有不在場證明，我推翻唔到。」聽得出梁先生十分自責。
「係咩不在場證明？」我問。
「其實唔只係佢，其他三狼都有，佢哋當時喺屋邨間酒樓飲緊茶，有哂閉路，連王太都喺度。」梁先生眼裏充滿不甘，但很快又好像看到曙光般看着我說︰「但你同我講係五狼嘅時候，就所有嘢都講得通，因為第五隻狼就喺單位殘害緊我個女！」
「咁樣好似都有啲道理，只不過王太唔係咁講，佢話五個人想畀教訓你個女，最後錯手釀成意外，唔係一個人造成。佢咁講我會信，始終佢老公係其中一隻狼，如果真係由一隻狼殺咗你個女，無理由會拖哂全部人落水㗎，佢老公又唔係殺人嗰個，所以我認為係由五個人殺。」我選擇相信王太的證詞，並以她的立場去分析。
可是梁先生不同意，他藐視我說︰「你真係天真，最毒婦人心無聽過咩？我覺得可能有兩個原因，一係王太對老公太失望，想做死佢；一係佢哋唔知我女死咗，飲完茶返嚟再蹂躪，之後先發覺佢死咗，就以為自己有份，但實際一早已經死咗，咁就幫佢哋製造咗不在場證明。」
聽他這樣說，又好像很有道理，那究竟真相是甚麼？第五狼又是誰？廖先生真的是無辜嗎？他究竟怎樣幫梁女？看來無論如何也要再找廖先生問個明白。
「細路，咁耐都未知你叫咩名，同埋點解會查呢單案？」梁先生邊在筆記本上寫下新的想法邊問。
「我叫阿曉，新搬嚟幾個月。」我先告訴他我的名字，然後猶疑要不要編個謊言搪塞過去。
梁先生看到我在沉思，於是試探性的問︰「睇你年紀，係咪又係有人叫你嚟查？」
「又」？看來之前Tracy委託的人也來過找梁先生，既然他都已經知道，那我便如實相告好了。
「無錯，係有人委託我，我完全拒絕唔到佢，所以就開始調查。」我實話實說，沒有半點虛言。
「阿曉，你知唔知之前嗰啲人嘅下場？」梁先生沉重的問。
我想起了AI的答案，但礙於不知真偽，於是以疑問句回答︰「除咗一個之外，全部都跳樓死哂？」
梁先生以凌厲的眼神看着我說︰「無錯，就係咁，你自己好自為之，小心啲。」
看來AI所說，每年有年青人跳樓所言非虛，畢竟梁先生也不是第一個說這件事，我猜大概是「王」的所作所為吧！但只要能找到真相，我便能夠倖免於難，解除每年有人跳樓的詛咒。
「阿曉，雖然我唔知叫你查呢單嘢嘅係咩人，不過我都好多謝佢同我一樣仲堅持去揾出真相，如果可以，我都好想親自多謝佢，你可唔可以幫我傳句話，同佢約個時間見面？」在我臨離開前，梁先生誠心誠意的請求。
我一口答應了，其實我也沒有拒絕的理由，雖然我也不知道為甚麼Tracy要委託這麼多人去查這宗案件，但既然兩人都着緊這宗案件，那麼讓他們見面也未嘗不是一件美事。