留給自己最後的寶物: 第十章
蕭姑娘:「嘩！成昌，今日咁齊人呀？連你個仔都出嚟陪你打波呀？！」
和:「本應想揾埋雞蟲偉出嚟，可惜佢話有啲事，今日冇得浦頭……」
蕭:「唔緊要喇，我都帶埋仔仔- 阿家進嚟戥腳，宜家啱啱好夠數可以二對二開波！」
這時昌在不停地搜索自己的衣物和全身，好像找不着什麼東西似的。
蕭問:「漢和，你今日唔駛返工咩？」
和:「今晚返夜班，所以早上有時間。」
蕭:「唔駛陪太太？」
和:「佢咁啱又返早更，下午我首先會去接佢放工，然後輪到我返。」
蕭:「真係錫太太，兩口子家庭幾咁幸福……」
昌仍然在尋找着那東西。
蕭:「成昌，你喺度揾咩呀？我哋可以開波未？」
家進問:「開得波未呀，媽咪？」
昌:「我唔見咗個電話……」
和:「你有冇揾清楚呀？」
蕭糾正道:「漢和，希望你多啲體諒一下你爸爸，因為佢個病，需要好多好多耐性。」
漢和覺得她有點囉唆，自己絮絮細語地說着:「忍咗佢成大半世人仲未夠咩？」
昌:「我唔見咗啲咩呢？點解完全冇印象嘅？」
其實在出街打球之前，阿和與錦英互相配合之下，在擋着成昌視線的同時，已從他的背包裏偷偷拿走昌手機。目的就是想從中找尋雞蟲偉的電話號碼，嘗試聯絡雞，然後逼他現身將成昌財產的下落供出。
故此就算成昌再怎樣想、怎樣找，絶對不會知道自己手機現在身在何處。
自從成昌背包裏的手機被拿走一刻起，阿和已下定決心:「我哋要單獨挖雞蟲偉出嚟對質，但係唔可以畀老頭知道，如果唔係，我諗阿爸在場嘅時候唔會容許雞蟲偉講出財產收藏嘅真相！」
英:「你同阿昌先出去打波，我就留喺屋企呢度檢查佢部電話裏面有冇藏有雞蟲偉號碼！」
和:「好，媽，妳揾到嘅話立即Call我！」
昌在背後大聲道:「仲唔行？！喺度阿支阿左，有屎冇埞痾！……快啲啦，得唔得呀？」
差點兒等不及阿和反應過來他就已衝出門口走出去了。
英的搜索當然有所發現，她在昌的電話通訊錄內看見收錄了一位叫耿頌偉的人的電話號碼，此人十分活躍，在昌的通話記錄中頻頻出現。
英致電話給阿和再告之有關情況，他們鎖定此耿頌偉為目標人物，然後打算引他出來，來一次徹底的盤問！
「偉哥，我係阿漢和呀。阿爸話有啲賭本收藏喺書櫃入面，係社會保障基金一次性發放特許生果金，佢話畀你託管喎，你知唔知呢件事？」在電話中阿和對耿頌偉說。
「啊？冇喎，冇聽見過喎。你畀佢同我講？」
阿和一聽便認出那是雞蟲偉的聲線！那是他的一貫語氣！
「我阿爸喺醫院，佢宜家唔方便講電話呀。」阿和答說。
雞:「咁你等佢出院後先至同我講喇！」
和:「佢揾咗人幫佢擇日，一定要喺呢個禮拜之內去葡京酒店賭場落注，趕唔切等佢出院！」
雞:「你揾我做咩啫？佢有賭本關我屁事咩？」
和:「你唔係有鑰匙咩？」
雞:「唓！你問阿昌咪得囉！駛鬼揾我呀？」
和:「佢喺醫院休養緊，頭腦矇查查。」
雞:「我冇習慣幫佢落賭注噃，揾你去得唔得呀？」
和:「得！攞到錢就得㗎喇！」
雞:「錢喺書櫃入面？」
和:「櫃入面好似仲有啲重要物品喺裏面喎，係嘛？」
雞:「呢層我唔知喎！你唔好問我！就算知我都未必會講，事關佢話未係時候講。」
和:「我哋出嚟至講喇，好嘛？」
雞:「佢話總有一日，我會知道適當時機畀你哋知道裏面嘅物件。」
和:「你都有份？」
雞:「或者，……我都唔清楚。」
和:「除咗貴重嘅物品，我相信冇嘢會收藏得咁密實。」
雞:「我唔知道，唔好問我。」
和:「你係唔係有條開書櫃嘅鑰匙喺身上？」
雞:「……呀……呀……」
和:「有冇？」
雞:「你阿爸身上都有一條㗎，你問佢喇！」
和:「當然唔驚動佢老人家住，如果唔係，畀佢知道仲以為我哋謀住佢份家產添。」
雞:「我身上冇你要嘅嘢！你放過我喇，大佬！」
和:「你唔攞條匙出嚟嘅話我哋會去報警！」
雞:「嗱，你唔好玩咁大呀㗇！你要咩我畀咩你喇！」
……於是雞蟲偉答應了出來交還鑰匙。
在新橋區的廖家父母住所，門鈴聲一響，阿和逕直跑往玄關那裏將木門與鐵閘打開，眼前站在門外的人赫然是雞蟲偉。
屋內除了阿和等候他的，還有錦英、詠恩和蕭姑娘。
還有一位主角，是誰呢？
正是廖成昌自己。
雞問阿和:「你又話唔畀阿昌知道你哋揾條鑰匙，話怕佢誤會你哋喺度爭佢份家產？點解你畀佢喺度？」
和:「咁你帶咗條匙嚟未？」
成昌:「咩匙呀？咩家產呀？關我咩事？」
雞:「你個書櫃呀！你唔係藏咗啲貴重嘢喺入面咩？」
昌:「……書櫃……？」
和對雞回覆:「你都見喇，佢宜家呢個狀況，喺唔喺度，在唔在場與否已經唔重要。」
雞:「佢喺巴士上講電話嘅時候都好好地嘅喎，點解宜家咁？」
和:「佢嘅情況係，已經越病越重！……可能佢頭腦諗嘢已經開始有問題，事關佢對書櫃嘅事完全毫不知情。」
英:「嗚……好辛苦！……佢痴呆……病到傻咗！」
雞:「其實你哋有冇諗過佢嘅立場？一直以來佢幾咁痛苦。一向你哋當佢發癲，以為佢自己同自己講嘢，其實都看在阿昌眼裏，清清楚楚知道你哋諗乜！你哋全部當佢黐線，其實真係大錯特錯！」
詠恩:「老爺唔係病情到咗不可恢復嘅地步喇咩？我親眼見佢自言自語，唔係輕症噃！」
雞:「你哋誤會咗喇，其實佢不知幾精靈！」
和:「咩料呀？雞蟲偉，噏得出就噏，喺度耍花樣？你咪以為我哋唔敢報警呀！你唔好諗住喺呢件事情上佔到便宜！」
雞:「呸，我自己有間舖收租，駛鬼佔你廖家便宜咩？調轉頭講口水昌攞我着數就差唔多……巴士上所謂裝作有電話打入嚟，其實係我雞蟲偉打畀佢嘅。」
原來成昌在巴士上真的是在通電話。
雞:「阿昌成日會跟我哋一班死黨觀賞日本AV色情片，因為零用錢畀晒出嚟做家用，所以來來回回都重複睇住同一隻片，但最過癮係成昌佢永遠唔感覺沉悶，而且成日講女主角係「新女」，永遠都有新刺激，其他人看同一條片都看到麻木咁滯，冇晒感覺，佢仲覺得有新鮮感，我哋結果買啲新嘢畀佢嘆，結果佢都要睇返原本嗰齣AV先至肯罷休，頂佢個肺。」
雞蟲偉其實一有空便打電話給成昌，尤其是在到過醫院覆診的時候，他想知道老友的最新近況，所以錦英常在巴士上見到昌與雞蟲偉在通話時的對答。
錦英聽到此話後固然燃起了一絲希望，了解到丈夫的神志還清醒，裝作自言自語，不得不說確實精明過人，但另一方面又害怕成昌的痴呆病嚴重性不斷增加，有些重要事情，真的逐漸從記憶中奪去了，不回來了，這多麽的可悲啊。心理上越加折騰自己以及家人，有些東西受影響甚為深遠，事態不斷在發酵中，到底錦英能撐着多久？
英:「廖成昌，你到底有幾多分真？有幾多分假？……我好似越來越唔了解你，你話我知好唔好？」
昌:「我係廖成昌，咁妳係邊個？我講咩畀妳知道啊？」
英拿着照片，指着自己年輕時的模樣:「我係阿英呀！盧錦英呀！」
昌看見相片說:「我知喇！妳係英子吖嘛。」
錦英點頭:「嗯。」
昌好像認識這裏的每個人，他向蕭姑娘說:「我仲有過英子幫我檢測體溫時候嘅印象，仲有做愛嘅時候佢幫我打炮啊！幾刺激呀！佢嘅體溫好暖，我好鬼幸福。」
成昌就算病入膏肓都好，似乎記住了老婆英子的體貼。
昌:「我所擁有一切對呢位英子嘅印象，係唔係全部幻覺嚟呢？」
英:「雖然我哋嘅樣已經變老，但我哋擁有嘅一切印象，仍然係真實同實在嘅。……昌。」
蕭姑娘:「外表雖然轉變咗，但心仍然冇變，呢個可能就係你哋成日提到嘅感覺，佢永遠保留喺心裏。」
昌對看着錦英說:「妳係邊個呀？點解好似……我曾經對呢個女人有摸過佢、吻過佢嘅感覺！？」
阿和:「咁即係點呀？阿爸佢咁嘅狀況好有可能唔記得咗收埋份家產嘅事！而且，講感覺呢家嘢好空泛喎，如果佢對我哋有情義，都唔會將條鑰匙畀咗人，啱唔啱呀？」
雞:「好喇，其實佢叫過我，唔到逼不得已嘅時候，都唔好講出嚟，我諗宜家都到咗應該講出真相嘅時刻。……老實講，鑰匙，係得一條嘅啫，另外一條係虛構出嚟嘅，因為佢唔想家人盤問自己有關家產嘅事，佢知自己有病，想轉移視線在我耿頌偉身上，等佢病情得以緩解。」
和:「你肯做呢個禍心一定得到唔少好處喇！」
雞:「和仔，你會唔會諗多咗呢？」
和:「我冇估錯，你一定係想攞返份我阿爸曾經喺你身上面攞過嘅着數！」
雞:「和仔，你看輕我同你阿爸之間嘅交情，我冇話好說。但係你亦可以放心，你嘅憂慮唔會阻礙到我講出你爸爸將書櫃鑰匙收藏嘅下落，因為佢叫我無論你哋有咩反應，無論你哋有冇機心去謀奪家產，佢叮囑我一定要講畀你哋知，有關鑰匙嘅下落。」
和:「你點樣污衊我哋，到底阿爸有冇財產分配，我哋作為後代點都應該有知情權！」
英:「係囉，偉哥，我哋作為成昌嘅家眷，都係想得個知字。」
雞:「其實一直以嚟，鑰匙係放於成昌同錦英嘅結婚紀念照片後面，但係鍳於佢感到對屋企人愧疚，冇咩貢獻畀到自己屋企，於是……」
雞這時不經意地步行至廖家所擺放獎座獎牌的那個木飾櫃旁，說:「……於是佢收埋條匙喺佢乒乓球體育精神獎座裏面，呢個想法其實就係想其他人記得佢有過嘅成績，不至於一生人一敗塗地！」
英:「嗄！佢真係傻呀，介意呢啲嘢，我哋係一家人嚟㗎嘛，何必在意？唉……」
雞:「其實佢知道自己身體有病，許多嘅回憶漸漸模糊。你哋睇佢宜家嗰個樣，幾咁可怕，佢由始至終都唔想你哋擔心啫！」
最後，他們終於拿到了鑰匙，打開了書櫃，裏面所藏的卻並非大家所預料的……
和:「冇舖位契、冇股票、冇名貴獎牌、冇金幣，只得一塊用過嘅爛鬼舊球板，同埋……同埋一本寫滿文字嘅筆記簿？……阿爸佢仲有咩財產保留畀我哋呀？」