留給自己最後的寶物: 第五章

自2019年尾開始，來自國內的消息，一種疫症的大流行，正在迅速地向外傳播，當時人心惶惶，社會上普遍瀰漫着一股恐慌心理。
 
結果2020年的來到，開始了新冠肺炎的肆虐，每個人都大量儲存備用物資在家，超市貨架上的日用品一掃而空，像面臨重大災難前夕似的，水、乾糧、口罩、藥物、酒精、乾濕綿、消毒水通通售沽缺貨，人人都躲於家裏進行隔離，半步不出室外。人們不斷用測試棒放進鼻孔喉嚨檢測看是否對肺炎呈陽性結果，怕自己就是下一個確診患者。
 
「點攞藥呀？咳兩聲又話要隔離，額頭熱少少又話要去急症室，我只係嚟醫院攞血壓藥啫，咁撚麻鳩煩！」有位慣常到醫院診治慢性病的大叔嘮叨道。
又有人埋怨:「等咗足足3個鐘，都未攞到藥！真過份！」
群眾和應:「真係太過份喇！有冇搞錯呀？」
 
山頂醫院副院長親身跑到來醫院的大堂向受影響病人解釋說:
「唔好意思，各位。醫院現時正進入緊急狀態，一切災難應變措施要貫徹實行，醫療資源及人手非常之緊張，希望照顧唔到嘅輕症或非急性病者畀啲時間忍耐一下，調配資源需要多啲時間，請求你哋耐心等候，多謝！」




 
成昌一向有定期前往山頂醫院覆診、打針，讓主診醫生監察着他糖尿病的狀況，而且每隔一個月有藥物提供。
剛碰上新冠肺炎的疫情，向院方藥局取藥比較花時間。
昌:「唔去攞藥得唔得呀？橫掂上一期啲藥都未食得晒。」
英:「咁你記唔記得上一期仲有幾多粒藥剩低吖？」
昌:「好似仲有兩個星期嘅藥啩。」
英:「傻瓜，我對上一次幫你數藥嘅時候應該係仲有唔夠一星期嘅藥剩低啫喎。」
昌:「我食咗幾多粒藥都冇乜印象，仲以為有排食添。」
英:「㗇……真係冇畀錯名你嘅，口水昌即係口水昌，唔肯定嘅嘢答得咁實牙實齒！」
昌:「我都唔想㗎！就算我知道食剩嘅藥有限，我都唔想再上嚟醫院攞！明知藥力過咗之後我個病又會復發。」




英:「你知就好！咁你明點做㗎喇！」
昌:「個糖尿再嚴重啲我都可以忍受到，我明白病情一件事，藥力有冇效力一件事。」
英:「咪係囉，你始終都要攞藥㗎喇，如果唔係，食晒點算好？藥力一失效盞你自己辛苦。」
昌:「咪唔食住囉！我唔怕辛苦！」
英:「嗱，你又嚟喇，陳醫生話過，糖尿病嚴重起上嚟會導致腳腫脹，你唔怕咪即管唔食囉！」
昌:「老實講，攞藥要等咁撚耐，真係煩死人！就算我瓜老襯我都情願唔攞！」
英:「你去死我唔阻住你，最慘死唔去受折磨咋！」
 
昌:「總之我唔想喺度等咁耐！腳腫就由得佢腫過夠喇！」
英:「陳醫生話有個阿婆冇人照顧，冇準時食藥，結果佢腳腫到差一啲就要去折肢！睇你仲敢唔敢唔理佢？」




昌:「折肢……？」
英:「即係切咗隻腳佢，我問你驚唔驚？」
昌:「……」
 
自那天起，成昌便每日乖乖地聽話，準時食藥。
每次到山頂醫院看完醫生後，到藥局取藥時，就算遇上多長的人龍在排隊，亦不厭其煩地讓太太錦英幫忙輪候，等着到自己的取藥號碼在屏幕上顯示後，便來到藥物櫃台窗口處拿藥。
 
不吃藥導致折肢的恐懼雖然植入到成昌的內心深處，但是一問起他不吃藥的後果會是何樣光景，正想透過這問題提示他吃藥的重要性時，成昌卻又啞口無言答不出話來，錦英覺得很莫名其妙，怪自己是否令他過度恐慌，漸漸有點擔心他時好時壞的記憶，是情緒不穩所致嗎？
 
英:「昌，快啲話畀蕭姑娘聽，你最近好乖喎，次次都好準時食藥。」
蕭:「係咩？真係咁聽話？」
英:「蕭姑娘，自從佢聽過話要折肢之後，不知幾乖！」
蕭:「成昌，唔可以因為驚折肢先至去食藥喎，咁你咪好唔開心囉？你要積極啲諗，食藥係用嚟保持身體健康嘅，咁諗至啱嘛！」
昌:「折肢？……咩折肢呀？」
英:「切走你隻腳呀！你唔係好驚嘅咩？」




昌:「唔要啊！點解要切走我隻腳呀？！」
英:「如果你唔食藥咪要切咯。」
昌:「咁仲唔快啲畀藥我食？！」
英:「㗇，你呀，半個鐘頭前先至畀你食完，宜家食咩藥啊？食懵你呀！」
蕭姑娘對錦英說:「佢好似有啲唔對路，駛唔駛請求醫生寫封轉介信去精神科睇一睇？」
英:「講起嚟，近排我都注意到唔多妥，剛剛食完抑制糖尿嘅藥冇幾耐，過兩、三個鐘頭後又話攞藥食。」
前事完。
 
11月9號當日……
錦英帶着轉介信，在詠恩的陪同下，成昌他們三人戴着口罩，經過健康碼審查，然後終於來到醫院的精神科門診作初步檢測。
 
見他們的是一位斯文有禮的丁姓醫生，他看了看病人記錄便問:
「你係同時睇緊內科而要求過嚟睇精神科嘅病係唔係？你封轉介信我已從數據庫下載落嚟睇。」
英:「丁醫生，唔知我先生原來嘅糖尿病有冇影響情緒上嘅健康？」
丁:「有好多好似你嘅個案，患有糖尿病亦同時精神受影響有唔同程度嘅生理失調，我哋有經驗handle，所以唔駛擔心！」




頭一次見面，丁醫生已單刀直入地問患者:「廖成昌，你有冇夜晚黑瞓唔着覺，日頭食唔落嘢，又或者有頭痛頭暈嘅情況？有冇精神不振嘅感覺？」
昌:「冇……我好精神，一啲問題都冇！我根本唔駛嚟呢個部門睇，嘥時間、嘥心機！……我警告你，千祈唔好當我係黐線㗎！」
丁:「好多就診者對精神科好抗拒，呢個係好自然嘅事，當初會好難接受。」
然後丁醫生問錦英:「請問妳先生平時有冇出現語無倫次嘅情形？」
英:「試過自己作狀有電話打入嚟，扮成聽電話咁，而且情緒似乎好唔穩定，我唔識點講，總之佢好多疑慮，有時仲話對自己好失望，一生未有一次成功，冇面目面對。」
 
丁:「佢仲有冇其他咩異樣？」
英:「一係就唔願意食藥，一係當解釋完唔食藥會面臨折肢之後，原本一日一次服食嘅藥，宜家每隔兩、三個鐘就冤住要食，佢係心急想多食幾次希望快脆啲好返吖？定還是冇記性自己食過呢？我真係搞唔清楚！」
 
丁:「唔，我仲未夠膽肯定，但係喺精神科斷診過程中，有所謂憂鬱障礙嘅確診解釋，而且就妳提及過嘅觀察來講，初步唔排除有咁嘅判斷成立，但係未必一定正確。」
詠恩:「憂鬱障礙會記憶力方面出現問題？」
丁:「主要會有焦慮、注意力唔集中，而且仲會自卑感好重，記憶力下降。」
詠恩:「醫生，我老爺忘記嘢嘅情況應該只限近期嘅事，但以前嘅嘢佢記性好好，尤其是年青時嘅體育生涯，有時會緬懷過去，從佢口中提及。」