留給自己最後的寶物: 第四章
雞蟲偉:「今日冇咁過癮喇。」
昌:「乜傢伙你今日咁冇癮呢又？」
雞蟲偉:「事關我哋嘅賭局今次冇着落咯。」
昌:「點解唔賭？如果冇得賭，你想攞我條命咩？」
雞蟲偉:「喂！口水昌，你唔係下話，你約咗嗰個蕭姑娘同佢個仔打波，仲想點放任玩樂？人哋好正經、好健康㗎！」
昌:「邊個？……邊個蘇姑娘呀？」
雞:「我冇記錯嘅話，應該係蕭姑娘至啱！」
昌:「你冇嘢下話，大佬偉，係你約咗佢先至啱啫啩？我邊有約過咩蘇姑娘……你記憶真係差，自己約咗人仲話係我約咗，失憶呀你？」
這時，蕭姑娘和她的兒子果然來到塔石室內體育館之乒乓枱前，以一身專業運動裝束展現人前，準備與成昌來一場既健康又愉快的乒乓球比賽。目的則盡量不會有空隙讓雞蟲偉他的賭性得以半步進寸，讓博彩的基因打擾着大家享受玩球的樂趣。
有誰知道成昌他們也不志在什麼體育樂趣，成昌在四十多年前其實已經放棄這份所謂樂趣了，自從他拿下「體育精神奬」那天起，他已經對這項自己曾熱衷過的運動不再有任何趣味可言。
他們在蕭姑娘鼓勵下，不情不願地開始打起球來。
於是，蕭姑娘與雞蟲偉成為了一組，而成昌和蕭的兒子，家進，就成為另一組，然後這樣互相對壘。且看實力，這樣的安排，兩隊技術較為均等，賽情激烈，似乎又不像雞蟲偉所預期的那麼「冇癮」。
雞:「𡃁仔，幾多歲呀？好似食過下夜粥咁喎，揸起球拍上嚟真係有板有眼！」
一邊發球，家進一邊回答:「十一歲。」
蕭:「佢喺學校裏面代表自己班級比賽㗎！」
雞:「果然厲害喎！」
蕭:「冇番咁上下都唔帶佢嚟見你哋喇。」
昌:「你係蘇姑娘個仔下話？食咗飯未？」
雞:「宜家幾點呀？大佬，問人食咗飯未？」
昌看看手錶:「原來先至9點半咋喎！」
這時雞蟲偉一下快速揪擊過對面枱，昌抵擋不了，告輸一分。
蕭:「聽錦英講，從好耐以前，成昌已經好鍾意打乒乓波咯喎，係咪呀？」
雞:「我廿幾年前識佢已經有打！打到宜家。」
蕭:「好似仲參加過比賽添？」
昌:「呢啲都係以前嘅事，何姑娘又提嚟做咩呢？」
雞:「人哋係蕭姑娘呀，邊度走出個蘇姑娘，又或者何姑娘呀？」
蕭:「成昌，你今日狀態好差喎！連我叫咩名你都搞錯？」
昌:「我冇搞錯！妳係蕭姑娘嘛！我知！」
蕭:「好彩你仲認得我，哈哈。」
雞:「呢輪口水昌好弱雞吔，仲雞過我雞蟲偉。」
簫對雞問:「睇嚟阿偉哥仔你同成昌感情幾好噃？但係成昌家人就好唔認同，好抗拒你。」
雞:「我哋成日吃喝玩樂，花天酒地，佢個仔梗係唔鍾意喇！」
蕭:「成昌同你個仔漢和都好喜歡運動……但係都係一啲唔係幾開心嘅經歷？係唔係？所以淪落去賭錢？」
昌:「哦？我老婆阿英子話畀妳知㗎？」
蕭:「阿和仔跑步跑得唔開心？」
昌:「我唔知喎……」
蕭:「曾經你響乒乓波枱上亦都有過失意嘅時候？」
昌:「好小事啫！賭博其實都係一種體育運動嚟！要用腦㗎！」
蕭:「唔止體育方面，你做過嘅生意一樣係冇好結果？」
昌:「阿英真係多事！咩都同啲外人講。」
蕭:「成昌，你唔好誤會，我係嚟幫你嘅。」
昌:「我唔駛妳幫喎！」
蕭:「你唔好對舊陣時嘅嘢耿耿於懷，放開啲好唔好？」
昌:「我冇事……」
蕭:「所以你選擇要為自己做返一件了不起嘅事啱唔啱？」
昌:「妳咩意思？」
蕭:「聽你屋企人提起，你想出版一本小說喎？係咪呀？」
昌:「係又點？」
蕭:「……好吖，係好事呀！大家都應該全力支持你！」
昌:「何姑娘，平時見妳喺屋企問長問短已經夠晒煩，宜家連私人興趣都要理埋？真係冇妳咁好氣，唔夠妳玩咯。」
雞:「一個字講晒，煩呀。」
家進:「我媽媽姓蕭，我先至姓何呀！」
蕭問昌:「我從未透露過我夫家姓何，你點會知㗎？奇怪……」
雞:「佢可能咁啱撞中啫。呢世人佢都係咁好彩，尤其是娶咗個咁好嘅老婆，成日都咁支持佢，如果唔係，佢老早就跪低企唔返起身囉。」
這場乒乓球的比試雙方其實不相伯仲，難分勝負，但成昌與家進的一方僅僅落後三分，始終技術稍遜一籌，昌有點不服氣:「我哋再鬥多場！」
「好！」「好！」
可是，最終成昌的一方還是輸了。
昌對家進說:「阿仔，伯伯技術差，連累咗你，唔好意思呀。」
家進:「伯伯打得好叻呀！你教我打好唔好！？」
蕭:「係囉，成昌可以教下阿進打波，佢不知幾想有前輩教佢。」
昌:「我盞拖累……何姑娘……妳個仔，教衰晒，妳個仔盞輸波輸到趴喺度，我反對呢個提議。」
蕭:「打波梗係有贏有輸嘅，只要再努力練習，下次一定會贏返嚟！」
昌:「可惜，我從未有贏過。」
雞:「以我所知，年輕時期口水昌好認真咁打乒乓波比賽嘅喎！」
昌:「多事！」
蕭:「唔好喇，成昌，講嚟聽下，唔好咁收埋自己，開放多啲喇。」
昌:「賽果一直強差人意，妳叫我點開口？我離唔開一個失敗嘅宿命。」
蕭:「你唔係曾經得過一個獎狀咩？」
昌:「我唯一嘅獎只係安慰獎座一小個，所謂嘅體育精神，虛有其表，冇實際意義。顧念我參加過佢咁多次嘅比賽，一個安慰我咁多次失敗嘅獎！」
雞:「講起失敗，你未夠我！最起碼你組織起一個小家庭，比起我都算得上係成功吖！」
蕭:「係囉，成昌，你個仔都好似你有玩運動，兩仔爺拍住上！」
昌:「唔好講個衰仔，佢返學唔係讀書，群埋一班壞份子，無惡不作，真係唔知佢將來點畢業！妳仲話運動喎！畢唔畢到業都成問題！」
雞:「你正一口水昌，冇叫錯你嘅！抹下口水喇，你個仔阿和都出咗身咁耐，宜家出咗嚟做嘢咯！食懵你呀？」
昌:「我真係唔想見到和仔好似我咁樣，一敗塗地。」
蕭:「咁你又唔好咁講，成昌，你唔係失敗，人如果係輸嘅多數係輸畀自己，其實你好過好多人㗎喇。試問有幾多個人能夠似你咁攞到體育精神獎？」
昌:「哦……妳響度取笑緊我！」
蕭:「唔係呀，我認真咁講㗎。」
昌:「我曾經想過，要改變失敗命運。」
雞:「咁你要講嚟聽下喇，我都想試試，你有咩辦法改變命運？」
昌:「我原本想追多一個仔，等我有一個細仔嚟承接我兩公婆想達成嘅心願，無論喺運動、學業或者嗜好，都想佢青出於藍，期望可以改寫我哋廖家一家嘅命運。我唔想姓廖嘅花咗一生心血去追求成功，最終落得失望收場。」
雞:「真係孤注一擲！搏一搏追多個壯丁，可能真係有啲機！」
蕭:「咁結果呢？你唔好同我講你哋呢個年紀要生仔下話？」
昌:「可惜我哋點樣努力都追唔成功。」
蕭:「你哋咁大年紀，梗係難喇！」
昌:「所以，我哋之後又想出另外一種原因解釋我廖家失敗嘅命運……」
蕭:「咩原因？」
昌:「我哋揾咗一個命理師傅同我哋算命。」
雞:「係？咁師傅講咩呢？」
昌:「命相師話幫我哋作咗法，化解我兩公婆命格原來五行相剋嘅困局。」
蕭:「你哋相剋？哼，你如果唔係靠老婆，你都唔會養得起呢頭家，你哋相互扶持咗咁耐，點算得上相剋呢？荒謬……」
昌:「但係我始終覺得，佢作法之後，屋企真係樣樣都順順利利，病痛都有改善咗喎，唔到妳唔信呀。」
聽成昌說到這裏，蕭姑娘替錦英感到有點難過，在心裏想:「呢個男人，到底有冇用㗎？全冇鬥志可言，所依賴嘅都唔係一啲靠真正實力換取返嚟嘅成果，相信啲自己呃自己嘅嘢，可憐錦英辛苦咗大半生，為咗呢個男人。」